ភ្នំពេញ៖ ឯកឧត្តម ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត (គ ជ.ប) បាន​អំពាវនាវដល់ភាគីពាក់ព័ន្ធចូលរាយមពិនិត្យការបិទផ្សាយបញ្ជីឈ្មោះឆ្នោតដំបូងសម្រាប់ការ​បោះឆ្នោត​ក្រុមប្រឹក្សាក្រុង-ស្រុក ​ខណៈមកដល់ពេលនេះ គ.ជ.ប ពុំទាន់ទទួលបានបណ្តឹង​ពាក់ព័ន្ធ​បញ្ជីឈ្មោះឆ្នោតសម្រាប់ការបោះឆ្នោតជ្រើសរើសក្រុមប្រឹក្សាក្រុង-ស្រុកនៅឡើយទេ។

បើតាមឯកឧត្តម ហង្ស ពុទ្ធា បានឲ្យដឹងថា បន្ទាប់ពីគ.ជ.ប បានបញ្ចប់ការចុះឈ្មោះបោះឆ្នោត​នៃ​តួអង្គ​ដែលជាសមាជិកក្រុមប្រឹក្សាឃុំ-សង្កាត់ក្នុងក្រុង-ស្រុកនៃខេត្តទាំង​៣នោះ គ.ជ.ប បាន​ដំណើរការបិទផ្សាយបញ្ជីឈ្មោះបោះឆ្នោតដំបូង កាលពីថ្ងៃទី៥ ខែមីនា ឆ្នាំ២០២៣ ដើម្បីឲ្យ​ភាគី​ពាក់ព័ន្ធពិនិត្យ និងដាក់ពាក្យប្តឹង ឬជំទាស់ទៅលើបញ្ជីឈ្មោះដំបូង។

ឯកឧត្តម បន្តថា ការដាក់ពាក្យប្តឹង ​ឬជំទាស់នេះ ​មានរយៈពេល៩ថ្ងៃ គិតចាប់ពីថ្ងៃទី៦ ដល់ថ្ងៃទី១៤ ខែមីនា ឆ្នាំ២០២៣។

ឯកឧត្តម ហង្ស ពុទ្ធា បញ្ជាក់ថា មកដល់ពេលនេះ គ.ជ.ប ពុំទាន់ទទួលបានបណ្តឹងណាមួយនៅ​ឡើយ​ទេពាក់ព័ន្ធនឹងបញ្ជីឈ្មោះបោះឆ្នោតដំបូងសម្រាប់ប្រើប្រាស់ក្នុង​ដំណើរការ​បោះឆ្នោត​ជ្រើសរើសក្រុមប្រឹក្សាក្រុង-ស្រុកនៅឡើយទេ ​និងថែមទាំងអំពាវនាវឲ្យភាគីពាក់ព័ន្ធចូលរួមពិនិត្យ ដើម្បីរក្សាភាពត្រឹមត្រូវនៃបញ្ជីឈ្មោះបោះឆ្នោតផងដែរ។

ផ្អែកតាមសេចក្ដីសម្រេចរបស់រដ្ឋាភិបាលរៀបចំព្រំដែនរដ្ឋបាល ​ជាពិសេសបង្កើតក្រុង និងស្រុកមួយ​ចំនួនក្នុងខេត្តកណ្ដាល កំពង់ស្ពឺ និងខេត្តក្រចេះ ជាក់ស្តែងខេត្តកណ្តាល ​មានក្រុងសំពៅពូន និង​ក្រុងអរិយក្សត្រ ខណៈក្រុងអរិយក្សត្រនេះ​ មានសង្កាត់ចំនួន១១។ ជាក់ស្តែង ដើម្បី​ដំណើរការ​រដ្ឋបាលក្រុងទាំងពីរនេះ គណៈកម្មការរៀបចំការបោះឆ្នោតខេត្តកណ្តាល បានដំណើរចាប់​ឆ្នោត​លេខរៀង និងទទួលបានការស្នើចូលរួមប្រកួតប្រជែងរបស់គណបក្សនយោបាយចំនួនបីរួចរាល់ កាលពីពេលថ្មីៗកន្លងទៅ។

គួរបញ្ជាក់ថា គណបក្សនយោបាយបីដែលចូលរួមប្រកួតប្រជែងជ្រើសរើស​ក្រុមប្រឹក្សា​ក្រុង​អរិយក្សត្រ មានដូចជា គណបក្សប្រជាជនកម្ពុជា, គណបក្សហ៊្វុនស៊ិនប៉ិច និង​គណបក្ស​ភ្លើងទៀន ខណៈក្នុងចំណោមគណបក្សនយោបាយនីមួយៗមានបេក្ខជនពេញសិទ្ធិចំនួន ១៩រូប៕ អត្ថបទ សេក ឧត្តម