ភ្នំពេញ ៖ ឯកឧត្តម ហ៊ុន ម៉ាណែត ជាបេក្ខភាពនាយករដ្ឋមន្រ្តីនៃព្រះរាជាណាចក្រកម្ពុជានាពេលអនាគត បានថ្លែងថា

ការកើនឡើងនៃចំនួនប្រជាពលរដ្ឋគោរពប្រតិបត្តិនូវសាសនា អាចជួយកាត់បន្ថយនូវ​បញ្ហាអវិជ្ជមាននានា​នៅក្នុង​សង្គមបានច្រើន និងអាចពង្រឹងភាពសុខដុមរមនាក្នុងគ្រួសារបានផងដែរ។

ក្នុងឱកាសអញ្ជើញចូលរួមពិធីសម្ពោធសមិទ្ធផលនានា និងស្រោចស្រពព្រះសុគន្ធវារី នៅក្នុងវត្តធម្មវិបស្សនារាម

ហៅ​វត្តតាភេម នារាជធានីភ្នំពេញ នៅថ្ងៃទី១៦ ខែមីនា ឆ្នាំ២០២៣នេះ ឯកឧត្តម ហ៊ុន ម៉ាណែត បានលើក​ឡើង​ថា«សាសនាមានឥទ្ធិពលសកម្មនៅក្នុងសង្គមជាតិ និងសង្គមគ្រួសារ ក៏ដូចជាចំពោះបុគ្គលម្នាក់ៗ។ ការកើនទ្បើងនៃចំនួនប្រជាពលរដ្ឋដែលគោរពប្រតិបត្តិសាសនា អាចជួយកាត់បន្ថយនូវបញ្ហា​អវិជ្ជមាន​​នានាក្នុងសង្គម, ពង្រឹងភាពសុខដុមរមនាក្នុងគ្រួសារ និងចូលរួមចំណែកដល់ការអភិវឌ្ឍធនធានមនុស្សជាដើម»។

ក្នុងន័យនេះទំនាក់ទំនងជិតស្និទ្ធរវាងការអប់រំផ្នែកសាសនា និងផ្នែកវិទ្យាសាស្ត្រ ចាំបាច់ត្រូវដើរទន្ទឹមគ្នា ដើម្បីធានា​បាននូវការផលិតមូលធនមនុស្សគ្រប់ជំនាន់របស់កម្ពុជាប្រកបដោយចំណេះដឹងជំនាញ និងគុណធម៌ ជាប្រយោជន៍​ដល់ប្រទេសជាតិក្នុងការរក្សាបាននូវភាពឯករាជ្យម្ចាស់ការលើគ្រប់វិស័យ និងឈានទៅប្រកួត​ប្រជែងទាំង​ក្នុងកម្រិត​តំបន់ និងសាកលលោក។

ឯកឧត្តមបានបន្តទៀតថា រាជរដ្ឋាភិបាលដែលដឹកនាំដោយ សម្តេចតេជោ ជាប្រមុខបានប្តេជ្ញាបន្តកសាង និងអភិវឌ្ឍ​ប្រទេសឱ្យបានកាន់តែរីកចម្រើនរុងរឿងទាំងក្នុងវិស័យសាសនា និងផ្នែកអាណាចក្រ តាមរយៈការ​ខិតខំ​កែ​លម្អរាល់​ចំណុចខ្វះខាតព្រមទាំងពង្រឹង និងពង្រីកឥតឈប់ឈរនូវសមិទ្ធផលវិជ្ជមានឱ្យបានច្រើនបន្ថែមទៀត សំដៅដឹក​នាំនាវា​កម្ពុជាឆ្ពោះទៅកាន់ភាពរុងរឿងសម្បូរសប្បាយគ្រប់ៗជំនាន់តរៀងទៅ។

 យ៉ាងណាក៏ដោយនៅក្នុងពិធីខាងលើនេះដែរ ឯកឧត្តម ហ៊ុន ម៉ាណែត ក៏សូមចូលរួមអបអរសាទរ និងអនុមោទនា​ត្រេកអរចំពោះសមិទ្ធផលជាច្រើន ដែលកើតមានទ្បើងក្នុងទីអារាម​ដ៏ចំណាស់ក្នុងរាជធានីភ្នំពេញ​ជាមួយនឹង​អាយុកាល​ប្រមាណជាង១៩០ឆ្នាំដោយសមិទ្ធផលទាំងនេះបាន​កើត​ចេញសិល្បៈ​នៃការ​ចែករំលែកដ៏ពិសិដ្ឋរបស់ខ្មែរ ដែលកំពុងត្រូវបានបន្តប្រកាន់ខ្ជាប់ និងប្រតិបត្តិយ៉ាងទូលំទូលាយ ដោយសារឱកាសនៃសុខសន្តិភាព និងស្ថិរភាព ព្រមជាមួយនឹងជីវភាពតែប្រសើរធូរធារបស់ប្រជាពលរដ្ឋ។ វឌ្ឍនភាពនេះ ក៏មិនអាចកាត់ផ្តាច់​បានពីការបង្ក​លក្ខណៈគ្រប់បែបយ៉ាងរបស់រាជរដ្ឋាភិបាល ក្រសួងធម្មការ និងសាសនា អាជ្ញាធរដែនដីគ្រប់លំដាប់ថ្នាក់ កងកម្លាំងប្រដាប់អាវុធគ្រប់ប្រភេទ និងក្រុមការងារចុះជួយមូលដ្ឋានគ្រប់យន្តការ ដែលបានយក​ចិត្តទុកដាក់​ក្នុងការបំពេញភារកិច្ចបម្រើជាតិ និងប្រជាជននោះ៕ ដោយ ៖ បាន ចក់