ភ្នំពេញ៖ គិតត្រឹមខែកុម្ភៈ ឆ្នាំ២០២៣ សាជីវកម្មធានាឥណទានកម្ពុជា បានផ្តល់ឥណទាន​ជា​ប្រាក់កម្ចី ទៅដល់ក្រុមហ៊ុនអាជីវកម្ម ចំនួនជាង ១ ពាន់ក្រុមហ៊ុន/អាជីវកម្ម គិតជាទឹកប្រាក់​កម្ចី​មានទំហំប្រមាណជិត ៤៥ ប៊ីលានរៀល ត្រូវជាង ៩៣ លានដុល្លារ ​ដើម្បីគាំទ្រដល់​សហគ្រាស​ខ្នាតមីក្រូ តូច និងមធ្យម។

សាជីវកម្មធានាឥណទានកម្ពុជា​ បានបង្ហាញពីវឌ្ឍនភាពនៃការធានាឥណទាន នៅ​ព្រះរាជាណា​ចក្រ​កម្ពុជា ក្នុងនោះ បើគិតត្រឹម ថ្ងៃទី ២៨ ខែ កុម្ភៈ ឆ្នាំ ២០២៣ ​សាជីវកម្មធានា​ឥណទានកម្ពុជា បានបញ្ចេញកញ្ចប់ថវិកាមានចំនួនប្រមាណ ៩៣.៧៥ លានដុល្លារអាមេរិក ដោយបានគាំទ្រ​ដល់​ក្រុមហ៊ុនអាជីវកម្ម ១ ១៥៥ ក្រុមហ៊ុន/អាជីវកម្ម ក្នុងនោះការផ្តល់ឥណទានមានការធានា មាន​ចំនួនទឹកប្រាក់ជាង ៦៩ លានដុល្លារ ​ខណៈការផ្តល់ឥណទានមិនមានការធានា មានទឹកប្រាក់ជាង ២៦ លានដុល្លារ, ដើម្បីគាំទ្រ​ និងធានាដល់ការអភិវឌ្ឍ​របស់​ដល់​សហគ្រាសធុនតូច និងមធ្យម ។

សាជីវកម្មធានាឥណទានកម្ពុជា បានផ្តល់ឥណទានដែលគ្រប់គ្រង​អាជីវកម្មដោយស្រ្តី ​មានចំនួន ៤៣៣ មូលដ្ឋាន ​ការផ្តល់ដល់សហគ្រាសខ្នាតធំ មាន ៨១ មូលដ្ឋាន និងការផ្តល់ទៅដល់​សហគ្រាស​ខ្នាតមីក្រូ តូច និងមធ្យម មានចំនួន ​១០៧៤ មូលដ្ឋាន។

សូមបញ្ជាក់ថា ទាក់ទិនការផ្តល់កម្ចីឥណទាននេះ​ សាជីវកម្មធានាឥណទានកម្ពុជា (CGCC) បាន​ដាក់ចេញគម្រោងធានាឥណទានដើម្បីស្តារអាជីវកម្ម ​មានទំហំទឹកប្រាក់​ ២០០ លានដុល្លារអាមេរិក កាលពីខែ មីនា ឆ្នាំ ២០២១​ ក្នុងគោលបំណងគាំទ្រដល់​ការងើបឡើងវិញនៃសេដ្ឋកិច្ច ក្នុងអំឡុង​ពេល​វិបត្តិជំងឺកូវីដ-១៩។

ក្នុងនាពេលថ្មីៗកន្លងមកនេះ សាជីវកម្មធានាឥណទានកម្ពុជា (CGCC) ក៏បានសម្ពោធដាក់ឱ្យ​ដំណើរ​ការជាផ្លូវការនូវ ​គម្រោងធានាឥណទានជាកញ្ចប់ជំហានបន្ត ដើម្បីជួយជ្រោមជ្រែងដល់​សហគ្រាស​ធុនតូច និងមធ្យម ខណៈដែលរាជរដ្ឋាភិបាលបានចាត់ទុកវិស័យនេះ ​គឺជាឆ្អឹងខ្នងនៃសសេដ្ឋកិច្ច ដែល​បានដើរតួយ៉ាងសំខាន់​ ក្នុងការទ្រទ្រង់ការអភិវឌ្ឍសង្គម-សេដ្ឋកិច្ចកម្ពុជា ៕អត្ថបទ៖ សុន រ៉ាឌី