ភ្នំពេញ៖ ក្រសួងការបរទេស និងសហប្រតិបត្តិការអន្តរជាតិកម្ពុជា តាមរយៈស្ថានទូត និងកុងស៊ុលប្រចាំនៅប្រទេសនានា ក្នុងឆ្នាំ២០២២ ​បានជួយអន្តរាគមន៍សង្គ្រោះពលរដ្ឋខ្មែរ ដែលបាន​រងគ្រោះដោយអំពើផ្សេងៗ នៅក្រៅប្រទេស ប្រមាណជិត ៨ពាន់ ឲ្យបានវិលត្រឡប់​មកប្រទេសកំណើតវិញ ។

ក្នុងសន្និបាទបូកសរុបលទ្ធផលការងារ ឆ្នាំ២០២២ និងលើកទិសដៅការងារ ឆ្នាំ២០២៣ របស់​ក្រសួងការបរទេស និងសហប្រតិបត្តិការអន្តរជាតិកម្ពុជា នៅថ្ងៃទី១ ខែមីនា នេះ ឯកឧត្តម អ៊ុច បូររិទ្ធ រដ្ឋលេខាធិការក្រសួង ​បានឱ្យដឹងថា ឆ្នាំ២០២២ ក្រសួង បានផ្ដោតលើការដ្ឋានធំៗចំនួន៥ ក្នុងនោះ ទី១. ការការពារឯករាជ្យ អធិបតេយ្យ កិត្តិយស និងសេចក្តីថ្លៃថ្នូរជាតិ, ទី២. ការការពារបូរណភាព​ទឹកដីកម្ពុជា, ទី៣. ការការពារផលប្រយោជន៍ពលរដ្ឋខ្មែរ នៅបរទេស, ទី៤. ទំនាក់ទំនងទ្វេភាគី និងទី៥. ទំនាក់ទំនងពហុភាគី ។

ឯកឧត្តម បានបន្តថា ចំពោះការងារការការពារផលប្រយោជន៍ពលរដ្ឋ ក្រសួងបានផ្ដល់ការគាំទ្រ គាំពារ ជួយសង្គ្រោះ និងសម្របសម្រួលមាតុភូមិនិវត្តន៍ដល់ពលរដ្ឋខ្មែរ ដែលរងគ្រោះដោយការ​រំលោភ​សិទ្ធិសេរីភាពនៅបរទេស និងអំពើជួញដូរមនុស្ស ចំនួន៧៩៥៣នាក់ ​ក្នុងប្រទេសថៃ ឡាវ វៀតណាម ម៉ាឡេស៊ី ចិន ឥណ្ឌូនេស៊ី មីយ៉ាន់ម៉ា និងសិង្ហបុរី ។

ឯកឧត្តម បានបន្ថែមថា លើសពីនេះ ស្ថានតំណាងកម្ពុជាប្រចាំនៅបរទេស បានយកចិត្តទុកដាក់​ខ្ពស់ ក្នុងការប្រាស្រ័យទាក់ទងជាមួយពលរដ្ឋកម្ពុជារស់នៅជាបរទេស ដូចជា អាមេរិក បារាំង អឺរ៉ុប និងអូស្ត្រាលី ក៏ដូចជាសម្របសម្រួលដល់សេចក្តីត្រូវការរបស់ប្រជាពលរដ្ឋ សិស្ស និស្សិត ពលករ ដែលកំពុងរស់នៅ ធ្វើការ និងសិក្សានៅបរទេស រួមមាន៖ ការផ្ដល់សេវារដ្ឋបាល កុងស៊ុល និងការឧបត្ថម្ភគាំពារផ្សេងៗ ៕អត្ថបទ៖ បាន សុខរិទ្ធិ