ភ្នំពេញ៖ ឯកឧត្តមវេជ្ជបណ្ឌិត ហុក គឹមចេង អគ្គនាយកបច្ចេកទេសសុខាភិបាល នៃក្រសួង​សុខាភិបាល បានស្នើដល់ស្ថាប័នពាក់ព័ន្ធទាំងអស់ រួមសហការគ្នាឱ្យកាន់តែស៊ីជម្រៅ​ថែមទៀត ដើម្បីឱ្យការអនុវត្តផែនការគម្រោង ការងារបង្ការ ថែទាំ និងព្យាបាលអ្នកជំងឺផ្លូវចិត្ត ឱ្យមានភាពស៊ីចង្វាក់គ្នា និងមានប្រសិទ្ធិភាព។

ការថ្លែងរបស់ឯកឧត្តមវេជ្ជបណ្ឌិត ហុក គឹមចេង យ៉ាងដូច្នេះក្នុងកម្មវិធីកិច្ចប្រជុំផ្សព្វផ្សាយ​គម្រោងស្តីពី«ការលើកកម្ពស់សុខភាពផ្លូវចិត្តក្នុងចំណោមប្រជាជនទទួលរងការប៉ះទង្គិចផ្លូវចិត្ត» នៅរាជធានីភ្នំពេញ ខេត្តកំពង់ស្ពឺ ខេត្តកំពង់ឆ្នាំង ខេត្តបាត់ដំបង និងខេត្តសៀមរាប, រយៈពេល២ថ្ងៃ ចាប់ពីថ្ងៃទី១៤ និង១៥ ខែមីនា ឆ្នាំ២០២៣, ដែលជាកិច្ចសហការរៀបចំរវាងនាយកដ្ឋានសុខភាព​ផ្លូវចិត្ត និងការបំពានគ្រឿងញៀន ជាមួយសមាគម អ៊ី.អឹម.ឌី.អា កម្ពុជា (EMDR Cambodia) ដោយមានការគាំទ្រថវិកាពីក្រសួងសហប្រតិបត្តិការសេដ្ឋកិច្ច និងអភិវឌ្ឍន៍អាល្លឺម៉ង់ (BMZ) តាមរយៈអង្គការចូហាន់នីធ័រអន្តរជាតិ (Johanniter)។

ឯកឧត្តមវេជ្ជបណ្ឌិត ហុក គឹមចេង បានលើកឡើងទៀតថា សុខភាពផ្លូវចិត្ត គឺជាអាទិភាពមួយ ក្នុងចំណោមអាទិភាពដទៃទៀតរបស់ក្រសួងសុខាភិបាល។ អង្គការសុខភាពពិភពលោក បានបញ្ជាក់ថា «គ្មានសុខភាពណាដែលគ្មាន សុខភាពផ្លូវចិត្តទេ»។ ការប៉ះទង្គិចមិនមែនកើត​មានតែក្នុងគ្រោះមហន្តរាយ ដូចជាសង្គ្រាមនោះទេ វាអាចកើតមានឡើងក្នុងជីវិតរស់នៅប្រចាំ​ថ្ងៃរបស់យើងផងដែរ ដូចជា អំពើហឹង្សាក្នុងគ្រួសារ គ្រោះថ្នាក់ចរាចរ ភាពស្លុតរន្ធត់ដែលបាន​ជួបប្រទះដោយផ្ទាល់ ឬដោយមិនផ្ទាល់ មានជា អាទិ៍អំពើចោរកម្ម ការទស្សនារូបភាព ឬខ្សែភាពយន្ត ឬទំព័រសារព័ត៌មានជាដើម។ ជំងឺផ្លូវចិត្ត បានកើនឡើងពីប្រមាណ ១០% (ឆ្នាំ២០០១) មក ១៣% (ឆ្នាំ២០២២)។ រីឯ គម្លាតនៃការថែទាំ និងព្យាបាលមានគម្លាតច្រើន។ នៅប្រទេសដែលមានប្រាក់ចំណូលទាប គម្លាតមានប្រមាណ ៧០% ទៅ ៨៥%។

ឯកឧត្តមវេជ្ជបណ្ឌិត ហុក គឹមចេង អគ្គនាយកបច្ចេកទេសសុខាភិបាល បានបញ្ជាក់ថា បច្ចុប្បន្ននៅ​លើសកលលោកបញ្ហាសុខភាពផ្លូវចិត្ត គឺជាបញ្ហាសុខភាពសាធារណៈដ៏ចម្បងមួយ ដែលអង្គការ​សហប្រជាជាតិ បានដាក់បញ្ចូលទៅក្នុងគោលដៅអភិវឌ្ឍប្រកបដោយចីរភាព ពិសេសក្នុងគោលដៅ ៣.៤ សំដៅពង្រឹងវិធីបង្ការ និងព្យាបាលជំងឺផ្លូវចិត្ត ឱ្យកាន់តែទូលំទូលាយថែមទៀត។ ចំណែកកិច្ចប្រជុំនាថ្ងៃនេះ បង្ហាញពីកិច្ចសហការល្អក្នុងភាពជាដៃគូក្នុងការលើកកម្ពស់ និងពង្រឹងកិច្ចសហប្រតិបត្តិការរវាងក្រសួងសុខាភិបាល និងអង្គការមិនមែនរដ្ឋាភិបាល ឱ្យកាន់តែល្អប្រសើរ ដោយផ្តោតទៅលើការថែទាំសុខភាពផ្លូវចិត្ត នៅក្នុងសហគមន៍ ដើម្បីគាំទ្រដល់ការគ្របដណ្តប់សុខភាពជាសកល និងភាពធន់នៃប្រព័ន្ធសុខាភិបាល។ ក្នុងបរិការណ៍នេះ ក្រសួងសុខាភិបាល បានពង្រីកការគ្របដណ្ដប់សេវា និងពង្រឹង ប្រសិទ្ធភាព​នៃការផ្តល់សេវាសុខភាពផ្លូវចិត្ត និងការបំពានគ្រឿងញៀន ដល់ក្រុមគោលដៅ ងាយរងគ្រោះ​ក្នុងព្រះរាជាណាចក្រកម្ពុជា តាមរយៈការធ្វើសមាហរណកម្មសេវាទៅក្នុងសំណុំសកម្មភាព​អប្បរមាសម្រាប់មណ្ឌលសុខភាព និងសំណុំសកម្មភាពបង្រ្គប់សម្រាប់មន្ទីរពេទ្យបង្អែក។ បច្ចុប្បន្នសេវាព្យាបាលផ្លូវចិត្ត និងគ្រឿងញៀន ត្រូវបានគ្របដណ្តប់ចំនួន ៤៥៤កន្លែង នៅទូទាំង២៥ រាជធានី-ខេត្ត ក្នុងនោះមាន៖ មន្ទីរពេទ្យថ្នាក់ជាតិ ចំនួន២កន្លែង (មន្ទីរពេទ្យមិត្តភាពខ្មែរ-សូវៀត និងមន្ទីរពេទ្យមិត្តភាពកម្ពុជា-ចិន ព្រះកុសុមៈ) មន្ទីរពេទ្យបង្អែករាជធានី-ខេត្ត ២៥កន្លែង, មន្ទីរពេទ្យបង្អែកស្រុកប្រតិបត្តិ ៧២កន្លែង និងមណ្ឌលសុខភាព ៣៥៥កន្លែង៕ អត្ថបទ រដ្ឋា