​មី​យ៉ាន់​ម៉ា៖ រដ្ឋាភិបាល​បង្រួបបង្រួម​ជាតិ​គាំទ្រ​ប្រជាធិបតេយ្យ ​របស់​សហភាព​មី​យ៉ាន់​ម៉ា​ដែល​រួម​បញ្ចូល​ទាំង​សមាជិកសភា​ ដែល​ត្រូវបាន​បណ្តេញ​ដោយ​រដ្ឋប្រហារ​យោធា ​បាន​ប្រាប់​ប្លុក​ក្នុង​តំបន់​របស់​អាស៊ីអាគ្នេយ៍​ថា ​ខ្លួន​នឹង​មិន​ចូលរួម​ក្នុង​កិច្ច​ចរចា​ទេ ​លុះត្រាតែ​របប​យោធា​ដោះលែង​អ្នក​ទោស​នយោបាយ​ទាំងអស់​។​

​សមាគម​ប្រជាជាតិ​អាស៊ីអាគ្នេយ៍ (​អាស៊ាន​) ដែល​មាន​សមាជិក ១០ប្រទេស​បាន​ព្យាយាម​ស្វែងរក​មាគ៌ា​មួយ​ សម្រាប់​មី​យ៉ាន់​ម៉ា​ងាកចេញ​​ពី​វិបត្តិ​បង្ហូរ​ឈាម​ ដែល​បង្កឡើង​ដោយ​រដ្ឋប្រហារ​ថ្ងៃ​ទី​១ ខែ​កុម្ភៈ ​និង​បាន​អំពាវនាវ​ឱ្យ​បញ្ឈប់​អំពើ​ហិង្សា ​និង​កិច្ចចរចា​រវាង​ភាគី​ទាំងអស់​។​ ប៉ុន្តែ​របប​យោធា​បាន​បដិសេធ​រួច​ទៅ​ហើយ​ ក្នុង​ការ​ទទួល​យក​សំណើ​ដើម្បី​ដោះស្រាយ​វិបត្តិ​ ដែល​កើត​ចេញពី​កិច្ចប្រជុំ​កំពូល​អាស៊ាន​កាលពី​ចុង​សប្តាហ៍​មុន ​ដែល​មាន​ការចូលរួម​ពី​សំណាក់​ឧត្ដមសេនីយ៍​ Min Aung Hlaing ​ប៉ុន្តែ​គ្មាន​នរណា​ម្នាក់​មកពី​ខាង​ស៊ីវិល​ចូលរួម​ទេ​។​ រដ្ឋាភិបាល​រួបរួម​ជាតិ​គាំទ្រ​លទ្ធិ​ប្រជា​ធិប​តេយ្យ (NUG) ដែល​បាន​បង្កើត​ឡើង​ក្នុង​ខែ​នេះ ​ដោយ​គូប្រជែង​របស់​យោធា​បាន​និយាយ​ថា ​អាស៊ាន​គួរតែ​ចូលរួម​ជាមួយ​ខ្លួន​ក្នុងនាម​ជា​អ្នកតំណាង​ស្របច្បាប់​របស់​ប្រជាជន​។​

​នៅ​ក្នុង​សេចក្ដីថ្លែងការណ៍​មួយ​ នាយករដ្ឋមន្ត្រី​រប​ស់​រដ្ឋាភិបាល​រួបរួម​ជាតិ​លោក Mahn Winn Khaing Thann បាន​និយាយ​ថា ​“មុន​ពេល​ការសន្ទនា​ប្រកបដោយ​ការស្ថាបនា​អាច​កើតឡើង ​ត្រូវ​តែ​មាន​ការ​ដោះ​លែង​អ្នក​ទោស​នយោបាយ​ដោយ​គ្មាន​លក្ខខណ្ឌ ​រួម​ទាំង​លោកប្រធានាធិ​បតី​ Win Myint និង​ទីប្រឹក្សា​រដ្ឋ​លោកស្រី​ Aung San Suu Kyi។​ មិន​មាន​ការ​អត្ថាធិប្បាយ​ភ្លាម​ៗ​ណាមួយ ​ពី​មន្ត្រី​ជាន់ខ្ពស់​នៅ​ក្នុង​ប្លុក​អាស៊ាន​នៅឡើយទេ​៕

អត្ថបទ៖ សុខមាន