ភ្នំពេញ ៖ កាលពីព្រឹកថ្ងៃទី២៧ ខែកុម្ភៈ ឆ្នាំ២០២៣ លោកជំទាវកិត្តិសង្គហបណ្ឌិត ឃួន សុដារី អនុប្រធានកាក បាទក្រហមកម្ពុជា និងជាប្រធានក្រុមការងារឥស្សរជនឆ្នើមថ្នាក់ជាតិតំណាងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងជាឥស្សរជនឆ្នើមថ្នាក់ជាតិ នៃវេទិកាភាពជាអ្នកដឹកនាំ​តំបន់អាស៊ី-ប៉ាស៊ីហ្វិក ឆ្លើយតបមេរោគអេដស៍ ជំងឺអេដស៍ និងការអភិវឌ្ឍនៅកម្ពុជា និងជាឥស្សរជន​ឆ្នើមថ្នាក់ជាតិ នៃផែនការសកម្មភាពរួមអគ្គលេខាធិការអង្គការសហប្រជាជាតិ ដើម្បីសុខភាពស្ត្រី និងកុមារ បានអញ្ជើញ​ទទួលជួបសវនាការជាមួយលោកស្រី ប៉ាទ្រីស៊ីយ៉ា អុងពីន នាយិកាអង្គការយូអិនអេដស៍ប្រចាំនៅកម្ពុជា(UNAIDS) ដែលជំនួបនេះបានប្រព្រឹត្តទៅនៅទីស្នាក់ការកណ្តាលកាកបាទក្រហមកម្ពុជា។

ក្នុងជំនួបនេះ ភាគីទាំង២ បានលើកឡើងពីបញ្ហា នៃការរើសអើងចំពោះអ្នកផ្ទុកមេរោគអេដស៍ ដែលមក​ទល់​បច្ចុប្បន្ន​មានប្រមាណ២%ប៉ុណ្ណោះ ហើយក្នុងចំណោមនេះ ភាគច្រើនគឺជាអ្នកផ្ទុកមេរោគអេដស៍ខ្លួនឯង ដែលមាន​ការ​រើសអើង​ចំពោះខ្លួនឯង។ បញ្ហាប្រឈមមួយចំនួនទៀត ដែលបានលើកឡើងក្នុងកិច្ចពិភាក្សានេះដែរ គឺបញ្ហាដែល​កំពុងតែកើតមានឡើងទៅលើក្រុមប្រឈមខ្ពស់ទាំង៤, បញ្ហាដែ លអ្នកផ្ទុកមេរោគអេដស៍ មិនព្រមទៅ​ទទួល​យកឱសថប្រឆាំងមេរោគអេដស៍ ក៏ដូចជាការកើនឡើងនូវអត្រាឆ្លងមេរោគអេដស៍ ពីម្តាយទៅទារក ដោយសារ​តែវិបត្តិនៃជំងឺកូវីដ-១៩។ ហេតុដូចនេះអ្វីដែលជាការគិតគូររួមគ្នារវាងកាកបាទក្រហមកម្ពុជា ក្រុមការងារឥស្សរជន​ឆ្នើមថ្នាក់ជាតិ និងអង្គការយូអិនអេដស៍ គឺត្រូវបន្តលើកកម្ពស់ការអប់រំផ្សព្វផ្សាយ និងគិតគូរដល់ទារក/កុមារ ដែលកើតមកហើយមានផ្ទុកមេរោគអេដស៍នោះ បានទទួលការព្យាបាលដោយឱសថប្រឆាំងមេរោគអេដស៍។

លោកជំទាវកិត្តិសង្គហបណ្ឌិត ក៏បានជម្រាបជូនលោកស្រីនាយិកាអង្គការយូអិនអេដស៍ ពីយន្តការ​ក្រុមការងារ​ឥស្សរជនឆ្នើមថ្នាក់ជាតិ ដែលបានរៀបចំឡើង និងកែសម្រួលឡើងវិញនៅឆ្នាំ២០១៩ ហើ យបានគ្របដណ្តប់​ទៅ​ដល់សាខាទាំង២៥រាជធានី-ខេត្តនៅឆ្នាំ២០២០ ដែលបាននិងកំពុងអនុវត្តការងា រអប់រំផ្សព្វផ្សាយទូលំទូលាយ បាន​ទៅដល់សហគមន៍ ដែលក្នុងចំណុចនេះ លោកជំទាវកិត្តិសង្គហប ណ្ឌិត បានគូសបញ្ជាក់ថា ជារៀងរាល់ឆ្នាំ សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន តែងតែផ្ញើសារលិខិតផ្ញើជូនបងប្អូនជនរួមជាតិ ក្នុងឱកាសទិវា​ជាតិ​សុខភាព​មាតា ទារក និងកុមារ ២១ កុម្ភៈ, ទិវាឆ្មបជាតិ-អន្តរជាតិ ៥ ឧសភា និងទិវាពិភពលោកប្រយុទ្ធនឹងជំងឺអេដស៍ ១ ធ្នូ។

ក្នុងឱកាសនោះលោកស្រី ប៉ាទ្រីស៊ីយ៉ា អុងពីន បានបញ្ជាក់ថា ក្នុងនាមជាអ្នកដឹកនាំមួយរូប, សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន គឺមានភាពឈ្លាសវៃ និងមានទស្សនវិស័យខ្ពស់ ក្នុងការចូលរួមប ញ្ចប់វិសមភាព នៃការទទួល​សេវា ដែលក្នុងន័យនេះកម្ពុជាបានធ្វើឱ្យសេវា នៃការទទួលបានការព្យា បាលនេះ មិនស្ថិតនៅតែក្នុងទី​ក្រុងនោះ​ឡើយ គឺបានរីកសាយគ្របដណ្តប់រហូតទៅដល់សហគមន៍។ លោកស្រីក៏បានចាប់អារម្មណ៍ចំពោះការពង្រឹង និងពង្រីកការអប់រំផ្សព្វផ្សាយ ពីការទប់ស្កាត់មេរោគអេដស៍ ជំងឺអេដស៍នេះ ឱ្យបានស៊ីជម្រៅ និងទូលំទូលាយ​ដល់​ចំណោមក្រុមប្រឈមខ្ពស់ទាំ៤ គឺយុវវ័យ យុវជន និងនិស្សិត នៅតាមសាកលវិទ្យាល័យ ដោយសារការ​យល់ដឹង​របស់យុវជនបច្ចុប្បន្ននេះ មានការធ្លាក់ចុះដោយសារវិបត្តិជំងឺ-១៩ ហើយនេះគឺជាចំណុចត្រូវយកចិត្តទុកដាក់រួមគ្នា។

លោកស្រីក៏បានលើកឡើងដែរថា ក្នុងរយៈពេល៤ឆ្នាំនៃអាណត្តិរបស់លោកស្រី ជានាយិកាអង្គការយូអិនអេដស៍​នៅកម្ពុជា លោកស្រី មានសង្ឃឹមជឿជាក់ថា ភាគីទាំងពីរនឹងបន្តពង្រឹងកិច្ចសហប្រតិបត្តិការ បន្តប្រឹងប្រែងរួមគ្នាក្នុង​ការដោះស្រាយបញ្ហាសកលរួមទាំងការទប់ស្កាត់ការចម្លងមេរោគអេដស៍ ជំងឺអេដស៍ និងជំងឺកូវីដ-១៩ ដែលមិនទាន់​ទៅណាឆ្ងាយពីមនុស្សជាតិយើងដែរ៕ អត្ថបទ ៖ សំ ងីម​