​បាល់ទាត់៖ ​លោក Just Fontaine ដែល​កាន់​កំណត់ត្រា​ស៊ុត​បញ្ចូល​ទី​ច្រើន​បំផុត​ក្នុង​មួយ​ព្រឹត្តិការណ៍ World Cup បានទទួល​មរណៈភាព​ហើយ​ក្នុង​វ័យ ៨៩ឆ្នាំ​។ ​​អតីត​ខ្សែប្រយុទ្ធ​បារាំង​រូបនេះបាន​ស៊ុត​បញ្ចូល​ទី ១៣គ្រាប់​ក្នុងចំណោម ៦ប្រកួត​តែ​ក្នុង​មួយ​ព្រឹត្តិការណ៍ World Cup 1958 នៅ​ប្រទេស​ស៊ុយអែត ដែល​បារាំង​នៅពេលនោះ​ទទួលបាន​ចំណាត់ថ្នាក់​លេខ៣​។

​​ក្រៅពី​កាន់​កំណត់ត្រា​នេះ​លោក Just Fontaine ក៏​ស្ថិតក្នុង​ចំណាត់ថ្នាក់​លេខ៤ អ្នក​ស៊ុត​បញ្ចូល​ទី​ច្រើន​បំផុត​នៅ World Cup សរុប​ស្មើគ្នា​ជាមួយ Lionel Messi ផងដែរ​។​ ​​ក្លិប​បាល់ទាត់ Stade de Reims និង Paris Saint Germain ដែលជា​ក្លិប​លោក​ធ្លាប់​ប្រកប​អាជីព ក៏ដូចជា​សហព័ន្ធ​បាល់ទាត់​បារាំងបានចេញ​សេចក្តី​ថ្លែង​ការណ៍ ​ពី​ការរំលែក​ទុក្ខ​ក្រុមគ្រួសារ​សព និង​សោកស្តាយ​ចំពោះ​ការបាត់បង់​វីរៈបុរស​បាល់ទាត់​បារាំង​មួយរូប​។​ ​​គ្រប់ការ​ប្រកួត​បាល់ទាត់​អាជីព​នៅក្នុង​ទឹកដី​បារាំង​ក្នុង​សប្តាហ៍​នេះ នឹងមាន​ការគោរព​វិញ្ញាណក្ខន្ធ​មុន​ការប្រកួត​។

​​សូមបញ្ជាក់ថា មាន​កីឡាករ​តែ​បីនាក់​ប៉ុណ្ណោះ​ដែល​ស៊ុត​បញ្ចូល​ទី​ច្រើន​បំផុត​នៅ World Cup ពីលើ​លោក Just Fontaine​។ ​​យ៉ាងណាក្តី​លោក Just Fontaine ជាប់​ជំរើសជាតិ​បារាំង​បង្ហាញខ្លួន​បាន​ត្រឹម ៣១លើក​ប៉ុណ្ណោះ​ចន្លោះ​ឆ្នាំ១៩៥៣ ដល់ ១៩៦០ តែ​ស៊ុត​បញ្ចូល​ទី​សរុប​បាន ៣០គ្រាប់​៕

​អត្ថបទ​៖​នាង សុភា​វុ​ធ