​បាល់ទាត់៖ ​ក្រុម​នាំមុខគេ​នៅ English Premier League កាំភ្លើង​ធំ Arsenal បាន​ធ្លាក់​ពី​ក្របខណ្ឌ​អឺរ៉ុប UEFA Europa League ហើយ​ត្រឹម​វគ្គ ១៦ ក្រុម​ចុងក្រោយ​បន្ទាប់ពី​ចាញ់ Sporting Lisbon ដោយ​បាល់ ១១ម៉ែត្រ​កាត់សេចក្តី​។ ​​បន្ទាប់​ពី​ស្មើគ្នា ២-២ នៅ​ទឹកដី​ព័រទុយហ្កាល់ Arsenal ត្រលប់មក​ទឹកដី​របស់ខ្លួន​វិញ​ចាប់ផ្តើម​បានល្អ ក្រោយ​រកបាន​គ្រាប់​នាំមុខ​នៅ​នាទី​ទី ១៩ ដោយ Granit Xhaka សល់​ពី​ការ​ស៊ុត​របស់ Gabriel Martinelli​។

​បាន​ឈានចូល​វគ្គ​ទី ២ នៅ​នាទី​ទី ៦២ Sporting Lisbon ក៏​តាម​ស្មើ​វិញ​បាន​ដោយ​បាល់​ស៊ុត​តាំងពី​ពាក់កណ្តាល​តារាង​របស់ Pedro Goncalves ហើយក៏​ជា​គ្រាប់​បាល់​ដ៏​មាន​សារសំខាន់​ ដែល​អូសបន្លាយ​ឱ្យ​ក្រុម​ទាំងពីរ​ឈានដល់ម៉ោង​បន្ថែម ១៥ នាទី​ពីរដង និង​ថែមទាំង​ដល់​វគ្គ ១១ម៉ែត្រ​កាត់សេចក្តី​។ ​​ឈានដល់​វគ្គ ១១ម៉ែត្រ​គ្រប់គ្នា​សុទ្ធតែ​ធ្វើបាន​សម្រេច មុនពេល​ដែល Gabriel Martinelli ត្រូវ​សង្គ្រោះ​ដោយ​អ្នកចាំទី Lisbon, Adan​។ ​បរាជ័យ​នេះ​បានបញ្ចប់​ដំណើរ​ឈ្នះ ៦ប្រកួត​ជាប់​គ្នា​គ្រប់​ក្របខណ្ឌ​របស់ Arsenal ខណៈ​អ្នកចាត់ការ Mikel Arteta បារម្ភ​បរាជ័យ​នៅ Europa League អាច​ប៉ះពាល់​ទឹកចិត្ត​កីឡាករ​សម្រាប់​ការផ្តោត​អារម្មណ៍​នៅ English Premier League​។

​​ងាក​មក​លទ្ធផល​ផ្សេងទៀត ក្រុម​បិសាច​ក្រហម Manchester United បាន​បន្តដំណើរ​ឡើង​វគ្គ ៨ ក្រុម​ចុងក្រោយ បន្ទាប់ពី​យកឈ្នះ​នៅ​ទឹកដី Real Betis ១-០ ដោយ​គ្រាប់​បាល់​ពី​ចំងាយ​របស់ Marcus Rashford​។ ​ក្រុម​របស់លោក Erik ten Hag នៅតែ​បន្តដំណើរ​សម្រេច​ក្តី​ស្រមៃ​ចង់​លើក​ពាន ៤ ក្នុង​មួយ​រដូវ​កាល​ក្រោយ​ឈ្នះ​សរុប​ទាំងពីរ​ជើង ៥-១​។ ​ក្រៅពី Manchester United និង Sporting Lisbon ក្រុម​ផ្សេងទៀត​ដែល​ឡើង​វគ្គ ៨ ក្រុម​រួមមាន Roma, Feyenoord, Sevilla, Juventus, Leverkusen និង Union Saint-Gilloise​។ ​ការចាប់​ឆ្នោត​បែងចែក​គូប្រកួត​វគ្គ ៨ ក្រុម​ចុងក្រោយ​នឹងធ្វើ​ឡើង​ថ្ងៃ​សុក្រ​នេះ​៕

អត្ថបទ​៖​នាង​សុភា​វុ​ធ