ភ្នំពេញ៖ នៅព្រឹកថ្ងៃទី២៦ ខែកុម្ភៈ ឆ្នាំ២០២៣នេះ វេជ្ជបណ្ឌិត ស៊ឹម សុខចាន់ ទទួលបន្ទុក​ដឹកនាំ​បេសកកម្មសុខភាព សហគមន៍ នៃសមាគម TYDA បានដឹកនាំក្រុមការងារ ចុះពិនិត្យព្យាបាល​ជំងឺទូទៅ និងសុខភាពមាត់ធ្មេញ ជូនដល់ប្រជាពលរដ្ឋ ស្ថិតនៅក្នុងសង្កាត់និរោធន៍ ខណ្ឌច្បារអំពៅ រាជធានីភ្នំពេញ។

ក្នុងឱកាសនោះលោកវេជ្ជបណ្ឌិត ស៊ឹម សុខចាន់ មានប្រសាសន៍ថា សម្ដេចតេជោ ហ៊ុន សែន និង​សម្ដេចកិត្តិព្រឹទ្ធបណ្ឌិត តែងតែយកចិត្តទុកដាក់គិតគូរអំពីសុខភាពរបស់ប្រជាពលរដ្ឋ តាមរយៈការ​បង្ខិតសេវាព្យាបាល ជូនប្រជាពលរដ្ឋដោយឥតគិតថ្លៃ។

លោកបន្តថា កន្លងមកសមាគមគ្រូពេទ្យស្ម័គ្រចិត្ត យុវជនសម្ដេចតេជោTYDA បានចុះព្យាបាលជូន​ប្រជាពលរដ្ឋនៅតាមបណ្ដាខេត្ត សហគមន៍ អង្គការ មជ្ឈមណ្ឌលកុមារកំព្រា និងសាលារៀន​ជា​ច្រើន​នៅក្នុងប្រទេសកម្ពុជា។

លោកវេជ្ជបណ្ឌិត បានបញ្ជាក់ថា សកម្មភាពមនុស្សធម៌ ក្នុងការចុះពិនិត្យព្យាបាលដល់​ប្រជាពលរដ្ឋ​នេះ គឺធ្វើឡើងដោយបេះដូង ដោយទឹកចិត្ត និងស្នាមញញឹម របស់ក្រុមគ្រូពេទ្យ កម្លាំងស្ម័គ្រចិត្ត និង​ក្រុមការងារ ដោយមិនប្រកាន់ពីនិន្នាការនយោបាយណាមួយឡើយ។

សូមបញ្ជាក់ថា តាមរបាយការណ៍ចុះពិនិត្យ និងព្យាបាលថ្ងៃនេះក្រុមការងារគ្រូពេទ្យ និងកម្លាំង​ស្ម័គ្រចិត្ត នៃសមាគម TYDA ព្យាបាលអ្នកជំងឺបានចំនួន ២៣០៦នាក់ ក្នុងនោះមានករណី​បញ្ជូន​បន្តមកព្យាបាលនៅតាមមន្ទីរពេទ្យមានចំនួន​ ៤០ករណី ដែលការចំណាយទាំងអស់ ក្រោមការ​ឧបត្ថម្ភ​ដ៏ថ្លៃថ្លារបស់សម្ដេចតេជោ ហ៊ុន សែន​ និងសម្ដេចកិតិ្តព្រឹទ្ធបណ្ឌិត ប៊ុន រ៉ានី ហ៊ុនសែន៕