អឺរ៉ុប៖ សហភាពអឺរ៉ុបបានបើកភ្លើងបំភ្លឺទីស្នាក់ការកណ្តាល នៅទីក្រុងប្រ៊ុចសែលរបស់ខ្លួនជាពណ៌ទង់ជាតិប្រទេសអ៊ុយក្រែនកាលពីយប់ថ្ងៃព្រហស្បតិ៍ ទី២៣ ខែកុម្ភៈ ដើម្បីប្រារព្ធខួបមួយឆ្នាំនៃការវាយលុករបស់រុស្ស៊ី។ សង្គ្រាមអ៊ុយក្រែនដែលជាជម្លោះទឹកដីដ៏ធំបំផុតនៅអឺរ៉ុប ចាប់តាំងពីសង្គ្រាមលោកលើកទី២ បានជម្លៀសមនុស្សរាប់លាននាក់ បំផ្លាញទីក្រុង ទីប្រជុំជន និងភូមិរបស់អ៊ុយក្រែន និងធ្វើឲ្យប៉ះពាល់ដល់សេដ្ឋកិច្ចពិភពលោក។
សហភាពអឺរ៉ុបបាននិយាយថា ចាប់តាំងពីការចាប់ផ្តើមជម្លោះនេះ សហភាពអឺរ៉ុបបានទទួលជនភៀសខ្លួនអ៊ុយក្រែនចំនួន ៤លាននាក់នៅលើទឹកដីរបស់ខ្លួន ហើយបានសន្យាថានឹងចំណាយទឹកប្រាក់ ៦៧ពាន់លានអឺរ៉ូនៅក្នុងផ្នែកហិរញ្ញវត្ថុ មនុស្សធម៌ ថវិកាសង្គ្រោះបន្ទាន់ និងជំនួយផ្នែកយោធា។ ជាមួយគ្នានេះទីក្រុងប៉ារីស ប្រទេសបារាំង បានបើកភ្លើងបំភ្លឺប៉ម Eiffel ពណ៌ខៀវ និងពណ៌លឿងជាពណ៌ទង់ជាតិអ៊ុយក្រែន ខណៈដែលសម្ព័ន្ធមិត្តរបស់អ៊ុយក្រែននៅជុំវិញពិភពលោក បានរៀបចំប្រារព្ធខួបមួយឆ្នាំនៃសង្គ្រាមរវាងអ៊ុយក្រែន និងរុស្ស៊ី។ ការបើកភ្លើងបំភ្លឺនេះជាការប្រារព្ធខួប ១ឆ្នាំនៃសង្គ្រាម បន្ទាប់ពីរុស្ស៊ីបានវាយលុកចូលអ៊ុយក្រែនពេញលេញនៅថ្ងៃទី២៤ ខែកុម្ភៈ ឆ្នាំ២០២២។
ទន្ទឹមនឹងនេះដែរ មហាសន្និបាតអង្គការសហប្រជាជាតិបានដាក់រុស្ស៊ីឲ្យនៅឯកោកាលពីថ្ងៃព្រហស្បតិ៍ ដោយប្រារព្ធខួបមួយឆ្នាំចាប់តាំងពីទីក្រុងមូស្គូបានវាយលុកលើអ៊ុយក្រែន ដោយអំពាវនាវឱ្យមានសន្តិភាពពេញលេញ និងយូរអង្វែង និងបានទាមទារម្តងទៀតឱ្យរុស្ស៊ីដកកងទ័ពរបស់ខ្លួន និងបញ្ឈប់ការប្រយុទ្ធ។ មួយថ្ងៃបន្ទាប់ពីអ្នកការទូតជាន់ខ្ពស់របស់ចិនបានធ្វើទស្សនកិច្ចនៅទីក្រុងមូស្គូ និងបានសន្យាទំនាក់ទំនងភាពជាដៃគូកាន់តែជ្រាលជ្រៅជាមួយរុស្ស៊ី ទីក្រុងប៉េកាំងបានបោះឆ្នោតអនុប្បវាទជាលើកទី៤ ដែលប្រទេសនេះធ្វើទង្វើរបែបនេះចាប់តាំងពីរុស្ស៊ីបានវាយលុកអ៊ុយក្រែន។ សេចក្តីសម្រេចត្រូវបានអនុម័តកាលពីថ្ងៃព្រហស្បតិ៍ដោយមានសំឡេងគាំទ្រ ១៤១សំឡេង និងអនុប្បវាទចំនួន ៣២សំឡេង។ ប្រទេសចំនួន៦ បានចូលរួមជាមួយរុស្ស៊ីដើម្បីបោះឆ្នោតមិនយល់ព្រម៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
