កំពង់ឆ្នាំង៖ នៅក្នុងទិវាសិទ្ធិនារី ០៨ មីនា ក្រោមប្រធានបទ «ស្ត្រីរួមគ្នា រក្សាសុខសន្តិភាព ដើម្បីកិច្ច​អភិវឌ្ឍ ក្នុងយុគសម័យឌីជីថល» នាព្រឹកថ្ងៃទី០៤ ខែមីនា ឆ្នាំ២០២៣នេះ លោកជំទាវ កែរ ច័ន្ទមុនី តំណាងរាស្ត្រមណ្ឌលកំពង់ឆ្នាំង បានជំរុញអោយ​យុវជន​ជំនាន់​ក្រោយ​ខិតខំ​ថែ​រក្សា​យ៉ាង​ម៉ត់ចត់ នូវសុខសន្តិភាព ស្ថេរភាពនយោបាយ និងការ​អភិវឌ្ឍ​ឥត​ឈប់​ឈរ​ជាមួយ​រាជ​រដ្ឋាភិបាល​ស្រប​ច្បាប់។

លោកជំទាវបានបន្តថា ឆ្លើយតបនឹងប្រធានបទនេះ យើងត្រូវរួមគ្នាបន្តលើកកម្ពស់ និងជំរុញ​ការ​អនុវត្ត​គោល​នយោបាយពង្រឹង សមភាពយេនឌ័ររបស់រាជរដ្ឋាភិបាល ដែលចាត់ទុក ស្រ្តីជា​ឆ្អឹង​ខ្នង​នៃ​ការ​អភិវឌ្ឍសេដ្ឋកិច្ច និងសង្គមជាតិ និងការងារបញ្ជ្រាបយេនឌ័រ ដែលជាកិច្ចការអន្តរវិស័យ ក្នុង​ការ​ធានា​បាននូវចីរភាព នៃសុខសន្តិភាព និងពន្លឿន ល្បឿននៃកិច្ចអភិវឌ្ឍជាតិ ជាពិសេសក្នុង​យុគ​សម័យ​ឌីជីថល និងការកសាងមូលដ្ឋានឆ្ពោះទៅសម្រេចចក្ខុវិស័យ កម្ពុជា​ជា​ប្រទេស​ដែល​មាន​ចំណូល​ខ្ពស់​នៅ​ឆ្នាំ២០៥០។ ក្នុងបរិការណ៍នេះ ការយកចិត្តទុកដាក់ និងការ​ពង្រឹង​សម​ភាព​យេន​ឌ័រ នៅតែបន្តជាកិច្ចការអាទិភាព ដើម្បីធានាថា ស្រ្តី និងក្មេង​ស្រី​គ្រប់​រូប​ទទួល​បាន​សមភាព​នៅ​ក្នុ​ង​គ្រប់ទិដ្ឋភាព ទៅនៅក្នុងវិស័យនយោបាយ សេដ្ឋកិច្ច និងសង្គមកិច្ច ព្រមទាំងអនុវត្តសិទ្ធិ ចូល​រួម​ដោយស្មើភាព ជាធនធានដ៏មានតម្លៃ និងជាដៃគូមិនអាចខ្វះបាន ជាមួយបុរស ក្នុង​ការ​អភិវឌ្ឍ​ប្រទេសជាតិ និងរស់នៅក្នុងសង្គម ដោយភាពថ្លៃថ្នូរ ជីវភាពល្អប្រសើរ និងប្រកប ដោយ​សុខុមាល​ភាព។

ការលើកកម្ពស់សេដ្ឋកិច្ចដែលគិតគូរសុខុមាលភាព ដោយផ្តោតការទទួលស្គាល់ និងឆ្លើយ​តប​នឹង​ការ ថែទាំមិនមានប្រាក់កម្រៃ រួមទាំងការងារដែលផ្តោតលើការថែរក្សាសុខុមាលភាពសង្គម និង​ការ​បង្កើន​ការវិនិយោគសាធារណៈលើវិស័យនេះ គឺជាសក្តានុពលថ្មីដ៏សំខាន់មួយ សម្រាប់​ការ​ឈាន​ទៅ​សម្រេច​សមភាពយេនឌ័រផង និង​ដើម្បី​ពង្រីក​វិសាលភាព នៃ​សេដ្ឋកិច្ច​ដែល​គិតគូរ​ទៅ​លើ​សុខុមាលភាពសង្គមផង៕ អត្ថបទ៖ ហុង វាស្នា