ភ្នំពេញ៖ ស្ថានទូតសហរដ្ឋអាមេរិក សហការជាមួយដៃគូអភិរក្ស ទូទាំងប្រទេសកម្ពុជា ​នៅថ្ងៃទី១០ ខែមីនាម្សិលមិញ បានប្រកាសជាផ្លូវការនូវយុទ្ធនាការ “តោះនិយាយពីការទុកដាក់សំរាម” ។ យុទ្ធនាការនេះ ​ឧបត្ថម្ភដោយទីភ្នាក់ងារសហរដ្ឋអាមេរិក ដើម្បីអភិវឌ្ឍន៍អន្តរជាតិ (USAID) ក្នុង​គោលបំណងលើកទឹកចិត្ត ប្រជាជនកម្ពុជា ​ឱ្យបញ្ឈប់ការចោលសំរាមមិនត្រឹមត្រូវ បញ្ឈប់ការ​ដុតសំណល់ប្លាស្ទិក ​និងកាត់បន្ថយការ ប្រើប្រាស់ប្លាស្ទិក ។

គម្រោងអនាគតបៃតង USAID បានដឹកនាំយុទ្ធនាការ «តោះនិយាយពីការទុកដាក់សំរាម» ដោយ លើកទឹកចិត្តប្រជាជនកម្ពុជា​ឱ្យផ្លាស់ប្តូរ​ឥរិយាបថ​ និងសកម្មភាព ឆ្ពោះទៅរកការទុក​ដាក់សំរាម​ឱ្យបានត្រឹមត្រូវ។

យុទ្ធនាការនេះ នឹងសហការយ៉ាងជិតស្និទ្ធជាមួយយុវជន ដែលជា «យុវជនបៃតងឆ្នើម» ដើម្បី ធ្វើជាគំរូក្នុងការផ្លាស់ប្តូរឥរិយាបថ ​និងការអនុវត្តប្រកបដោយជោគជ័យ ។

យុវជនបៃតង បានប្តេជ្ញាថា នឹងចូលរួមឱ្យសកម្មក្នុងយុទ្ធនាការនេះ ​ដើម្បីផ្សព្វផ្សាយ អប់រំ ​និងចែក រំលែកចំណេះដឹងដល់សាធារណជន អំពីសារសំខាន់​ នៃការទុកសំរាមឱ្យបានត្រឹមត្រឹម ។

លោកស្រី ហាន់ ង្វៀន (Hanh Nguyen) នាយិកាស្តីទី ទីភ្នាក់ងារជំនួយអាមេរិក USAID បានលើក​ឡើងថា «រយៈពេលជាង១០ឆ្នាំមកនេះ ទីភ្នាក់ងារជំនួយអាមេរិក USAID​ បានចូលរួមជាថរិកា ១០០លាន​ដុល្លាអាមេរិក ក្នុងការអភិរក្ស ការពារបរិស្ថាន​ និងធនធានធម្មជាតិរបស់ប្រទេសកម្ពុជា។យើងមាន​សេចក្តីរីករាយក្នុងការពង្រីកវិសាលភាពការងាររបស់យើង ដើម្បីដោះស្រាយ​បញ្ហា​សំរាម។ ការចោលសំរាមមិនត្រឹមត្រូវ ​គឺជាបញ្ហាដែលកើតមានគ្រប់ទីកន្លែង រាប់ទាំងនៅសហរដ្ឋអាមេរិក​ផងដែរ។

លោកស្រីបានបន្ថែម ទៀតថា «បុគ្គលគ្រប់រូប មានតួនាទីសំខាន់ក្នុងការកាត់បន្ថយ ផលប៉ះពាល់ អវិជ្ជមាន ​ពីការទុកដាក់សំរាមមិនបានត្រឹមត្រូវ។

ជាមួយគ្នានេះ ឯកឧត្តម គិត ច័ន្ទគ្រឹស្នា ទីប្រឹក្សាឯកឧត្តមរដ្ឋមន្ត្រីក្រសួងបរិស្ថាន បានមាន​ប្រសាសន៍​ថា «ប្រជាជនកម្ពុជា គ្រប់ៗរូប មានភារកិច្ចរួមមួយ ក្នុងគាំពារបរិស្ថានដើម្បីការរស់​នៅស្អាត ភូមិឋានស្អាតសោភ័ណភាពទីក្រុង ​និងសុខភាពយើងទាំងអស់គ្នា។

ក្រសួងបរិសា្ថន ​អំពាវនាវឱ្យប្រជាជនទាំងអស់ ​បញ្ឈប់ការចោលសំរាមដោយមិនត្រឹមត្រូវ ដោយ​ងាក​មកទុកដាក់ និងបែងចែកសំរាមឱ្យបានត្រឹមត្រូវ ក្នុងធុងសំរាម ​និងចូលរួម ក្នុង​កិច្ចប្រឹងប្រែង​របស់រាជរដ្ឋាភិបាលក្នុងការអនុវត្តគោលនយោបាយ ​និងវិធានការគ្រប់គ្រងសំរាមឱ្យមានប្រសិទ្ធិភាព ដើម្បីសម្រេចគោលដៅ កម្ពុជាគ្មានសំរាម៕អត្ថបទ៖ទូច សោភ័ណ