ភ្នំពេញ៖ ក្រុមប្រឹក្សាយុវជនគ្រឹះស្ថានឧត្តមសិក្សា ហៅកាត់ថា ក.យ.គ នៃសហភាពសហព័ន្ធយុវជនកម្ពុជា (ស.ស.យ.ក) កាលពីឆ្នាំ២០២២ ទទួលបាននូវអាហារូបករណ៍ពីតាមគ្រឹះស្ថានអប់រំនានា ប្រមាណ៩៥០កន្លែង សម្រាប់ផ្ដល់ដល់សិស្សនិស្សិត បានសិក្សារៀនសូត្រ ។

ក្នុងពិធីបើកសន្និបាតបូកសរុបលទ្ធផលការងារ ឆ្នាំ២០២២ និងលើកទិសដៅការងារ ឆ្នាំ ២០២៣ ក.យ.គ នាថ្ងៃទី២៨ ខែកុម្ភៈ ឆ្នាំ២០២៣ ឯកឧត្តម ឯក មនោសែន អនុប្រធាន ក.យ.គ បានលើកឡើងថា នៅឆ្នាំ២០២២ ក្រុមយុវជន ស.ស.យ.ក ប្រចាំគ្រឹះស្ថានឧត្តមសិក្សារដ្ឋ និងឯកជនទាំងអស់ បានធ្វើកិច្ចសហការគ្នាបានយ៉ាងល្អ និងខិតខំបំពេញភារកិច្ចប្រកបដោយ ការទទួលខុសត្រូវ ការប្ដេជ្ញាចិត្ត និងមានឆន្ទៈមោះមុត សម្រេចបាននូវលទ្ធផល​ល្អតាមផែនការកំណត់ ។

ឯកឧត្តម បានបន្តថា ដោយនៅឆ្នាំ២០២២ ក្រុមប្រឹក្សាយុវជនគ្រឹះស្ថានឧត្តមសិក្សា បានទទួល​អាហារូបករណ៍ពី២៩គ្រឹះស្ថានឧត្តមសិក្សា សម្រាប់ថ្នាក់បរិញ្ញាបត្រជាន់ខ្ពស់ បរិញ្ញាបត្រ និងបរិញ្ញាបត្ររង សរុបចំនួន ៩៥០កន្លែង ។

ក្នុងឱកាសនោះ ឯកឧត្តម ស សុខា អនុប្រធាន ស.ស.យ.ក និងជាប្រធានក្រុមប្រឹក្សាយុវជន​គ្រឹះស្ថានឧត្តមសិក្សាកម្ពុជា មានប្រសាសន៍ថា ក.យ.គ កំពុងបន្តអនុវត្តសកម្មភាព​របស់ខ្លួន​យ៉ាងសកម្មក្នុងក្របខណ្ឌគ្រឹះស្ថានឧត្តមសិក្សារដ្ឋ និងឯកជន ក្នុងគោលដៅកៀរគរកម្លាំងយុវជន ជានិស្សិតឱ្យចូលរួមក្នុងសកម្មភាពនានា និងចូលជាសមាជិករបស់ ស.ស.យ.ក.បន្ថែមទៀត ព្រមទាំងលើកកម្ពស់សមត្ថភាព អប់រំសីលធម៌ បណ្ដុះស្មារតីយុវជនឱ្យស្រឡាញ់ជាតិ ស្រឡាញ់សន្តិភាព គាំទ្រលើគោលនយោបាយ និងការដឹកនាំរបស់រាជរដ្ឋាភិបាល ។

ឯកឧត្តម បានបន្តថា ក.យ.គ បង្កើតដំបូងនាឆ្នាំ២០២១ ក្នុងអំឡុងការឆ្លងរីករាលដាលនៃជំងឺកូវីដ-១៩ ក៏ពិតមែន ប៉ុន្តែបានឈរលើស្មារតីទទួលខុសត្រូវ និងការប្តេជ្ញាចិត្តខ្ពស់ ដោយរិះរកគ្រប់​មធ្យោបាយ ដើម្បីបំពេញភារកិច្ចសម្រេចជោគជ័យគួរឱ្យកត់សម្គាល់ ខណៈនៅឆ្នាំ២០២២ សម្រេចបាននូវបំពេញបេសកកម្មជាង ៨១ភាគរយ នៃផែនការសកម្មភាពប្រចាំឆ្នាំ និងសូមថ្លែង​អំណរគុណ ដល់សមាជិកទាំងអស់ ដែលបានចូលរួមជាថវិកាសរុបជាច្រើនលានដុល្លារ ជួយគាំទ្រលើកស្ទួយវិស័យអប់រំ និងអភិវឌ្ឍធនធានមនុស្សនៅក្នុងប្រទេសកម្ពុជា ។

សូមបញ្ជាក់ថា សន្និបាតបូកសរុបលទ្ធផលការងារឆ្នាំ២០២២ និងលើកទិសដៅការងារឆ្នាំ២០២៣ របស់ ក.យ.គ. មានគោលបំណងត្រួតពិនិត្យ និងវាយតម្លៃលើលទ្ធផលការងារសម្រេចបាន ចំណុចខ្លាំង បញ្ហាប្រឈម ដំណោះស្រាយ ព្រមទាំងដាក់ចេញនូវទិសដៅការងារបន្ត ។ គិតត្រឹមដំណាច់ខែធ្នូ ឆ្នាំ២០២២ ក.យ.គ. បានបញ្ចូលសមាជិកភាព តាម UYFC App សរុបចំនួន ៣៣ ៩៣៤នាក់ ហើយនៅរសៀលថ្ងៃទី២៨ ខែកុម្ភៈ ឆ្នាំ២០២៣នេះ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា នឹងអញ្ជើញជាធិបតីក្នុងពិធីបិទសន្និបាត ៕អត្ថបទ បាន សុខរិទ្ធិ