វ៉ូវីណាម៖ ក្រុមជម្រើសជាតិកីឡាវ៉ូវីណាមកម្ពុជា បានត្រៀមសំណើទៅគណៈកម្មាធិការជាតិអូឡាំពិកកម្ពុជា (NOCC) ដើម្បីស្នើសុំទៅគណៈកម្មាធិការជាតិអូឡាំពិកវៀតណាម ក្នុងការចេញទៅបោះជំរំហ្វឹកហាត់នៅប្រទេសវៀតណាម នាអំឡុងខែមិថុនាខាងមុខនេះដើម្បីពង្រឹងសមត្ថភាពកីឡាករ-កីឡាការិនីត្រៀមការប្រកួតកីឡាស៊ីហ្គេមលើកទី៣១ នាចុងឆ្នាំ២០២១ នេះនៅទីក្រុងហាណូយ។
ឯកឧត្តម អ៊ូ រតនា អគ្គលេខាធិការសហព័ន្ធបានបញ្ជាក់ថា អំឡុងពេលរីករាលដាលខ្លាំងនៃជំងឺកូវីដ-១៩ នេះ បានបង្កផលប៉ះពាល់ខ្លាំងដល់ការប្រមូលផ្ដុំហ្វឹកហាត់ របស់ក្រុមជម្រើសជាតិ ព្រោះកីឡាវ៉ូវីណាមទាមទារឲ្យមានការហ្វឹកហាត់ជុំគ្នា តែដោយគោរពតាមវិធានការរាជរដ្ឋាភិបាល និងក្រសួងសុខាភិបាល សហព័ន្ធបានតម្រូវឲ្យកីឡាករ-កីឡាការិនីធ្វើការហ្វឹកហាត់តាមផ្ទះ និងកន្លែងមានសុវត្ថិភាពរៀងៗខ្លួន។ ប៉ុន្តែដើម្បីពង្រឹងសមត្ថភាពរបស់ក្រុមជម្រើសជាតិ សហព័ន្ធបានត្រៀមសំណើទៅគណៈកម្មាធិការជាតិអូឡាំពិកកម្ពុជា ដើម្បីស្នើសុំទៅគណៈកម្មាធិការជាតិអូឡាំពិកវៀតណាម ក្នុងការបញ្ជូនកីឡាករ-កីឡាការិនីទៅហ្វឹកហាត់មុននាអំឡុងខែមិថុនាខាងមុខ ដើម្បីពង្រឹងគុណផលរបស់កីឡាករ-កីឡាការិនីម្នាក់ឲ្យកាន់តែមុតស្រួច និងកាន់តែជឿជាក់ក្នុងការប្រកួតប្រជែងមេដាយ ក្នុងព្រឹត្តិការណ៍ស៊ីហ្គេមចុងឆ្នាំនេះ ។
អគ្គលេខាធិការសហព័ន្ធដដែលបន្ដថា ដោយសារកីឡាវ៉ូវីណាមបានខកខានក្នុងការប្រកួតកីឡាស៊ីហ្គេម ៣លើកមកហើយ ពោលគឺស៊ីហ្គេមឆ្នាំ២០១៥ នៅសិង្ហបុរី, ឆ្នាំ២០១៧ នៅម៉ាឡេស៊ី និងឆ្នាំ២០១៩ នៅហ្វីលីពីន ដូច្នេះសម្រាប់ការដាក់ប្រភេទកីឡាវ៉ូវីណាម ក្នុងស៊ីហ្គេមឆ្នាំនេះគឺជាឱកាសស្វែងរកមេដាយជូនជាតិឡើងវិញ ហើយកីឡាករ-កីឡាការិនីក៏បានប្ដេជ្ញាចិត្តខ្ពស់សម្រាប់ការប្រកួតដ៏សំខាន់នេះដែរ។ គួរបញ្ជាក់ថា កីឡាវ៉ូវីណាមគឺជាប្រភេទកីឡាដ៏មានសក្ដានុពលមួយរបស់កម្ពុជា ដែលធ្លាប់ដណ្ដើមមេដាយអន្តរជាតិជាច្រើន ជាក់ស្ដែងក្នុងការប្រកួតកីឡាស៊ីហ្គេមចុងក្រោយរបស់ខ្លួនកាលពីឆ្នាំ២០១៣ នៅមីយ៉ាន់ម៉ា ពួកគេបានដណ្ដើមមេដាយមាស ២, ប្រាក់ ១ និងសំរឹទ្ធ ៧ ជូនជាតិ។ លើសពីនេះ ក្រុមកីឡាវ៉ូវីណាមកម្ពុជាក៏ធ្លាប់ដណ្ដើមមេដាយកម្រិតទ្វីប និងពិភពលោកជាច្រើនផងដែរ ពិសេសការធ្វើម្ចាស់ផ្ទះជើងឯកពិភពលោកកាលពីឆ្នាំ២០១៩ ក្នុងនាមម្ចាស់ផ្ទះ ក្រុមកីឡាវ៉ូវីណាមកម្ពុជាដណ្ដើមបានមេដាយមាស ៩, ប្រាក់ ១០ និងសំរឹទ្ធ ១២គ្រឿងឯណោះ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
