ភ្នំពេញ៖ នាយឧត្តមសេនីយ៍ នេត សាវឿន អគ្គស្នងការនគរបាលជាតិ បានដាស់តឿន និងក្រើន​រំលឹក​ដល់កងកម្លាំងនគរបាលទាំងអស់ត្រូវតែការពារឲ្យបានដាច់ខាត និងជានិរន្តរ៍​ចំពោះ​ព្រះមហាក្សត្រ រដ្ឋធម្មនុញ្ញ រាជរដ្ឋាភិបាលស្របច្បាប់ ដែលកើតចេញពីការបោះឆ្នោត​របស់​ប្រជាពលរដ្ឋ និងត្រូវបន្តយកចិត្តទុកដាក់រាល់ក្ដីកង្វល់របស់ប្រជាពលរដ្ឋ​ឲ្យបានសកម្មបន្ថែមទៀត​ផងដែរ។

ក្នុងឱកាសអញ្ជើញប្រកាសចូលកាន់តំណែងលោកឧត្តមសេនីយ៍ទោ ឈឿន ប៊ុនឆន ជា​ស្នងការនគរបាលថ្មី នៃខេត្តព្រៃវែង នាព្រឹកថ្ងៃទី១៣ ខែមីនា ឆ្នាំ២០២៣នេះ ​នាយឧត្តមសេនីយ៍ នេត សាវឿន បានលើកឡើងថា« កងកម្លាំងនគរបាលទាំងអស់ត្រូវទប់ស្កាត់ និងការពាររាល់​ការ​ប៉ុនប៉ង​ចង់បំផ្លាញកម្ពុជា ​ពីសំណាក់ក្រុមឧបបាយកលពួកអគតិជ្រុលនិយម ហើយយើងមិនត្រូវ​ឲ្យអ្នកណាមកបំផ្លាញសន្ដិសុខភាព ​និងរាជរដ្ឋាភិបាលស្របច្បាប់ ដែលកើតចេញពីការបោះឆ្នោត​នេះបានឡើយ ដូច្នេះកងកម្លាំងអនុវត្តច្បាប់​ ត្រូវតែពង្រឹងសមត្ថភាពឲ្យខាងតែបាន»។

នាយឧត្តមសេនីយ៍ នេត សាវឿន បានបន្តទៀតថា ក្នុងនាមយើងជាមន្រ្តីអនុវត្តច្បាប់ និងបំរើ​ប្រជាពលរដ្ឋ​ត្រូវយកចិត្តទុកដាក់រាល់ក្ដីកង្វល់របស់ប្រជាពលរដ្ឋ ​ក្នុងនោះបទល្មើសព្រហ្មទណ្ឌ, ចរាចរណ៍, គ្រឿងញៀន ​ត្រូវតែកាត់បន្ថយកុំឲ្យកើតមានឡើង។ ​លើសពីនេះត្រូវធានាសន្ដិសុខ សណ្ដាប់ធ្នាប់ជូនប្រជាពលរដ្ឋ ​សំដៅធ្វើឲ្យជីវភាពរបស់ប្រជាពលរដ្ឋកាន់តែល្អប្រសើរបន្ថែមទៀត។ ដោយឡែក បញ្ហាគ្រឿងញៀន និងចរាចរណ៍ ត្រូវបន្ដជំរុញការអប់រំ ​ផ្សព្វផ្សាយដល់ប្រជាពលរដ្ឋ ខណៈកម្លាំង​នគរបាលត្រូវរក្សាឥរិយាបថទន់ភ្លន់ តែម៉ឺងម៉ាត់ជាដើម។

នាយឧត្តមសេនីយ៍អគ្គស្នងការនគរបាលជាតិ ក៏បានលើកឡើងផងដែរថា នៅក្នុងឆ្នាំ២០២៣ នេះមាន​ព្រឹត្តិការណ៍សំខាន់ៗជាច្រើន ​ដែលត្រូវដំណើរការដោយក្នុងនោះរួមមាន ការប្រកួត​កីឡាស៊ីហ្គេម និងអាស៊ានប៉ារ៉ាហ្គេម ដែលទីតាំងប្រកួតមាន៥រាជធានី-ខេត្ត, ការបោះឆ្នោត​ជ្រើសតាំង​តំណាងរាស្ដ្រ នីតិកាលទី៧ ដែលនឹងប្រព្រឹត្តទៅនៅខែកក្កដា ឆ្នាំ២០២៣ខាងមុខ ហើយ កងកម្លាំងដែលត្រូវឈរជើង ​ត្រូវតែថែរក្សា និងការពារនិរន្ដរ៍​ ព្រះមហាក្សត្រ ​ហ្លូងម៉ែ ប្រធាន​ព្រឹទ្ធសភា រដ្ឋសភា និងរាជរដ្ឋាភិបាល ដែលយាង និងអញ្ជើញបំពេញការងារប្រចាំថ្ងៃ។

យ៉ាងណាក៏ដោយនាយឧត្តមសេនីយ៍ នេត សាវឿន ក៏បានកោតសរសើរចំពោះភាពជោគជ័យ​ការពារ​បានល្អប្រសើនូវព្រឹត្តិការណ៍ធំៗ ​ដែលដំណើរការនៅក្នុងប្រទេសកម្ពុជា រួមមាន ការ​បោះឆ្នោតជ្រើសរើសក្រុមប្រឹក្សាឃុំសង្កាត់ ដែលកម្ពុជារៀបចំដោយខ្លួនឯង, ការពារកិច្ចប្រជុំកំពូល​អាស៊ាន និងកិច្ចប្រជុំកំពូលពាក់ព័ន្ធ ដែលក្នុងកិច្ចប្រជុំនេះបណ្ដាមេដឹកនាំពិភពលោក​បានមក​ប្រជុំ​ដោយផ្ទាល់នៅកម្ពុជា ក្នុងនោះមានទាំងនៅរាជធានីភ្នំពេញ​ និងខេត្តសៀមរាប ធ្វើឲ្យកម្ពុជា​មានកេរ្ដិ៍ឈ្មោះកាន់តែល្បីល្បាញផងដែរ៕អត្ថបទ៖ បាន ចក់