ភ្នំពេញ៖ មន្រ្តីជាន់ខ្ពស់នៃក្រសួងការងារ និងបណ្តុះបណ្តាលវិជ្ជាជីវៈ លើកឡើងថា យោង​តាម​របាយ​ការណ៍​របស់អង្គការអន្តរជាតិខាងការងារ (ILO) បានបង្ហាញថា ជារៀងរាល់ឆ្នាំ​មាន​កម្មករ​និយោជិត​ចំនួនប្រមាណជាង ៣លាននាក់ បានស្លាប់ដោយសារគ្រោះថ្នាក់ការងារ និងជំងឺវិជ្ជាជីវៈ និង​កម្មករនិយោជិត ៣៧៤លាននាក់បន្ថែមទៀត ទទួលរងពីគ្រោះថ្នាក់ការងារ ប៉ុន្តែ​មិន​បាត់បង់​ជីវិត​។

ឯកឧត្តម ចាប ឬទ្ធី រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ នៅក្នុង​ពិធី​បើក​សិក្ខា​សាលា​ត្រីភាគី ស្តីពីការពិនិត្យសម្រេចលើផែនការមេ លើកទី៣ ស្ដីពីសុវត្ថិភាព និង​សុខភាព​ការងារ ឆ្នាំ២០២៣-២០២៧ កាលពីរសៀលថ្ងៃទី៣ ខែមីនាកន្លងទៅ បានមានប្រសាសន៍ថា សុវត្ថិភាព និងសុខភាពការងារ គឺជាបញ្ហាដ៏សំខាន់នៅគ្រប់កន្លែងការងារ ដែល​រាជរដ្ឋាភិបាល​កម្ពុជា ជាពិសេសក្រសួងការងារ ដែលជាសេនាធិការ យកចិត្តទុកដាក់យ៉ាងខ្លាំង និង​ត្រូវ​បាន​ដាក់​បញ្ចូល​ជា​បទដ្ឋានការងារស្នូលរបស់អង្គការអន្តរជាតិខាងការងារ។ ឯកឧត្តមបន្តថា ដោយសារ​តែ​បញ្ហា​ទាំង​នេះ គឺធ្វើឲ្យមានតម្រូវការចាំបាច់កាន់តែខ្លាំងឡើងៗ ក្នុងការបញ្ជ្រាប ចំណេះដឹង និង​វិធានការ​ផ្នែកសុវត្ថិភាព និងសុខភាពការងារ (OSH) ទៅក្នុងការអប់រំទូទៅសម្រាប់មនុស្សគ្រប់គ្នា មុនពេលពួកគេចូលទៅក្នុងពិភពការងារ និងបន្តការងារពេញមួយជីវិតរបស់ពួកគេ។

ឯកឧត្តមរដ្ឋលេខាធិការ បានលើកឡើងថា ការបញ្ចូលចំណេះដឹងស្តីពីសុវត្ថិភាព និង​សុខ​ភាព​ការងារ ទៅក្នុងការអប់រំទូទៅ និងទៅក្នុងកម្មវិធីបណ្តុះបណ្តាលវិជ្ជាជីវៈ គឺអាចជួយ​កសាង​អនាគត​កម្មករ​ជំនាន់​ក្រោយប្រកបដោយសុវត្ថិភាព និងសុខភាពល្អជាងមុន។ ការ​លើក​កម្ពស់​ការ​សិក្សា​ពេញ​មួយ​ជីវិតអំពីសុវត្ថិភាព និងសុខភាពការងារ អាចជួយកម្មករ និងនិយោជកឱ្យស្វែងយល់ និង​សម្រប​ខ្លួនទៅនឹងហានិភ័យដែលកំពុងកើតមាន ក៏ដូចជាហា​និភ័យ​ទាក់​ទង​នឹង​ការងារ​ជាប់​លាប់ ដូច្នេះការកែលម្អសុវត្ថិភាព និងសុខភាពពេញមួយជីវិតការងារ គឺជាការងារចាំបាច់។

នៅ​ក្នុង​អង្គសិក្ខាសាលានេះដែរ លោក ហារុហ៊ីរ៉ូ ចូណូ (Haruhiro Jono) តំណាង​អង្គការ​អន្តរជាតិ​ការងារ បានសារទរចំពោះដំណើរការនៃការរៀបចំផែនការមេលើកទី៣នេះ ប្រកប​ដោយ​អន្តរកម្ម ដោយ​មាន​កិច្ច​សន្ទនា​សង្គម​ច្បាស់​លាស់​ពី​គ្រប់​ដៃគូរ​ពាក់ព័ន្ធ​ និង​មាន​ការ​ចូលរួម​ផ្តល់​ធាតុ​ចូល។ លោកបន្ថែមថា អង្គការអន្តរជាតិខាងការងារ ក៏នៅបន្តគាំទ្រនិងដំណើរការ ការអនុវត្ត​ផែន​ការ​មេ លើកទី៣ តទៅមុខទៀត។

ពាក់ព័ន្ធការ​រៀបចំសិក្ខាសាលាត្រីភាគីខាងលើនេះ ឯកឧត្តមទន្តបណ្ឌិត ឡេង តុង ទីប្រឹក្សាអម​ក្រសួង និងជាប្រធាននាយកដ្ឋានពេទ្យការងារ បានបញ្ជាក់ថា មានសិក្ខាកាមចូលរួមសរុបចំនួន ៥០នាក់ ដែលអញ្ជើញមកពីស្ថាប័នរដ្ឋ និយោជក និយោជិត និងអង្គការនានា។ គោល​បំណង​សំខាន់​ នៃ​សិក្ខាសាលានេះ គឺជាឱកាសដែលអ្នកចូលរួមទាំងអស់ ជួយពិនិត្យ​ផ្ទៀងផ្ទាត់​លើ​សកម្មភាព​លំអិត ស្ថាប័នដឹកនាំនិងសហការ ការប៉ាន់ប្រមាណថវិកាចំណាយ និង​សូចនាករ​ធាតុ​ចេញ​ ដែលជាសេចក្តីព្រាងលទ្ធផលនៃសិក្ខាសាលាកន្លងមក ដើម្បីធ្វើសុពលភាព និង​បញ្ចប់​ផែនការ​មេ លើកទី៣ ស្តីពី សុវត្ថិភាព និងសុខភាពការងារ៕ អត្ថបទ៖ បូរ៉ាវី