ភ្នំពេញ៖ ឯកឧត្ដម​រដ្ឋមន្ត្រី ឌិត ទីណា រដ្ឋមន្ត្រី​ក្រសួងកសិកម្ម រុក្ខាប្រមាញ់ និង​នេសាទ បាន​ជំរុញ​ទៅ​វិទ្យាស្ថាន​ស្រាវជ្រាវ​កៅស៊ូ​កម្ពុជា (CRRI) រៀបចំ​ចម្ការ​កៅស៊ូចាស់ៗ ឲ្យ​ក្លាយ​ទៅ​ជា​សារមន្ទីរ​ចម្ការ​កៅ​ស៊ូ​ឲ្យ​បាន​ល្អ និង​ផ្សព្វផ្សាយ​ដល់​ប្រជាពលរដ្ឋ ឲ្យ​បាន​ដឹង​ថា​មាន​នៅ​តំបន់​ណា​ខ្លះ ។

ក្នុងកិច្ចប្រជុំពិនិត្យ និងពិភាក្សាលើសេចក្ដីព្រាងប្រកាសអន្តរក្រសួងស្ដីពី ការរៀបចំ និង​ការ​ប្រព្រឹត្ត​ទៅ​របស់​ការិយាល័យ និងអង្គភាពចំណុះវិទ្យាស្ថានស្រាវជ្រាវ និងអភិវឌ្ឍន៍កសិកម្មកម្ពុជា (CARDI) និងវិទ្យាស្ថានស្រាវជ្រាវកៅស៊ូកម្ពុជា នៅថ្ងៃទី៩ ខែមីនា ឆ្នាំ២០២៣ ឯកឧត្តម ឌិត ទីណា មាន​ប្រសាសន៍ថា មន្ត្រីជំនាញត្រូវផ្តល់ពូជថ្មី និងបំបៅឱ្យមាន​ប្រសិទ្ធភាពនូវពូជមួយនៅកម្ពុជា ក្នុង​គោលដៅ​អភិវឌ្ឍដំណាំកៅស៊ូ ដោយគាំទ្រដល់ប្រតិបត្តិការអភិវឌ្ឍកៅស៊ូ​លើខ្សែ​ច្រវាក់​ផលិតកម្ម​ទាំងមូល ។

ឯកឧត្តមបន្ថែមថា ដើម្បីសម្រេចការងារ CRRI ត្រូវធ្វើយ៉ាងណាឱ្យមានការ​ទទួល​ខុស​ត្រូវរួម​គ្នាក្នុង​ការការពារ​កៅស៊ូ​​ព្រមទាំងបច្ចេកទេស និងការឆ្លើយតបនឹង​បញ្ហាអាកាសធាតុក្នុង​នោះត្រូវធ្វើការថែរក្សាព្យាបាល និងជួសជុល​កៅស៊ូឱ្យ​បានល្អ និងត្រូវសិក្សាពីទីផ្សារកៅស៊ូ ដើម្បីទទួលបានតម្លៃល្អ មានស្ថិរភាព បង្កើនចំណូលមកវិញ ហើយ CRRI ត្រូវ​ធ្វើការងារបន្ថែមទៀត ដោយក្នុងនោះត្រូវថែរក្សា និងរៀបចំផ្ទៃដីកៅស៊ូចាស់ៗ ឱ្យក្លាយជាសារៈមន្ទីរកៅស៊ូឱ្យបានល្អ ។

ជាមួយនេះ រដ្ឋមន្ត្រីក្រសួងកសិកម្ម បានណែនាំឱ្យវិទ្យាស្ថានទាំងពីរ CARDI និង CRRI ធ្វើការពិនិត្យបន្ថែមទៀត លើការ​ប្រើប្រាស់ពាក្យខ្មែរឱ្យត្រឹមត្រូវទៅតាមក្បួន ហើយឱ្យអ្នកអានងាយយល់ពីគោលបំណង និងខ្លឹមសារ​ឱ្យបានច្បាស់​លាស់។

សូមជម្រាបជូនថា វិទ្យាស្ថានស្រាវជ្រាវ និងអភិវឌ្ឍកសិកម្មកម្ពុជា និងវិទ្យាស្ថានស្រាវជ្រាវកៅស៊ូកម្ពុជា គឺអង្គភាព​នីមួយៗមានការិយាល័យចំនួន១០ និងមជ្ឈមណ្ឌលចំនួន១ ដូចគ្នា៕ អត្ថបទ ៖ សុខរិទ្ធ