ភ្នំពេញ៖ នៅថ្ងៃទី១១ ខែមិនា ឆ្នាំ២០២៣ ឯកឧត្តម គីម វីរៈ អគ្គលេខាធិការ​គណៈកម្មាធិការ​ជាតិ​គ្រប់​គ្រង​គ្រោះអន្តរាយ បានដឹកនាំថ្នាក់​ដឹក​នាំ​គណៈកម្មាធិការ​ជាតិ​គ្រប់​គ្រង​គ្រោះ​មហន្តរាយ​បាន​ដឹក​នាំគណៈប្រតិភូចូលរួមសន្និសីទអាស៊ី ស្តីពីការកាត់បន្ថយហានិភ័យគ្រោះមហន្តរាយ ក្រោម​មូលបទ «តើមានអ្វីបន្ទាប់? ការរៀនសូត្រពីអតីតកាល និងការត្រៀម​រៀបចំ​សម្រាប់​អនាគត» ក្រោមអធិបតីភាព លោក TANI KOICHI រដ្ឋមន្ត្រីក្រសួងគ្រប់គ្រងគ្រោះមហន្តរាយ និង​គោល​នយោបាយមហាសមុទ្រនៃរដ្ឋាភិបាលជប៉ុន ចាប់ពីថ្ងៃទី១០ ដល់ថ្ងៃទី១២ ខែមីនា ឆ្នាំ២០២៣ នៅទីក្រុងសេនដាយ ប្រទេសជប៉ុន។ 

សន្និសីទនេះ បានពិភាក្សាលើប្រធានបទចំនួនបី រួមមាន៖ ទី១ វិធាន​ការ​ទប់​ទ​ល់នឹ​ង​គ្រោះ​មហន្ត​រាយ​ទ្រង់​ទ្រាយ​ធំ ទី២ ពង្រីកការយល់​ដឹង​សម្រាប់​ការ​តភ្ជាប់​ទិន្នន័យ​គ្រោះ​មហន្តរាយ​ទៅ​ក្នុង​ការ​អនុវត្ត​ក្រប​ខណ្ឌការងារសេនដាយ និងទី៣ ការផ្តល់ព័ត៌មាន​តាម​រយៈ​ផ្កាយ​រណប​សម្រាប់​ការ​គ្រប់​គ្រង​គ្រោះមហន្តរាយ និងវិបត្តិ ដោយផ្តោត​ជាពិសេស​អំពី​សារៈសំខាន់​នៃ​ការ​អនុវត្ត​មេរៀន​កន្ល​ង​មក ដើម្បីឆ្ពោះទៅរកកិច្ចខិតខំប្រឹងប្រែងសម្រាប់ការត្រៀមខ្លួនជាស្រេចសម្រាប់ហានិភ័យនានា ដើម្បី​ពង្រឹងបន្ថែមទៀតនូវប្រព័ន្ធគ្រប់គ្រងហានិភ័យគ្រោះមហន្តរាយថ្នាក់ជាតិ។

សន្និសីទនេះមានសមាសភាពចូលរួមពីតំណាងរាជរដ្ឋាភិបាល ដៃគូអភិវឌ្ឍ អង្គការ​មិន​មែន​រដ្ឋាភិបាល និងវិស័យឯកជនសរុបចំនួន ១២០នាក់ មកពីប្រជាជាតិអាស៊ី និង​អាស៊ី​ប៉ាស៊ីហ្វិច​ចំនួន​២៨ ប្រទេស៕