​បាល់ទាត់៖ ​វ៉ាក់សាំង Sinovac​ ដែល​ជា​ជំនួយ​របស់​សាធារណរដ្ឋ​ប្រជាមានិត​ចិន ​នឹង​ទៅដល់​ទឹកដី​អាមេរិក​ខាងត្បូង​ថ្ងៃ​អង្គារ​នេះ ដើម្បី​ប្រើប្រាស់​សំរាប់​ព្រឹត្តិការណ៍​បាល់ទាត់​ជើងឯក​អាមេរិក​ខាងត្បូង Copa America​។

​​វ៉ាក់សាំង​ចំនួន ៥​ម៉ឺន​ដូ​ស​នឹង​ទៅដល់​ទឹកដី​ប្រទេស​អា​ហ្ស​ង់​ទីន និង​កូ​ឡុំ​ប៊ី ​ដែល​ជា​សហ​ម្ចាស់ផ្ទះ​ព្រឹត្តិការណ៍​បាល់ទាត់​ធំ​ជាង​គេ​ក្នុង​តំបន់​មួយ​នេះ​។ ​កាលពីដើម​ខែ​មេសា​កន្ល​ង​ទៅ​ ក្រុមហ៊ុន​ផលិត​វ៉ាក់សាំង Sinovac Biotech បាន​ចុះ​កិច្ចព្រមព្រៀង​ ជាមួយ​សហព័ន្ធ​បាល់ទាត់​អាមេរិក​ខាងត្បូង CONMEBOL ក្នុង​ការ​ផ្តល់​ជំនួយ​វ៉ាក់សាំង​ចាក់​ជូន​គ្រប់​ភាគី​ពាក់ព័ន្ធ​ទាំងអស់​ ដែល​នឹង​ចូល​រួមព្រឹត្តិការណ៍ Copa America ឆ្នាំនេះ​។ ​​កីឡាករ​បាល់ទាត់ គ្រូ​បង្វឹក ក្រុមការងារ​បច្ចេកទេស មន្ត្រី​អាជ្ញា​កណ្តាល​ជាដើម​សុទ្ធតែ​នឹង​ត្រូវ​ទទួល​វ៉ាក់សាំង​ទាំង​អស់​គ្នា​។ ព្រឹត្តិការណ៍ Copa America នៅលើ​ទឹកដី​អា​ហ្ស​ង់​ទីន និង​កូ​ឡុំ​ប៊ី​នឹង​ចាប់ផ្ដើម​នៅ​ថ្ងៃ​ទី១៣ ខែ​មិថុនា​ខាងមុខនេះដល់​ថ្ងៃ​ទី​១០ ខែ​កក្កដា បន្ទាប់ពី​ត្រូវ​បាន​លើក​ពេល​មួយ​ឆ្នាំ​ដោយ​សារ​វិបត្តិ Covid-19​។

​​សូម​បញ្ជាក់​ថា ​អាមេរិក​ខាងត្បូង​ជា​ទ្វីប​ដែល​មាន​ការឆ្លង ​រីក​រាលដាល​ខ្លាំង​នៃ​មេរោគ​រាតត្បាត Covid-19 ជាក់ស្ដែង​អា​ហ្ស​ង់​ទីន​មាន​អ្នក​ឆ្លង​សរុប​ជិត ៣​លាន​នាក់ និង​មាន​ករណី​ស្លាប់​ជាង ៦​ម៉ឺន​នាក់ ឯ​កូ​ឡុំ​ប៊ី​មាន​អ្នក​ឆ្លង​សរុប​ប្រហាក់ប្រហែល​អា​ហ្ស​ង់​ទីន​ដែរ និង​មាន​ករណី​ស្លាប់​ជាង ៧​ម៉ឺន​នាក់​។ ប្រេ​ស៊ី​ល​ជា​ប្រទេស​នៅ​តំបន់​អាមេរិក​ខាងត្បូង ​ដែល​មាន​ករណី​ឆ្លង​ច្រើន​ជាង​គេ និង​ឈរ​លេខ​៣ លើ​ពិភព​លោក ដោយមាន​អ្នក​ឆ្លង​សរុប​ជាង ១៤​លាន​នាក់ និង​ស្លាប់​ជិត ២០​ម៉ឺន​នាក់​៕

​អត្ថបទ​៖​នាង សុភា​វុ​ធ