ក្រចេះ៖ លោកឧត្តមសេនីយ៍ទោ គីម សុផារុន អគ្គលេខាធិការរងសមាគមអតីតយុទ្ធជនកម្ពុជា ថ្លែងថា រាជរដ្ឋាភិបាល តាមរយៈសមាគមអតីតយុទ្ធជនកម្ពុជា នឹងបន្តលើកកម្ពស់​ជីវភាព​រស់​នៅ​របស់​អតីត​យុទ្ធជនគ្រប់រូបឱ្យកាន់តែល្អប្រសើរ។

ការថ្លែងយ៉ាងដូច្នេះធ្វើឡើងនៅថ្ងៃទី២៧ ខែកុម្ភៈ ឆ្នាំ២០២៣ ក្នុងឱកាសលោកឧត្តមសេនីយ៍ទោ គីម សុផារុន អគ្គលេខាធិការរងសមាគមអតីតយុទ្ធជនកម្ពុជា អញ្ជើញដឹកនាំ​កិច្ច​ប្រជុំ​ពិនិត្យ​ការងារ​បូកសរុបប្រចាំឆ្នាំ និងលើកទិសដៅអនុវត្តបន្តរបស់សមាគមអតីតយុទ្ធជនខេត្តក្រចេះ។ នាឱកាសនោះ លោកឧត្តមសេនីយ៍ទោ គីម សុផារុន បានពាំនាំយក នូវសេចក្តីនឹករឭក និង​ការ​សាក​សួរសុខទុក្ខ ពីសម្ដេចអគ្គមហា សេនាបតីតេជោហ៊ុនសែន នាយករដ្ឋមន្ត្រី នៃព្រះ​រាជា​ណា​ចក្រ​ក​ម្ពុជា និងសម្តេចកិត្តិព្រឹទ្ធបណ្ឌិត ដែលតែងតែយកចិត្តទុកដាក់ និងនឹក​រលឹក​មក​ដល់​អតីត​យុទ្ធជន​គ្រប់រូប គ្រប់ពេលវេលា ទោះបីស្ថិតក្នុងកាលៈទេសៈណាក៏ដោយ។

លោកឧត្តមសេនីយ៍ទោ គីម សុផារុន មានប្រសាសន៍ថា អ្វីៗដែលសមាជិក​អតីត​យុទ្ធជន​កម្ពុជា​ទទួល​បាន​ដូចសព្វថ្ងៃនេះ គឺដោយសារកម្ពុជាមានសន្តិភាពក្រោមការដឹកនាំ និងដឹងគុណ​ចំពោះ​សម្តេច​តេជោ ហ៊ុន សែន ដែលជាស្ថាបនិកសន្តិភាព។ លោកឧត្តមសេនីយ៍ទោ គីម សុផារុន​បញ្ជាក់​ថា រាជរដ្ឋាភិបាលតាមរយៈសមាគមអតីតយុទ្ធជនកម្ពុជា ពិសេសថ្នាក់​ដឹកនាំ​សមាគម​គ្រប់​ថ្នាក់ ត្រូវបន្តការចុះសួរសុខទុក្ខអតីតយុទ្ធជន ដើម្បីស្វែងយល់ពីស្ថានភាពជីវភាព ដោយ​បន្ត​លើក​កម្ពស់​ជីវភាពរស់នៅរបស់អតីតយុទ្ធជនគ្រប់រូបឱ្យកាន់តែល្អប្រសើរ និងត្រូវមាន​វិធានការ​ជួយ​ពួក​គាត់​ពេល​មានបញ្ហាឱ្យទាន់ពេលវេលា។

លោកឧត្តមសេនីយ៍ទោ គីម សុផារុន គូសបញ្ជាក់ថា ដើម្បីឆ្លើយតបទៅនឹងការលំបាក និងលើក​ស្ទួយ​ជីវភាព​របស់អតីតយុទ្ធជន ជារៀងរាល់ឆ្នាំ សម្តេចតេជោ ហ៊ុន សែន នាយករដ្ឋមន្រ្តី និងជា​ប្រធាន​សមាគមអតីតយុទ្ធជនកម្ពុជា បានណែនាំឱ្យបន្តសកម្មភាពដំណើរការសាងសង់ផ្ទះ និង​រៀប​ចំ​ដីសម្បទានសង្គមកិច្ចសម្រាប់ចែកជូនអតីតយុទ្ធជនក្រីក្រជាបន្តបន្ទាប់ ខណៈ​នា​ពេល​ខាង​មុខ រាជរដ្ឋាភិបាលនឹងសាង​សង់​ផ្ទះចំ​នួន​ជាង​៣០០​ខ្នង​បន្ថែម​ទៀត​ដល់​កង​កម្លាំង​ការពារ​ព្រំដែន​នៅ​ខេត្តត្បូ​ងឃ្មុំ និងខេត្តស្វាយរៀង។

ទន្ទឹមគ្នានេះ លោកឧត្តមសេនីយ៍ទោ គីម សុផារុន ក៏បានជំរុញ​ឱ្យថ្នាក់​ដឹកនាំ​សមាគម​គ្រប់​ថ្នាក់​ត្រូវ​បន្ត​យកចិត្តទុកដាក់ដល់អតីតយុទ្ធជនដែលកំពុងរស់នៅតាមឃុំសង្កាត់ ដោយត្រូវ​បែង​ចែក​ភារកិច្ច​គ្នា​ចុះជួបសំណេះសំណាល ផ្សារភ្ជាប់ទំនាក់​ទំនង​ឱ្យ​កាន់​តែ​ជិត​ស្និទ្ធ​ជា​មួយ​បង​ប្អូន​តាម​គ្រួសារ តាមខ្នងផ្ទះនីមួយៗ៕