ភ្នំពេញ៖ ឯកឧត្តម ខូយ រីដា អភិបាលខេត្តពោធិ៍សាត់ បានថ្លែងថា បច្ចុប្បន្ននេះ ប្រជាពលរដ្ឋក្នុងខេត្តពោធិ៍សាត់ ស្ទើរតែ១០០ភាគរយ មានអគ្គិសនីប្រើប្រាស់ ខណៈខេត្តមួយនេះ កំពុងតែពង្រីកបន្ថែមទៀត នូវថាមពលរដ្ឋអគ្គិសនី ឲ្យដល់ជិត ៣០០មេហ្កាវ៉ាត់ ។

ក្នុងសន្និសីទសារព័ត៌មានស្ដីពី “ភាពជោគជ័យក្នុងរយៈពេល ៥ឆ្នាំកន្លងមក របស់រដ្ឋបាលខេត្តពោធិ៍សាត់ នៅថ្ងៃទី៧ ខែមីនា ឆ្នាំ២០២៣ ឯកឧត្តម ខូយ រីដា អភិបាលខេត្តពោធិ៍សាត់ មានប្រសាសន៍ថា ខេត្តពោធិ៍សាត់ មានទំនប់វារីអគ្គិសនីចំនួន ២កន្លែង ស្ថិតក្នុងស្រុកវាលវែង ដោយមួយកន្លែងស្ថិតក្នុងឃុំអូរសោម មានអនុភាព ១២០មេហ្កាវ៉ាត់ និងមួយកន្លែងទៀតកំពុងសាងសង់ ស្ថិតក្នុងឃុំប្រម៉ោយ មានអនុភាព ៨មេហ្កាវ៉ាត់ ដែលគ្រោងបញ្ចប់ការសាងសង់ និងដាក់ឲ្យដំណើរការនៅឆ្នាំ២០២៦ ។

ឯកឧត្តមបន្តថា ខេត្តមានអនុស្ថានីយចំនួន ៣កន្លែង ហើយខេត្តមានស្ថានីយអគ្គិសនី ដើរដោយ ថាមពលពន្លឺព្រះអាទិត្យ មានអនុភាពចំនួន ៩០មេហ្កាវ៉ាត់ ខណៈប្រទេសដៃគូបានជួយកសាងប្រភព អគ្គិសនីតូចៗនៅតាមមូលដ្ឋាន សម្រាប់ឲ្យប្រជាពលរដ្ឋប្រើប្រាស់ និងរហូតមកដល់ពេលនេះ គឺមានពលរដ្ឋក្នុងខេត្តតិចតួចបំផុត ​ដែលរស់នៅតំបន់ដាច់ស្រយ៉ាល មិនទាន់មានភ្លើងប្រើប្រាស់​ប៉ុណ្ណោះ ។

ឯកឧត្តម ខូយ រីដា បន្ថែមថា ទំនប់វារីអគ្គិសនី ដែលសាងសង់នៅខេត្តពោធិ៍សាត់ មិនត្រឹមតែ​ផ្ដល់នូវថាមពលអគ្គិសនី​ សម្រាប់ប្រើប្រាស់នោះទេ ​ថែមទាំងអាចផ្ទុកទឹកទុក សម្រាប់​បម្រើ​ដល់វិស័យកសិកម្ម ​និងបង្កើតជាទីតាំងតំបន់ទេសចរណ៍​ ក្នុងខេត្តពោធិ៍សាត់ផងដែរ ៕អត្ថបទ៖ បាន សុខរិទ្ធិ