ត្បូងឃ្មុំ៖ ក្រុមការងារគណបក្សប្រជាជនកម្ពុជា ចុះជួយឃុំកណ្ដោលជ្រុំ ស្រុកពញាក្រែក ខេត្តត្បូងឃ្មុំ នៅថ្ងៃទី ២៥ ខែកុម្ភៈ ឆ្នាំ ២០២៣ បានចុះសួរសុខទុក្ខ និងនាំយកអំណោយផ្ដល់ជូនគ្រួសារក្រីក្រចំនួន ១០០គ្រួសារ ដែលរស់នៅក្នុងមូលដ្ឋាន​។

ឯកឧត្តម តូច ចាន់នី ប្រធានក្រុមការងារគណបក្សប្រជាជនកម្ពុជា ​ចុះជួយឃុំកណ្ដោលជ្រុំ ខេត្តត្បូងឃ្មុំ រួមទាំងក្រុមការងារជាច្រើនរូប ​បាននាំយកអំណោយ ​និងថវិកាមួយចំនួន ផ្ដល់ជូន​ដល់គ្រួសារក្រីក្រចំនួន ១០០គ្រួសារ ដែលកំពុងរស់នៅក្នុងមូលដ្ឋានខាងលើ។

ក្នុងឱកាសផ្ដល់អំណោយជូនគ្រួសារក្រីក្រនេះ ឯកឧត្តម តូច ចាន់នី បានលើកឡើងប្រាប់ទៅ​ប្រជាពលរដ្ឋថា ​សុខទុក្ខរបស់ប្រជាពលរដ្ឋគ្រប់រូប ជាសុខទុក្ខរបស់គណបក្សប្រជាជនកម្ពុជា។ ឯកឧត្តមថា រាជរដ្ឋាភិបាល ​ក្រោមការដឹកនាំរបស់គណបក្សប្រជាជនកម្ពុជា គឺមិនទុកឱ្យ​ពលរដ្ឋ​ណាម្នាក់រស់​នៅដោយមិនទទួលបានការយកចិត្តទុកដាក់នោះទេ។ ជាពិសេសគឺក្នុងពេលបច្ចុប្បន្ន ដែលរាជរដ្ឋាភិបាលបានដាក់ឱ្យអនុវត្តនូវកម្មវិធីជំនួយសង្គមជាច្រើន ដើម្បីជួយដល់គ្រួសារក្រីក្រ និងងាយរងគ្រោះទូទាំងប្រទេស។

ឯកឧត្តម បញ្ជាក់ថា កម្មវិធីសាច់ប្រាក់ជួយដល់គ្រួសារក្រីក្រកំឡុងពេលប្រយុទ្ធប្រឆាំងកូវីដ-១៩ ជាកម្មវិធីដ៏ធំ ជាប្រវត្តសាស្រ្តរបស់កម្ពុជា ដែលផ្ដល់សាច់ប្រាក់ជាប្រចាំខែ និងបានជួយសម្រួល​ជីវភាពគ្រួសារក្រីក្រទូទាំងប្រទេស។

ក្នុងនាមជាក្រុមការងារមួយរូប នៃគណបក្សប្រជាជនកម្ពុជា ឯកឧត្តម បានបញ្ជាក់ទៅពលរដ្ឋទាំង​អស់ ត្រូវពិនិត្យរៀបចំឯកសារសម្រាប់ចូលរួម​ការបោះឆ្នោតជ្រើសរើសតំណាង​រាស្រ្ត​នាពេល​ខាងមុខ។ ឯកឧត្តមលើកឡើងថា សន្លឹកឆ្នោតមួយសន្លឹក គឺមានតម្លៃណាស់។ ការបោះឆ្នោត​ជូន​គណបក្សប្រជាជនកម្ពុជា ជាការបោះឆ្នោតដើម្បីខ្លួនឯង ជាការបោះឆ្នោតដើម្បី​ប្រទេសជាតិ។

សម្រាប់ប្រជាពលរដ្ឋដែលបានមកទទួលអំណោយ ​ក៏បានសម្ដែងភាពសប្បាយចិត្ត និងដឹងគុណ​ដល់គណបក្រប្រជាជនកម្ពុជាផងដែរ។ ពួកគាត់លើកឡើងថា ​គ​ណបក្សប្រជាជនកម្ពុជា តែងភ្ជាប់​ជាមួយទង្វើ តែងជួយគ្រប់ពលរដ្ឋ ពិសេសពលរដ្ឋក្រីក្រដូចពួកគាត់។

បន្ទាប់ពីបញ្ចប់ការផ្ដល់អំណោយជូន ដល់គ្រួសារក្រីក្រ ក្រុមការងារគណបក្សប្រជាជនកម្ពុជា ចុះជួយឃុំ កណ្ដោលជ្រុំ ស្រុកពញាក្រែក​ ក៏បានបន្តទៅចូលរួម​សម្ពោធ​សាលាមតេយ្យសហគមន៍ ភូមិព្រះអណ្ដូង ផងដែរ។ ​ជាក់ស្ដែងសាលាមតេយ្យសហគមន៍នេះ គឺមានកុមារតូចៗជិត ៥០នាក់​កំពុងសិក្សា៕ អត្ថបទ៖ គឹមហុក