ភ្នំពេញ៖ ក្រសួងបរិស្ថាន និងអង្គការអភិរក្សអន្តរជាតិ (CI) កំពុងខិតខំទាញយកអត្ថប្រយោជន៍​សារធាតុកាបូន ពីដែនជម្រកសត្វព្រៃព្រៃឡង់ នាំទៅកាន់ទីផ្សារ តាមរយៈការអនុវត្តនូវ​គម្រោង​មួយចំនួន ដើម្បីការពារព្រៃឈើ ក្នុងតំបន់ព្រៃឡង់ ។

ក្នុងសិក្ខាសាលាបូកសរុបលទ្ធផលការងារឆ្នាំ២០២២ និងលើកទិសដៅអនុវត្តបន្តនៅឆ្នាំ២០២៣ នៃគម្រោងអភិរក្សដែនជម្រកសត្វព្រៃ ព្រៃឡង់​ នៅថ្ងៃទី២០ ខែមីនា ឆ្នាំ២០២៣​ ឯកឧត្តម សៅ សុភាព មានប្រសាសន៍ថា កាលពីឆ្នាំ២០១៨ ក្រសួងបរិស្ថាន អង្គការ CI និងក្រុមហ៊ុនជប៉ុន MITSUI បាន​ឯកភាពចុះហត្ថលេខាលើកិច្ចព្រមព្រៀង​ នៃគម្រោងអភិរក្សព្រៃឈើ តំបន់ព្រៃឡង់ ចំនួន ២ដំណាក់កាល គឺដំណាក់កាលទី១. ឆ្នាំ២០១៨-២០២១ និងដំណាក់កាលទី២. ឆ្នាំ២០២១-២០២៦ ។

ឯកឧត្តម បានបន្តថា គោលបំណងនៃកិច្ចព្រមព្រៀងនេះ គឺបង្ហាញពីការប្ដេជ្ញាចិត្តចូលរួម​ចំណែក​របស់​ក្រុមហ៊ុនអន្តរជាតិ ​និងអង្គការដៃគូនានា ក្នុងការការពារ ​និងអភិរក្សធនធានព្រៃឈើកម្ពុជា នៅក្រោមក្របខណ្ឌយន្តការឥណទានកាបូនរួមគ្នា ​ដែលជាយន្តការទ្វេរភាគីថ្មីមួយសម្រាប់កម្ពុជា និង​ជប៉ុន ក្នុងភាពជាដៃគូជំរុញការអភិវឌ្ឍបៃតង ​បញ្ចេញកាបូនតិចនៅកម្ពុជា ប៉ុន្តែសម្រាប់​ការ​ទាញ​យកកាបូន ​ក្នុងដំណាក់កាលទី១ ​គឺមិនទាន់អាចនាំចេញទៅកាន់ទីផ្សារបាននៅឡើយទេ ។

លោក អ៊ុ សូនី ប្រធានប្រចាំតំបន់ ​នៃអង្គការអភិរក្សអន្តរជាតិ ​លើកឡើងថា ក្នុងការងារ​អភិរក្សជម្រកស្វព្រៃព្រៃឡង់ ​នឹងអាចទាញយកកាបូនបាននោះ ​គឺភាគីនានាកំពុងខិតខំការពារ តាម​រយៈការដើរល្បាត ការដាក់ឧបករណ៍បច្ចេកវិទ្យាផ្ដល់​ព័ត៌មានពីបទល្មើសព្រៃឈើ រួមទាំងការ​កៀគរនូវថវិកា ​និងស្នើទៅក្រសួងបរិស្ថានបង្កើន​ចំនួនមន្ត្រីឧទ្យានុរក្ស និងអប់រំផ្សព្វផ្សាយ​ទៅប្រជាពលរដ្ឋ ឲ្យចូលរួមថែរក្សាព្រៃឈើ សត្វព្រៃជាដើម ។

គួរបញ្ជាក់ថា ដែនជម្រកសត្វព្រៃ ព្រៃឡង់ ​គឺជាព្រៃវាលទំនាប់ត្រូពិចចុងក្រោយ និងធំជាងគេបំផុត​ក្នុងចំណោមព្រៃទំនាប់នៅតំបន់អាស៊ីអាគ្នេយ៍ ​មានផ្ទៃដីសរុបជាង​ ៤៣ម៉ឺនហិកតា គ្របដណ្ដប់​លើខេត្តចំនួន៤ មានខេត្តកំពង់ធំ ក្រចេះ ព្រះវិហារ ​និងខេត្តស្ទឹងត្រែង ​ដោយព្រៃនេះ មាន​សត្វព្រៃកម្រជាច្រើនប្រភេទកំពុងរស់នៅ ​និងមានដើមឈើធំៗ​ ហើយព្រៃឡង់ ថែមទាំង​ជួយការពារនូវគ្រោះទឹកជំនន់ និងគ្រោះរាំងស្ងួតផងដែរ ៕