ភ្នំពេញ៖ គម្រោងលើកកម្រិតគុណភាពផ្លូវជាតិលេខ៤ ប្រវែង១៩៦ គីឡូម៉ែត្រ ត្រូវបានរំពឹងថា នឹងរួចរាល់សព្វគ្រប់ក្នុងឆ្នាំ២០២៥ខាងមុខ។

ខណៈអញ្ជើញដឹកនាំគណៈប្រតិភូក្រសួងបំពេញបេសកកម្មចុះត្រួតពិនិត្យបច្ចេកទេស និងវឌ្ឍនភាពការងារគម្រោងលើកកម្រិតគុណភាពផ្លូវជាតិលេខ៤ កាលពីរសៀលថ្ងៃទី២៣ ខែកុម្ភៈ ឆ្នាំ២០២៣ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រី ក្រសួងសាធារណការ និងដឹកជញ្ជូន បានថ្លែងប្រាប់អ្នកសារព័ត៌មានថា គម្រោងលើកកម្រិតគុណភាពផ្លូវជាតិលេខ៤ ប្រវែង១៩៦ គីឡូម៉ែត្រ ត្រូវបានរំពឹងថា នឹងរួចរាល់សព្វគ្រប់ក្នុងឆ្នាំ២០២៥ខាងមុខ។ ពីដើមឡើយផ្លូវជាតិលេខ៤ មានទទឹងតួផ្លូវតែ៧ម៉ែត្រប៉ុណ្ណោះ ហើយបច្ចុប្បន្នគម្រោងលើកកម្រិតគុណភាពផ្លូវមួយខ្សែនេះ នឹងត្រូវពង្រីកទទឹងតួផ្លូវរហូតដល់១០ម៉ែត្រ ដោយក្នុងនោះប្រវែង ៤០គីឡូម៉េត្រ នឹងត្រូវពង្រីកពី ២គន្លង ទៅជា ៤គន្លង។

ឆ្លៀតក្នុងឱកាសនោះ ឯកឧត្តមទេសរដ្ឋមន្ត្រីក៏បានអំពាវនាវឱ្យក្រុមហ៊ុនដឹកជញ្ជូនទាំងអស់ សូមកុំដឹកជញ្ជូនលើសទម្ងន់កម្រិតកំណត់ដោយច្បាប់ ដែលបណ្ដាលឱ្យផ្លូវថ្នល់ឆាប់ខូច ព្រោះការដឹក​ជញ្ជូន​លើសកម្រិតទម្ងន់កំណត់ គឺជាមូលហេតុចម្បងនាំឱ្យផ្លូវទាំងអស់​មានការសឹករេចរឹល។

ផ្លូវជាតិលេខ៤ គឺជាផ្លូវជាតិមួយតភ្ជាប់ពី រាជធានីភ្នំពេញ ទៅកាន់ទីក្រុងកំពង់ផែភាគនិរតី ដែលជាកំពង់ផែសមុទ្រអន្តរជាតិតែមួយគត់របស់កម្ពុជា។ ខ្សែផ្លូវនេះ នឹងត្រូវលើកកម្រិតគុណភាព​ជាពិសេសសម្រាប់ការដឹកជញ្ជូនទំនិញរវាងរាជធានី និងកំពង់ផែ ដោយរថយន្តដឹកទំនិញធុនធ្ងន់ និងកុងតឺន័រ ដើម្បីឱ្យស្របទៅតាមកំណើនសេដ្ឋកិច្ចដ៏ឆាប់រហ័សរបស់ប្រទេសជាតិ៕