ភ្នំពេញ៖ គិតមកដល់ថ្ងៃទី២៨ ខែកុម្ភៈនេះ សហភាពសហព័ន្ធយុវជនកម្ពុជា បានទទួលយុវជន ភ្ញៀវបរទេស និងជនមានពិការភាពមានសមត្ថភាពផ្សេងៗគ្នា បានដាក់ពាក្យស្នើសុំធ្វើការងារ​ស្ម័គ្រចិត្ត​រៀបចំព្រឹត្តិការណ៍កីឡា SEA GAMES លើកទី៣២ និងASEAN PARA GAMES ឆ្នាំ២០២៣ បានកើនឡើងដល់៧៧០០នាក់ ​ខណៈនៅព្រឹត្តិការណ៍SEA GAMES២០២៣នេះ មានតម្រូវការយុវជនស្ម័គ្រចិត្តចូលបំរើការចំនួន ៧០០០នាក់។

បើតាមភ្ញៀវបរទេស មកពីសហរដ្ឋអាមេរិក ម៉ាឡេស៊ី និងជប៉ុនជាដើម បានថ្លែងប្រាប់BTV ថា បន្ទាប់ពីយើងបានដាក់ពាក្យស្នើសុំធ្វើការងារស្ម័គ្រចិត្តចូលរួមជួយរៀបចំព្រឹត្តិការណ៍កីឡាSEA GAMES ​ដែលកម្ពុជាធ្វើជាម្ចាស់រៀបចំជាលើកដំបូងឡើងវិញនេះ ​នៅថ្ងៃនេះ យើងនាំគ្នា​មកធ្វើ​បទសំភាសន៍​ផ្ទាល់ដើម្បីទទួលបានការធ្វើការងារស្ម័គ្រចិត្តជាមួយក្រុមយុវជន​ដែលជាកូនខ្មែរចង់​ជួយប្រទេសគេរៀបចំ SEA GAMES និងASEAN PARA GAMES។

យុវនារីមានពិការភាពក៏ បានថ្លែងថា យើងមានការសប្បាយចិត្តខ្លាំងណាស់ដែលសហភាព​សហព័ន្ធយុវជន​កម្ពុជា បានផ្តល់ឱកាសដូចៗជូនយុវជនក្នុងស្រុក ​ក្រៅស្រុក ជនមានពិការភាព និង​ភ្ញៀវបេរទេស គឺមានឱកាសទទួលបានការងារ ​ជាអ្នកធ្វើការស្ម័គ្រចិត្តក្នុងព្រឹត្តិការណ៍ SEA GAMES និង​អាស៊ានប៉ារ៉ាហ្គេម ឆ្នាំ២០២៣ ដើម្បីជួយប្រទេសជាតិ បង្កើនភាពទាក់ទាញ និងផ្តល់​បដិសណ្ឋារកិច្ចល្អជូនភ្ញៀវអន្តរជាតិទស្សនាឲ្យមានភាពកក់ក្តៅ។

លោកស្រី គីម សំណាង តំណាងក្រុមការងារសហភាពសហព័ន្ធយុវជនកម្ពុជា បានឲ្យដឹងថា ព្រឹត្តិការណ៍កីឡា SEA GAMES និងPARA Games២០២៣ មានតម្រូវការជ្រើសរើស​យុវជនស្ម័គ្រចិត្ត​ចូលបម្រើការចំនួន៧០០០នាក់ ហើយគិតត្រឹមព្រឹកថ្ងៃទី២៨ ​ខែកុម្ភៈ ឆ្នាំ២០២៣នេះ មាន​ក្រុមយុវជនក្នុងប្រទេស ​និងភ្ញៀវបរទេស បានចុះឈ្មោះសំភាសន៍ចូលបំរើការងារស្ម័គ្រចិត្ត មាន​ប្រមាណ ៧៧០០នាក់ ក្នុងនោះ មានភ្ញៀវបរទេសជិត ១៣០នាក់ យុវជនមានពិការភាព​ចំនួនជាង៤០រូប។

លោកស្រី គីម សំណាង ថ្លែងថា មកដល់ពេលនេះ ​ក្រុមការងារសហភាពសហព័ន្ធយុវជនកម្ពុជា បាន​ធ្វើសំភាសន៍ជ្រើសរើសអ្នកស្ម័គ្រចិត្តបានប្រមាណ៤៥០០នាក់ ខណៈការចុះឈ្មោះផ្តល់​បទសំភាសន៍​នឹងត្រូវបិទនៅថ្ងៃទី១ ខែមីនា ​និងបិទការទទួលសំភាសន៍នៅថ្ងៃទី៥ ខែមីនា ឆ្នាំ២០២២៕ អត្ថបទ ស៊ុម សុខជា