ភ្នំពេញ៖ បើសិនជាមិនមានអ្វីប្រែប្រួលទេនោះ ការនាំសត្វខ្លាធំ ដែលជាអំណោយរបស់ប្រទេស​ឥណ្ឌា មកស្ដារ ឡើងវិញនៅប្រទេសកម្ពុជា ​នឹងត្រូវធ្វើឡើងនៅចុងឆ្នាំនេះ ខណៈតំបន់ស្នូលសម្រាប់​ការរស់នៅរបស់វា ត្រូវបានរៀបចំរួចរាល់ហើយដែរ ។

នាយិកាប្រតិបត្តិអង្គការសម្ព័ន្ធមិត្តសត្វព្រៃ (WA) កញ្ញាបណ្ឌិត ស៊ូវណ្ណា ហ្គោនឡែត បានឲ្យដឹងថា សត្វខ្លាធំ ដែលនឹងត្រូវនាំមកពីប្រទេសឥណ្ឌា ​នឹងត្រូវលែងក្នុងតំបន់ជួរភ្នំក្រវាញ ​ជាតំបន់ដែលសូន្យ អន្ទាក់ ​និងត្រូវបានបំពាក់កាមេរ៉ាតាមដានយ៉ាងយកចិត្តទុកដាក់ពីសំណាក់មន្ត្រីអភិរក្ស។ ទីតាំង ដែលនឹង ត្រូវលែងសត្វខ្លានោះ សម្បូរដោយរំពា សម្រាប់សត្វខ្លា ។

កញ្ញា បានបញ្ជាក់ថា ការនាំសត្វខ្លាធំមកម្ពុជា អាចនឹងដំណើរការបាននៅក្នុងរយៈពេល៩ ឬ១០ ខែទៀត ​ព្រោះតំបន់ស្នូលនៃគម្រោងស្តារសត្វខ្លាធំនៅកម្ពុជាឡើងវិញនេះ ត្រូវបាន​រៀបចំ​រួចរាល់ហើយ ​ដោយរង់ចាំតែធ្វើរបាយការណ៍បញ្ជូនទៅប្រទេសឥណ្ឌាប៉ុណ្ណោះ ។

គម្រោងស្តារសត្វខ្លាធំ ជាគម្រោងរួមគ្នា រវាងរាជរដ្ឋាភិបាលកម្ពុជា និងរដ្ឋាភិបាលឥណ្ឌា ដោយផ្អែក លើការចុះហត្ថលេខាលើអនុស្សរណៈ រវាងប្រទេសទាំងពីរ ​កាលពីពេលថ្មីៗកន្លងមកនេះ ដើម្បី​ជាការបោះ ជំហានទៅមុខជាប្រវត្តិសាស្ត្រ ​សម្រាប់ការអភិរក្សសត្វខ្លាធំ ហើយការស្តារសត្វខ្លាធំ​ក្នុងព្រៃឈើជួរភ្នំក្រវាញ ​នឹងអាចជួយពង្រឹងទៅដល់ការលូតលាស់នៃជីវៈចម្រុះ ។

គម្រោងស្តារសត្វខ្លាធំឡើងវិញនេះ ​បន្ទាប់ពីបាត់វត្តមានពីទឹកដីកម្ពុជា ​កាលពីអំឡុងឆ្នាំ២០០៧ ខណៈនៅទូទាំង​ពិភពលោក ​នៅឆ្នាំ២០១០ ​ត្រូវបានគេប៉ាន់ប្រមាណថា ​មានចំនួនសត្វខ្លាធំ ប្រហែល ៣ ២០០ក្បាល ​ដែលចំនួននេះ ​មានការថយចុះ ៩៥ភាគរយ ​បើធៀបទៅនឹងចំនួនរបស់វា ធ្លាប់មានក្នុងដើម​ ទសវត្សរ៍ ទី២០ ប្រហែល១០ម៉ឺនក្បាល ៕អត្ថបទ៖ បាន សុខរិទ្ធិ