ភ្នំពេញ៖ ឯកឧត្តមរដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ បានបញ្ជាក់ថា ស្ថានភាពទីផ្សារការងារកម្ពុជាមានភាពរឹងមាំ​ រក្សាបានអត្រាអ្នកមានការងារធ្វើខ្ពស់ប្រមាណ ៩៩,៣% នៃកម្លាំងពលកម្មសរុបចំនួនប្រមាណ ១០,៨លាននាក់។

នៅក្នុងពិធីបើកសន្និបាតបូកសរុបលទ្ធផលការងារឆ្នាំ២០២២ នៃការអនុវត្តផែនការយុទ្ធសាស្រ្ត​អភិវឌ្ឍន៍​វិស័យការងារ និងបណ្តុះបណ្តាលវិជ្ជាជីវៈឆ្នាំ២០១៩-២០២៣ និងលើកទិសដៅការងារ​ឆ្នាំ២០២៣ របស់ក្រសួងការងារ នៅព្រឹកថ្ងៃទី២២ ខែកុម្ភៈនេះ ឯកឧត្តមបណ្ឌិត អ៊ិត សំហេង រដ្ឋមន្រ្តី​ក្រសួងការងារ និងបណ្តុះបណ្តាលវិជ្ជាជីវៈ ​បានមានប្រសាសន៍ថា ពាក់ព័ន្ធអត្រាការងារខ្ពស់ខាង​លើនេះ អ្នកកំពុងធ្វើការក្នុងប្រទេសក្នុងវិស័យឧស្សាហកម្មមានចំនួន ​២,៥លាននាក់ (ស្មើនឹង ២៣%), វិស័យសេវាកម្ម ៣,១លាននាក់ (ស្មើនឹង ២៩%), វិស័យកសិកម្ម ៣,៤លាននាក់ (ស្មើនឹង ៣១%), មន្ត្រីសាធារណៈ ៥០ម៉ឺននាក់ (ស្មើនឹង ៥%) និងពលករទេសន្តរប្រវេសន៍មាន ចំនួន ១,៣លាននាក់ (ស្មើនឹង ១២%)។

ក្នុងឱកាសនោះ ឯកឧត្តមរដ្ឋមន្រ្តី បានជំរុញមន្រ្តីក្រោមឱវាទទាំងអស់បន្តពង្រឹងការងារឲ្យកាន់​តែ​មាន​ប្រសិទ្ធិភាពបន្ថែមទៀត ដើម្បីរួមចំណែកជាមួយរាជរដ្ឋាភិបាលក្នុងការលើកកម្ពស់ការងារ ជាពិសេស​ធានាឲ្យកម្មករនិយោជិត បុគ្គលិក​គ្រប់វិស័យ​ទាំង​អស់​បំពេញ​ប្រកប​ការងារដោយ​សុខដុមនីយកម្ម ​និងប្រាក់ឈ្នួលសមរម្យ។

ឯកឧត្តមរដ្ឋមន្រ្តី ​បានបន្ថែមទៀតថា ​ទោះបីជាកម្ពុជា​​បាន​ទទួល​រងនូវផលប៉ះពាល់ធ្ងន់ធ្ងរ បណ្តាល​មក​ពីការរីករាលដាលនៃជំងឺកូវីដ-១៩ ​ដែលបានបង្កើតជា​បច្ច័យ​អវិជ្ជមានដល់កំណើនសេដ្ឋកិច្ច និង​សកម្មភាពសង្គម, ក្រសួងការងារ បានចូលរួមចំណែកយ៉ាងសកម្មជាមួយរាជរដ្ឋាភិបាល ក្នុងកិច្ច​ខិតខំប្រឹងប្រែងប្រកបដោយភាពបុរេសកម្ម ​ដើម្បីគ្រប់គ្រងការហូរចូល និងការឆ្លងរាលដាល​ជំងឺ​កូវីដ-១៩ ឈានទៅបើកឱ្យដំណើរការឡើងវិញជាបណ្តើរៗ​នូវសកម្មភាពសង្គម-សេដ្ឋកិច្ច និង​ការរស់នៅជាមួយកូវីដ-១៩ ក្នុងគន្លងប្រក្រតីភាពថ្មី ​សំដៅឈានចាកចេញពីវិបត្តិ កូវីដ-១៩ ដោយ​ភាពរឹងមាំ អាចគ្រប់គ្រងបាន ​និងត្រលប់ទៅរក​មាគ៌ា​នៃកំណើន និងការអភិវឌ្ឍ៕អត្ថបទ៖ ឈិត បូរ៉ាវី