​បារាំង៖ យោង​តាម​សារព័ត៌មាន Agence France Presse ការ​តវ៉ា​ប្រឆាំង​កំណែទម្រង់​របស់​លោក​ប្រធានាធិបតី​បារាំង Emmanuel Macron បាន​ក្លាយ​ជា​អំពើ​ហិង្សា​កាលពី​យប់​ថ្ងៃ​សៅរ៍ ជា​យប់​ទី​៣ ក្រោយ​ក្រុម​អ្នក​តវ៉ា​រាប់​ពាន់​នាក់​បាន​ប្រមូល​ផ្ដុំគ្នា​នៅ​ទីសាធារណៈ Place d'Italie ជាទី​ដែល​មនុស្ស​មួយ​ចំនួន​បាន​ដុត​ធុងសំរាម។ មនុស្ស​ចំនួន​ ៨១​នាក់​ត្រូវ​បាន​ចាប់ខ្លួន​។

​

នៅ​ទីសាធារណៈ Place d’Italie ក្នុង​ភាគខាងត្បូង​ទីក្រុង​ប៉ារីស ក្រុមអ្នកតវ៉ា​បាន​ស្រែកថា លោក Macron លាលែង​ពី​តំណែង​ទៅ លោក Macron ចុះ​ចេញពី​តំណែង​ទៅ​។​ យើង​នឹង​ឈ្នះ។ ​នគរបាល​បាន​ប្រើ​ឧស្ម័ន​បង្ហៀរ​ទឹកភ្នែក ហើយ​បាន​ប៉ះទង្គិច​គ្នា​ជាមួយ​នគរបាល ​ខណៈ​ធុងសំរាម​ជាច្រើន​ត្រូវ​បាន​ដុត​ឆេះ​យ៉ាង​សន្ធោសន្ធៅ។ ​ក្រុម​អ្នក​តវ៉ា​កំពុង​ព្យាយាម​ដាក់​សម្ពាធ​ក្រុម​តំណាងរាស្ត្រ ​ដើម្បី​ប្រឆាំង​ការដំឡើង​អាយុ​ចូលនិវត្តន៍​គ្មាន​ប្រជាប្រិយភាព​របស់​រដ្ឋាភិបាល​លោក Macron ដែល​លោក​កំពុង​ព្យាយាម​អនុវត្តន៍​ដោយ​គ្មាន​ការបោះឆ្នោត​នៅ​ក្នុង​សភា​។ ​ការតវ៉ា​ស្ងៀមស្ងាត់​ដ៏​ធំ​ទាំងឡាយ​ត្រូវ​បាន​ធ្វើឡើង​ ក្នុង​ទីក្រុង​ផ្សេងៗ​ជាច្រើន​របស់​ប្រទេស​បារាំង រួម​ទាំង​ទីក្រុង Nantes និង​ទីក្រុង Marseille ​ជាទី​ដែល​ក្រុម​អ្នក​តវ៉ា​បាន​ទម្លាយ​រនាំង​គរ​បាល ​ដើម្បី​ចូល​គ្រប់គ្រង​ស្ថានីយ​រថភ្លើង​ដ៏​សំខាន់​រយៈពេល​ជិត ​១៥​នាទី​។

នៅ​ក្នុង​ទីក្រុង Besançon ភាគ​ខាងកើត ក្រុម​អ្នកតវ៉ា​រាប់ពាន់​បាន​ដុត​ភ្លើង និង​ដុត​កាត​បោះឆ្នោត​។ ​ការ​កើន​ឡើង​ភាព​រំជើបរំជួល និង​កូដកម្ម​នានា​បាន​បង្ខំ​ឲ្យ​លោក​ប្រធានាធិបតី Emmanuel Macron ប្រឈម​កាន់​តែ​ខ្លាំង​ចំពោះ​អំណាច​របស់​លោក​ ចាប់​តាំង​ពី​អ្វី​ដែល​គេ​ហៅថា​ ជា​ការ​តវ៉ា​ប្រឆាំង​រដ្ឋាភិបាល​អាវកាក់​លឿង ឬ (Yellow Vests) កាលពី ​៤​ឆ្នាំមុន​។​ គួរ​រម្លឹក​ថា ​ការ​កែ​ប្រែ​របស់​លោក Macron ក្នុង​ការ​ដំឡើង​អាយុ​ចូលនិវត្តន៍​ពី ​៦២​ឆ្នាំ​ដល់ ​៦៤​ឆ្នាំ ដែល​រដ្ឋាភិបាល​និយាយ​ថា វា​មាន​សារៈសំខាន់​ក្នុង​ការ​ធានា​ប្រព័ន្ធ​នេះ​កុំ​ឲ្យ​ដួល​រលំ​៕ អត្ថបទ៖ សុខមាន