ភ្នំពេញ៖ អង្គការសម្ព័ន្ធមិត្តសត្វព្រៃ (WA) បានរៀបចំដំណើរទេសចរណ៍សត្វព្រៃផ្សព្វផ្សាយ ពីសារសំខាន់នៃព្រៃឈើ និងសត្វព្រៃ តំបន់ជួរភ្នំក្រវាញ ទៅកាន់សាធារណជនសំដៅកាត់បន្ថយការកាប់បំផ្លាញព្រៃឈើ និងដាក់អន្ទាក់ និងបរបាញ់សត្វព្រៃបន្តទៀត ។

កម្មវិធីនេះ ចាប់ផ្តើមនៅថ្ងៃទី១០ ខែមីនា ឆ្នាំ២០២៣ ចាប់ពីឃុំអូសោម ស្រុកវាលវែង ខេត្តពោធិ៍សាត់ មុនចូលទៅ​ដល់ខេត្តកោះកុង និងចុងក្រោយធ្វើ នៅក្នុងរាជធានីភ្នំពេញ ដោយក្នុងព្រឹត្តិការណ៍នេះ មានការលេងល្បែងកំសាន្ត ការសម្ដែងសៀកបែបវិទ្យាសាស្ត្រ និងរួមមានការចាប់រង្វាន់ ដែលកម្មវិធីធ្វើឡើងក្នុងបរិវេននៅវត្តអូរសោម មនការ​ចូលរួមពីឯកឧត្តម សុខខេង នរិន្ទ អនុរដ្ឋលេខាធិការក្រសួងបរិស្ថាន, លោក សាយ សុជាតិ អភិបាលខេត្តពោធិ៍សាត់, កញ្ញាបណ្ឌិត ស៊ូវណ្ណា ហ្គោនឡែត នាយិកាប្រតិបត្តិអង្គការសម្ព័ន្ធមិត្តសត្វព្រៃ និងភ្ញៀវជាច្រើនរូបទៀត ។

ក្នុងសេចក្តីប្រកាសព័ត៌មាន របស់អង្គការសម្ព័ន្ធមិត្តសត្វព្រៃ បានឱ្យដឹងថា ព្រឹត្តិការណ៍នេះ ប្រារព្ធឡើងដើម្បី​អបអរសាទរ និងផ្សព្វផ្សាយពីសារសំខាន់នៃព្រៃឈើ តំបន់ជួរភ្នំក្រវាញចំពោះបរិស្ថាន និងសហគមន៍ ខណៈធនធាន​ព្រៃឈើបានដើរតួនាទី ជាបទប្បញ្ញត្តិអាកាសធាតុ បង្កើតជាប្រភពថាមពល និងបានជួយគាំទ្រ​ដល់ជីវភាពរស់​នៅរបស់ប្រជាពលរដ្ឋ ហើយសកម្មភាពនេះ ផ្តោតសំខាន់ទៅលើខ្លឹមសារចម្បងចំនួន៣ រួមមាន ទី១. មានព្រៃឈើ​មានប្រភពទឹក, ទី២. សត្វខ្លាធំជួយរក្សាលំនឹងប្រព័ន្ធអេកូឡូស៊ី និងទី៣. គ្មានអន្ទាក់ គ្មានការបរិភោគសាច់សត្វព្រៃ ។

ប្រភពបន្ថែមថា ព្រឹត្តិការណ៍នេះ រួមបញ្ចូលការសម្ដែងសៀកបែបវិទ្យាសាស្ត្រ ដែលចូលរួមសម្តែងដោយដៃគូ សហការរបស់អង្គការសម្ព័ន្ធមិត្តសត្វព្រៃ មកពីក្រៅប្រទេស គឺ "Baseet" និងការសម្តែងដោយតារាចម្រៀង​ល្បីប្រចាំ​ខេត្តកោះកុង គឺលោក រាជ វិចិត្រ ដោយបើកឱ្យមានការចូលរួមដោយសេរី ។

សូមបញ្ជាក់ថា អង្គការសម្ព័ន្ធមិត្តសត្វព្រៃអន្តរជាតិ ត្រូវបានបង្កើតឡើងដោយកញ្ញាបណ្ឌិត ស៊ូវណ្ណា ហ្គោនឡុត ដើម្បីផ្ដល់​ការការពារ ដោយផ្ទាល់ដល់ព្រៃឈើ និងសត្វព្រៃ តាមរយៈកម្មវិធីអភិរក្សបែបទំនើប។ អង្គការនេះផ្តល់ជំនួយបច្ចេកទេស និងការត្រិះរិះពិចារណា ដល់រាជដ្ឋាភិបាល និងខិតខំឱ្យមានការឯកភាព​គ្នារវាង​ភាគីពាក់ព័ន្ធ ក្នុងការសម្រេចបានដំណោះស្រាយ ចំពោះការគំរាមកំហែងបរិស្ថានជាច្រើនរួមមាន ការជួញដូរ​សត្វ ការផ្តល់ដីសម្បទានសេដ្ឋកិច្ច សម្រាប់ដំណាំកសិឧស្សាហកម្ម និងការជីកយករ៉ែ និងការទន្ទ្រានយកដីព្រៃ ។ អង្គការនេះ គឺជាអ្នកដឹកនាំក្នុងការចាត់វិធានការណ៍ផ្ទាល់នៅក្នុងតំបន់ខ្សែក្រវាត់ត្រូពិចអាស៊ីអាគ្នេយ៍ ៕ អត្ថបទ បាន សុខរិទ្ធិ