ភ្នំពេញ៖ បច្ចុប្បន្ននៅក្នុងតំបន់ព្រៃឡង់ មានសត្វព្រៃចំនួន៥៥ប្រភេទ កំពុងរស់នៅ ដោយសត្វ ទាំងអស់នោះ កំពុងត្រូវបានក្រសួងបរិស្ថាន និងអង្គការអភិរក្សអន្តរជាតិ (CI) រួមទាំងដៃគូផ្សេងៗទៀត កំពុងខិតខំធ្វើការអភិរក្ស តាមរយៈការការពារព្រៃឈើ និងការដាំដើមឈើឡើងវិញ នៅក្នុងតំបន់ព្រៃឡង់ជាដើម ។

យោងតាមលទ្ធផល នៃសិក្ខសាលាបូកលទ្ធផលការងារ ឆ្នាំ២០២២ និងលើកទិសដៅ អនុវត្តបន្តឆ្នាំ២០២៣ នៃគម្រោងអភិរក្សដែនជម្រកសត្វព្រៃ “ព្រៃឡង់” នាថ្ងៃទី២០ ខែមីនា ឆ្នាំ២០២៣ បានឲ្យដឹងថា ក្នុងការការពារព្រៃឈើ និងអភិរក្សសត្វព្រៃ មន្ត្រីឧទ្យានុរក្សបានបំពាក់ កាម៉េរាចំនួន១៥៥ ហើយកត់ត្រាសត្វព្រៃបានចំនួន ៥៥ប្រភេទ ក្នុងនោះមានថនិកសត្វចំនួន ១៩ប្រភេទ បក្សី៣៤ប្រភេទ និងពពួកល្មូនចំនួន ២ប្រភេទ ។

ក្នុងលទ្ធផលនេះ បានបន្តថា ការអនុត្តន៍ការងារសហគមន៍ និងបង្កើនជីវភាពសហគមន៍ គឺក្រសួង និងអង្គការដៃគូ បានបង្កើតមូលនិធិខ្នាតតូចចំនួន ១សហគមន៍ ទទួលបានថវិកាពី ៤ ០០០ ទៅ៥០០០ដុល្លារ, បានផ្សព្វផ្សាយរេដបូក គឺផ្សព្វផ្សាយបានជាង ៥០ភូមិ គោលដៅនៅជុំវិញដែនជម្រកសត្វព្រៃ “ព្រៃឡង់” និងជួយការងារជីវភាពសហកមន៍បានចំនួន ៦ភូមិ ក្នុងខេត្តកំពង់ធំ លើការងារចិញ្ចឹមមាន់ ។

សម្រាប់គម្រោងឥណទានកាបូនរួមគ្នា រេដបូកព្រៃឡង់ រយៈពេល នៃការអនុវត្តគម្រោង១៣ឆ្នាំ (២០១៨-២០៣១) ដែលមានកិច្ចព្រមព្រៀងទ្វេភាគីរវាងរាជរដ្ឋាភិបាលជប៉ុន និងរាជរដ្ឋាភិបាលកម្ពុជាក្នុងឆ្នាំ២០១៥ មានភូមិគោលដៅសរុប ៤៩ភូមិ ក្នុងនោះខេត្តកំពង់ធំ ចំនួន១៥ភូមិ, ព្រះវិហារ ចំនួន១៥ភូមិ, ក្រចេះ ចំនួន៥ភូមិ និងខេត្តស្ទឹងត្រែង ចំនួន១៤ភូមិ ។

ការអនុវត្តច្បាប់ ក្នុងឆ្នាំ២០២២ របស់មន្ទីរបរិស្ថានខេត្តទាំង៤ គឺបានល្បាតចំនួន ១៣៩៥លើក រកឃើញទីតាំងលួចកាប់រានចំនួន ៧០១កន្លែង ស្មើនឹង ១៦៣៤,៨៨៥ហិកតា ហើយបានចងក្រងសំណុំរឿងបទល្មើសធនធានធម្មជាតិបានចំនួន ៦៣ករណី, ពិន័យអន្តរការណ៍ ៦ករណី, ដកហូតម៉ាស៊ីនរណារយន្តបានចំនួន ១៤០គ្រឿង, ដកហូតបានកាំភ្លើងកែច្នៃ ៧៩ដើម, ដកហូតអន្ទាក់ចាប់សត្វព្រៃបានចំនួន ២០៦៤អន្ទាក់, ឧបករណ៍ឆក់ត្រីបានចំនួន ២គ្រឿង, បំផ្លាញចោលតង់កៅស៊ូ និងខ្ទមបានចំនួន ៩០ករណី, រឹបអូសឈើបានចំនួន ១១៧ករណី ស្មើនឹង ៧៣,០៤៧ ម៉ែត្រគូប, រឹបអូសមធ្យោបាយដឹកជញ្ជូន ២២គ្រឿង ។

ក្រៅពីការអនុវត្តច្បាប់ មន្ត្រីបានអង្កេតលើសត្វរស់បានចំនួន ១៧៩១លើក ស្មើនឹង ១១៧ប្រភេទ, អង្កេតលើសត្វបានចំនួន ១០១២លើក ស្មើនឹង ៥០ប្រភេទ, ដាក់ស្លាកបំរាម ហាមប្រព្រឹត្តបទល្មើសបានចំនួន ១៩២ស្លាក, ក្រុមពិភាក្សាត្រូវបានបែងចែកជា ៤ក្រុម នៅតាមខេត្តនីមួយៗ ដោយពិភាក្សាលើប្រធានបទដូចគ្នា ខ្សែច្រវាក់លទ្ធផល នៃដែនជម្រកសត្វព្រៃ “ព្រៃឡង់” ៕អត្ថបទ ÷ បាន សុខរិទ្ធិ