ភ្នំពេញ ៖ ដើម្បីសម្រួលដល់ជីវភាពរស់នៅរបស់កម្មករនិយោជិត ក្នុងអំឡុងពេលដែល​រោងចក្របាន​ព្យួរកិច្ចសន្យា​ការងារដោយសារវិបត្តិសាកល រាជរដ្ឋាភិបាលកម្ពុជាបានប្រកាសថា នឹងចូលរួមឧបត្ថម្ភជាទឹកប្រាក់ចំនួន ៤០ដុល្លារ និងខាងរោងចក្រឧបត្ថម្ភចំនួន ៣០ដុល្លារ សរុប ៧០ដុល្លារ ក្នុងម្នាក់ គិតចាប់ពីខែមេសា ឆ្នាំ២០២៣តទៅ។

​ក្រសួងការងារ និងបណ្តុះបណ្តាលវិជ្ជាជីវៈ បានឲ្យដឹងថា អនុវត្តតាមអនុសាសន៍ណែនាំ​ដ៏ខ្ពង់ខ្ពស់​របស់ស​ម្តេចតេជោ​នាយករដ្ឋមន្រ្តី ឯកឧត្តមបណ្ឌិតរដ្ឋមន្រ្តី អ៊ិត សំហេង បានអញ្ជើញដឹកនាំកិច្ចប្រជុំជាមួយតំណាងក្រសួងសេដ្ឋកិច្ច និងហិរញ្ញវត្ថុ និងតំណាងសមាគមនិយោជក ដែលពាក់ព័ន្ធនឹងវិស័យកាត់ដេរ សម្លៀកបំពាក់ ផលិតស្បែកជើង និងសំភារៈធ្វើដំណើរ និងកាបូប ដើម្បីពិភាក្សគ្នាក្នុងការសហការរៀបចំ ការបើកផ្តល់​ប្រាក់ឧបត្ថម្ភ​ជូនកម្មករ​និយោជិត​ដែលត្រូវបានរោងចក្រព្យួរកិច្ចសន្យាការងារក្នុងអំឡុងពេលវិបត្តិសេដ្ឋកិច្ចជាសកល នាព្រឹកថ្ងៃទី៧ ខែមីនានេះ នៅទីស្តីការក្រសួង។

 ប្រភពដដែល បានឲ្យដឹងថា កិច្ចប្រជុំនេះ បានលើកបង្ហាញនិន្នាការនៃការធ្លាក់ចុះការបញ្ជាទិញ ដោយសារកត្តានៃ​ការចាប់ផ្តើមនូវវិបត្តិសេដ្ឋកិច្ចសកល បង្កមកពីបញ្ហាសង្រ្គាមរុស្សី អ៊ុយក្រែនបន្ថែមទៅលើផលប៉ះពាល់​កន្លងមក​ពីវិបត្តិជំងឺកូវីដ-១៩ផងនោះ។ ស្ថានភាពនៃការព្យួរកិច្ចសន្យាការងារ បាននឹងកំពុងបន្តកើនឡើង ហើយស្ថិត​ក្នុងស្ថានភាពមួយមិនប្រាកដប្រជា ដែលអាចនឹងវិលទៅប្រក្រតីភាពនៅពេលណានោះឡើយ បន្ថែមពីនេះការ​ចំណាយផ្សេងៗក៏មិនទាន់អាចកាត់បន្ថយបានសម្រាប់ការផលិត និងការនាំចេញ។

ក្នុងឱកាសនោះ តំណាងវិស័យឯកជន បានថ្លែងអំណរគុណចំពោះសម្តេចនាយករដ្ឋមន្រ្តី ដែលតែងតែផ្តល់នូវ​ការគិតគូខ្ពស់ជួយសម្រួលដល់វិស័យឯកជន ដើម្បីអាចរក្សាលំនឹងអាជីវកម្មផលិតកម្មរបស់ខ្លួន ហើយជួយ​ដល់កម្មករនិយោជិត អាចរក្សាការងាររបស់ខ្លួន និងប្រាក់ចំណូលដោះ​ស្រាយជីវភាព​ក្នុងពេលគ្រាមាន​វិបត្តិកើតឡើង។

បន្ទាប់ពីខាងតំណាងភាគីពាក់ព័ន្ធ លើកឡើងពីស្ថានភាព បញ្ហាប្រឈម និងដំណោះស្រាយរួចមក ឯកឧត្តមបណ្ឌិត អ៊ិត សំហេង បានទទួលយកនូវសំណូមពរដែលខាងវិស័យឯកជនជួបប្រទះការលំបាក ដើម្បីពិភាក្សាដោះ​ស្រាយជា​មួយ​ក្រសួង ស្ថាប័នពាក់ព័ន្ធ។ ឯកឧត្តម បានសំដែងនូវការអរគុណចំពោះវិស័យឯកជន ជាពិសេសដៃគូសមាគមនិ​យោជក ដែលបានផ្តល់កិច្ចសហការយ៉ាងល្អ ក្នុងអំឡុងពេលអនុវត្តនូវកញ្ចប់វិធានការរបស់រដ្ឋាភិបាល១០ជុំកន្លងមក ក្នុងពេលមានវិបត្តិជំងឺកូវីដ-១៩។

តាមការឲ្យដឹងរបស់ក្រសួងការងារ និងបណ្ដុះបណ្ដាលវិជ្ជាជីវៈ បានបញ្ជាក់ថា គិតត្រឹមបំណាច់ខែកុម្ភៈ ឆ្នាំ២០២៣ រោងចក្រនៅកម្ពុជា ដែលកំពុងព្យួរកិច្ចសន្យាការងារ ដោយសារការបញ្ជាទិញពីក្រៅប្រទេសធ្លាក់​ចុះក្នុងពេល​ដែលពិភពលោកជួបនូវវិបត្តិសង្រ្គាមរវាងរុស្សី-អ៊ុយក្រែន មានចំនួន ៧១រោងចក្រ ស្មើនឹងកម្មករនិយោជិតសរុបជាង ៣ម៉ឺន ២ពាន់៕ អត្ថបទ ៖ ឈិត បូរ៉ាវី