ភ្នំពេញ៖ ឯកអគ្គរដ្ឋទូតថ្មីអូស្ត្រាលី ប្រចាំនៅកម្ពុជា ឯកឧត្តម Justin Kevin Whyatt បានសន្យា បន្តឈរជាមួយរាជរដ្ឋាភិបាលកម្ពុជា គាំទ្រលើការងារបោសសំអាតមីន ដើម្បីធ្វើឲ្យសម្រេច បានតាមផែនការកម្ពុជាគ្មានមីននៅឆ្នាំ២០២៥ ។

ក្នុងជំនួបជាមួយឯកឧត្តមទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន នៅថ្ងៃទី១៦ ខែមីនា ឆ្នាំ២០២៣ ឯកឧត្តម Justin Kevin Whyatt បានលើកឡើងថា កម្ពុជា និងអូស្ត្រាលី មានភាពជាដៃគូ និង​កិច្ចសហប្រតិបត្តិការជាមួយគ្នា លើគ្រប់វិស័យ ក្នុងនោះរាប់បញ្ចូលទាំងការចូលរួមការងារបោស​សម្អាតមនុស្សធម៌ អស់រយៈពេល ៣០ឆ្នាំ ។

ឯកឧត្តមបានវាយតម្លៃខ្ពស់​ ចំពោះវឌ្ឍនភាព នៃសកម្មភាពមីននៅកម្ពុជា ដោយឃើញពីការយកចិត្ត​ទុកដាក់ និងការតាំងចិត្តខ្ពស់ ​ពីរាជរដ្ឋាភិបាលកម្ពុជា​ ក្នុងការដោះស្រាយបញ្ហាមីនឲ្យអស់​ត្រឹមឆ្នាំ២០២៥​ ក៏ដូចជាការចូលរួមយ៉ាង​ផុលផុស​ពីវិស័យឯកជន ​និងសប្បុរសជននានា ។

ជាមួយនេះឯកឧត្តមអគ្គរដ្ឋទូត ​បានសន្យាថា ប្រទេសអូស្រ្តាលី នឹងបន្តឈរជាមួយរាជរដ្ឋាភិបាល​កម្ពុជា ​គាំទ្រដល់ការងារបោសសម្អាតមីនមនុស្សធម៌ រហូតដល់ឆ្នាំ២០២៥ និងរីករាយក្នុងភាព​ជាដៃគូ និងកិច្ចប្រតិបត្តិសហការជាមួយអាជ្ញាធរមីន ។

ក្នុងជំនួបនោះ ឯកឧត្តមទេសរដ្ឋមន្រ្តី លី ធុជ មានប្រសាសន៍ថា អូស្រ្តាលី គឺជាដៃគូមួយ​យ៉ាង​សំខាន់ ក្នុងការងារបោសសម្អាតមីនមនុស្សធម៌​ ដោយពេលបច្ចុប្បន្ននេះ កំពុងចូលរួមវិភាគ​ទាន​តាមរយៈគម្រោងបោសសម្អាតមីនដើម្បីលទ្ធផល ​ហើយក្រៅពីការងារបោសសម្អាតមីន ក៏បាន​ចូលរួម​ដល់កសាងសមត្ថភាព​ និងការគាំទ្រដល់ការរៀបចំផែនការយុទ្ធសាស្រ្តជាតិសកម្មភាពមីន ២០១៨-២០២៥ ផងដែរ ។

ជាមួយនេះឯកឧត្តម លី ធុជ ក៏បានវាយតម្លៃខ្ពស់ ចំពោះទំនាក់ទំនងយ៉ាងជិតស្និទ្ធ ​រវាងប្រទេស និងប្រជាជនទាំងពីរ ​ព្រមទាំងថ្លែងអំណរគុណយ៉ាងជ្រាលជ្រៅ ​ជូនចំពោះរដ្ឋាភិបាល និងប្រជាជន​អូស្រ្តាលី ដែលបានចូលរួមក្នុងការស្វែងរកសុខសន្តិភាព និងការអភិវឌ្ឍនៅកម្ពុជា ចាប់តាំង​ពីឆ្នាំ១៩៩២ ក៏ដូចជាចូលរួមដល់ការងារបោសសម្អាតមីនមនុស្សធម៌ នៅកម្ពុជាផងដែរ ៕ អត្ថបទ បាន សុខរិទ្ធិ