បន្ទាយមានជ័យ៖ នៅថ្ងៃទី២ ខែមីនា ឆ្នាំ២០២៣ ឯកឧត្តម ព្រំ សុភមង្គល អនុប្រធាន​អាជ្ញាធរ​មីន​កម្ពុជា រួមជាមួយឯកឧត្តម អ៊ុំ រាត្រី អភិបាលខេត្តបន្ទាយមានជ័យ​ និង​លោកជំទាវ​ឯក​អគ្គរដ្ឋ​ទូត​ឥណ្ឌា​ប្រចាំកម្ពុជា​ បានអញ្ជើញក្នុងពិធីបើកយុទ្ធនាការ​ «ឥណ្ឌា​ដើម្បីមនុស្សជាតិ​» ជំរុំផលិត និង​ផ្តល់ដៃ​ ជើង​ សិប្បនិម្មិតជូនជនមានពិការភាពចំនួន ៦០០នាក់ នៅក្នុងខេត្តបន្ទាយមានជ័យ​ ធ្វើ​ឡើងនៅវិទ្យាស្ថានពហុបច្ចេកទេស ស្ថិតនៅភូមិកងវ៉ា​ សង្កាត់​កំពង់ស្វាយ​ ក្រុងសិរីសោភ័ណ​។

ក្នុងនាមរដ្ឋបាលខេត្តបន្ទាយមានជ័យ ឯកឧត្តម អ៊ុំ រាត្រី បានថ្លែង​អំណរ​គុណ​យ៉ាង​ជ្រាល​ជ្រៅ​ដល់​ភាគី​ឥណ្ឌាដែលបានផ្តួចផ្តើមយុទ្ធនាការនេះឡើង ដែល​ជា​ការ​រួម​ចំណែក​ជាមួ​យ​រាជ​រដ្ឋាភិបាល​ក្នុង​ការគិតគូរពីជីវភាពរស់នៅរបស់ជនមានពិការភាព។ ឯកឧត្តម អ៊ុំ រាត្រី ថ្លែងថា ការ​ផ្តល់​ដៃ និងជើងសិប្បនិម្មិតនេះ ជាការគាំទ្រ និងលើកកម្ពស់សិទ្ធិស្មើភាពរបស់ជនមានពិការភាព ដែល​ពួកគាត់ត្រូវទទួលបានសិទ្ធិរស់រានដូចប្រជាពលរដ្ឋធម្មតា។

ឯកឧត្តម អ៊ុំ រាត្រី បញ្ជាក់ទៀតថា ពីមួយឆ្នាំទៅមួយឆ្នាំ រាជរដ្ឋាភិបាល​តែង​តែ​ជំរុញ​រាល់​សកម្មភាព​ទាំង​ឡាយ​ណាសំ​ដៅដ​ល់ការគាំពារជនមានពិការភាព ដើម្បីទទួលបានការលើកទឹកចិត្ត និងយក​ចិត្ត​ទុក​ដាក់ជាប់ជាប្រចាំ ដោយធ្វើយ៉ាងណាឲ្យពួកគាត់ទទួលបានសិទ្ធិពេញលេញ និង​មាន​ជីវភាព​ល្អប្រសើរ។

ឯកឧត្តម អ៊ុំ រាត្រី បានណែនាំដល់មន្ទីរជំនាញត្រូវបន្តតាមដានពីសុខទុក្ខ និង​ការ​រស់​នៅ​ប្រចាំ​ថ្ងៃ​របស់​ពួក​គាត់ ដើម្បីកាត់បន្ថយភាពរើសអើង និងភាពក្រីក្ររបស់ពួកគាត់៕ អត្ថបទ៖ ឧត្ដម