ភ្នំពេញ៖ អគ្គនាយកនៃអគ្គនាយកដ្ឋានពន្ធដារ អំពាវដល់ម្ចាស់សហគ្រាសទាំងអស់ បន្តការកែទម្រង់ និងការគ្រប់គ្រងអាជីវកម្មឲ្យបានល្អប្រសើរ ​ដើម្បីការរីកចម្រើននៅក្នុងអាជីវកម្មរបស់ខ្លួន និងចូលរួម​បង់ពន្ធឲ្យបានទាន់ពេលវេលា ដែលជាផ្នែកមួយនៃការចូលរួមចំណែកលើកកម្ពស់ដល់​ការអភិវឌ្ឍនៅកម្ពុជា។

ឯកឧត្តម គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី ​និងជាប្រតិភូរាជរដ្ឋាភិបាលទទួលបន្ទុក​ជា​អគ្គនាយក ​នៃអគ្គនាយកដ្ឋានពន្ធដារ​ លើកឡើងក្នុងសិក្ខាសាលាផ្សព្វផ្សាយស្តីពី "កាតព្វកិច្ចពន្ធ​លើ​ប្រាក់ចំណូល ​ការបំពេញទម្រង់លិខិតប្រកាសពន្ធ​លើ​ប្រាក់​ចំណូលប្រចាំឆ្នាំ ការស៊ើបអង្កេត​បទល្មើស​ពន្ធដារ និងការប្រឆាំងការសម្អាតប្រាក់ " នៅថ្ងៃទី ៦ ខែ មីនា ឆ្នាំ ២០២៣ នេះថា​តាម​រយៈនៃការ​ពង្រឹង​អភិបាលកិច្ចល្អ អគ្គនាយកដ្ឋានពន្ធដារបានរៀបចំការគ្រប់គ្រង​តាមប្រព័ន្ធ​អេឡិចត្រូនិចឌីជីថល ដែល ធ្វើយ៉ាងណាម្ចាស់អាជីវកម្មងាយបង់ពន្ធ និងមានភាពងាយស្រួល​ក្នុងការបង់ពន្ធ ។

តាមប្រសាសន៍ណែនាំ និងការខិតខំប្រឹងប្រែង ពិតជាបានផ្តល់ភាពងាយស្រួល គឺការបង់ពន្ធ​តាម​អេឡិចត្រូនិច បច្ចុប្បន្នម្ចាស់សហគ្រាសបានបង់ពន្ធតាមប្រព័ន្ធនេះជាង​ ៩០ ភាគរយ នៃសហគ្រាសសរុប ​លើកលែងតែសហគ្រាសតូចៗ​ ដែលនៅបង់ពន្ធតាមលិខិតប្រកាស។ តែសម្រាប់បញ្ហានេះ​ អគ្គនាយកដ្ឋានពន្ធដារ ក៏បានបង្កើតនូវ App ដែលម្ចាស់អាជីវកម្មខ្នាតតូច អាចវាយ​ទិន្នន័យបញ្ជូន ​និងបញ្ជូនមកពន្ធដារជាការស្រាច់។

ឯកឧត្តម គង់ វិបុល បន្តថា​ ចំពោះពន្ធលើប្រាក់ចំណូលនេះ នៅឆ្នាំ ២០២២ កន្លងមក​ អគ្គនាយក​ដ្ឋាន​ពន្ធ​ដារ​បានប្រមូលចំណូលពន្ធនេះបានកើនឡើងយ៉ាងល្អប្រសើរ ហើយតាម​រយៈនៃការ​កើន​ឡើងពន្ធប្រាក់ចំណូលនេះ គឺត្រូវតែ​ឆ្លុះបញ្ចាំង​នៅឆ្នាំ ២០២៣ ដែលកិច្ចការនេះ ទាំងរដ្ឋ ​និងឯកជន ត្រូវរួមគ្នាបន្តការកែទម្រង់​ និងការគ្រប់គ្រងអាជីវកម្មឲ្យបានល្អប្រសើរ ដើម្បីការរីកចម្រើន​នៅក្នុង​អាជីវកម្មរបស់​ខ្លួន ​ដើម្បីចូលរួមចំណែក​លើក​កម្ពស់​ដល់​ការអភិវឌ្ឍ​នៅកម្ពុជា។

សូមបញ្ជាក់ថា នៅក្នុងបំណាច់ឆ្នាំ ២០២២​ អគ្គនាយកដ្ឋានពន្ធដារប្រមូលចំណូលពន្ធ-អាករគ្រប់​ប្រភេទ ​បានចំនួនជាង ៣ ៤៥៥ លានដុល្លារអាមេរិក ​គឺប្រមូលលើសផែនការបានជាង ៦០០ លានដុល្លារ ​ត្រូវប្រមាណជាង ២២ ភាគរយ បើធៀបទៅនិងច្បាប់ហិរញ្ញវត្ថុសម្រាប់ការគ្រប់គ្រងឆ្នាំ ២០២១ ៕អត្ថបទ៖ សុន រ៉ាឌី