ភ្នំពេញ៖ រដ្ឋមន្រ្ដីក្រសួងសង្គមកិច្ច បញ្ជាក់ថា ក្នុងឆ្នាំ២០២២ ជនមានពិការភាពត្រូវបានផ្ដល់អាទិភាពក្នុង ការជ្រើសរើសឱ្យចូលបម្រើការងារនៅក្នុងក្រសួង ស្ថាប័នរដ្ឋ និងវិស័យ ឯកជន ក្នុងនោះរួមមាន ក្រសួង ស្ថាប័នរដ្ឋចំនួន ៣៧ បានជ្រើសរើសជនមានពិការភាពចូល បម្រើការងារសរុបចំនួន ៣,៧៤៨ នាក់។ ចំណែក វិស័យឯកជនចំនួន ២៩១ សហគ្រាស ធនាគារ គ្រឹះស្ថានមីក្រូ ហិរញ្ញវត្ថុ សណ្ឋាគារ និងរោងចក្រ បានចុះបញ្ជីកានិងទទួលបានវិញ្ញាបនបត លើការអនុវត្តច្បាប់ស្ដីពីកិច្ចការពារ និងលើកកម្ពស់សិទ្ធិជនពិការ ដែលមាន ជនមានពិការភាពចូលបម្រើការងារចំនួន ៥,៨៣៩នាក់ ផងដែរ។

ឯកឧត្ដម វង សូត រដ្ឋមន្រ្ដីក្រសួងសង្គមកិច្ច ថ្លែងក្នុងពិធីបើកសន្និសីទជនមានពិការភាពប្រចាំតំបន់អាស៊ី និងអាស៊ីប៉ាស៊ីហ្វិកលើកទី៥នៅសណ្ឋាគារសុខា រ៉េស៊ីដង់ភ្នំពេញ នៅព្រឹកថ្ងៃទី១៥ ខែមីនា ឆ្នាំ២០២៣នេះ ក្រោមអធិបតីភាពដ៏ខ្ពង់ខ្ពស់របស់សម្ដេចតេជោ ហ៊ុន សែន នាយករដ្ឋមន្ត្រី ។

ឯកឧត្ដម វង សូត បានបញ្ជាក់ថា នៅចំពោះមុខនេះ ក្រសួងសង្គមកិច្ច ក៏បានបើកផ្ដល់បណ្ណសង្គមកិច្ច និងថវិកា របបឧបត្ថម្ភគោលនយោបាយជូនជនមានពិការភាពក្រីកសរុបចំនួន ១៩,៣៧៤ នាក់ និងចំនួន ១៦,៤៨៩ នាក់ទៀត កំពុងរៀបចំបើករបបគោលនយោបាយ។ ជាមួយគ្នានេះ រាជរដ្ឋាភិបាលបានបង្កើតវិទ្យាស្ថានជាតិអប់រំពិសេស ដើម្បីបណ្តុះបណ្តាលគ្រូថ្នាក់អប់រំពិសេសសម្រាប់ជាប្រយោជន៍ដល់សិស្ស មានពិការភាពផងដែរ។

រដ្ឋមន្រ្ដីក្រសួងសង្គមកិច្ច បានឱ្យដឹងថា ក្រោមការដឹកនាំប្រកបដោយគតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងជាប្រធានកិត្តិយសក្រុមប្រឹក្សាសកម្មភាពជនពិការ កម្ពុជាទទួលបានសន្តិភាព សន្តិសុខពេញលេញ និងការរីកចម្រើនលើគ្រប់វិស័យជាពិសេសវិស័យ ពិការភាព តាមរយៈសូចនាករនៃសមិទ្ធផលធំៗជាច្រើន ដោយបានដាក់បញ្ចូលការគិតគូរដល់ជនមានពិការភាព ក្នុងការសាងសង់ ហេដ្ឋារចនាសម្ព័ន្ធសាធារណៈ នៅរដ្ឋបាលថ្នាក់ក្រោមជាតិ ក្នុងគោលបំណង ជួយសម្រួលដល់ជនមានពិការភាព ក្នុងការប្រើប្រាស់សេវាហេដ្ឋារចនា សម្ព័ន្ធសាធារណៈឱ្យកាន់តែមានភាពងាយស្រួលឡើង៕