​ឥណ្ឌា៖ ប្រទេស​ឥណ្ឌា​ត្រូវបាន​រំខាន​ម្តងទៀត​ក្នុងការ​ដាច់​ប្រព័ន្ធ​អ៊ីនធឺណិត​នៅ​ទូទាំង​រដ្ឋ Punjab ខណៈ​អាជ្ញាធរ​ស្វែងរក​ជន​ផ្តាច់ខ្លួន​សាសនា Sikh​។ សារព័ត៌មាន The Washington Post បាន​រាយការណ៍​ថា លោក Amritpal Singh តាម​ការចោទប្រកាន់​កំពុង​បង្កើត​ភាព​ចលាចល​ដ៏​ធំ​ដែល​កំពុង​រាលដាល ដោយ​ជំរុញ​ឱ្យ​អាជ្ញាធរ​ក្នុង​តំបន់​បិទ​បណ្តាញ​អ៊ីនធឺណិត​កាលពី​ចុង​សប្តាហ៍ ហើយ​បាន​បន្ថែម​ពេល​រហូតដល់​ថ្ងៃ​ចន្ទ​សម្រាប់​រយៈពេល ២៤ម៉ោង​ទៀត​។

អាជ្ញាធរ​រដ្ឋ Punjab បាន​ផ្តាច់​អ៊ីន​ធឺ​ណិ​ត​សម្រាប់​ពលរដ្ឋ​ចំនួន ២៧​លាន​នាក់​ដើម្បី​ទប់ស្កាត់​ភាពចលាចល និង​តាម​ដាន​នូវ​អ្វីដែល​អាជ្ញាធរ​ចាត់ទុកថា «​ព័ត៌មាន​ក្លែងក្លាយ​»​។ លោក Singh ទទួល​បាន​ភាព​លេច​ធ្លោ​នៅ​ក្នុង​ចលនា​ជន​ផ្តាច់ខ្លួន Khalistan ដែល​បំផុស​គំនិត​នៃ​ការ​បង្កើត​រដ្ឋ​អធិបតេយ្យ​មួយ​នៅ​រដ្ឋ Punjab។ ប្រជាប្រិយភាព​របស់លោក​បាន​កើនឡើង​យ៉ាងខ្លាំង​កាលពី​ខែកុម្ភៈ នៅពេលដែល​អ្នកគាំទ្ររ​បស់​លោក​បាន​ប្រមូល​ផ្តុំគ្នាសម្រុកចូល​ប៉ុស្តិ៍នគរបាល​ ជា​កន្លែង​ដែល​អ្នកគាំទ្រ​ម្នាក់ទៀត​ត្រូវបាន​ចាប់ខ្លួន​ដាក់ពន្ធនាគារ​។​ រដ្ឋាភិបាល​ឥណ្ឌាបានដាក់​ឲ្យ​នៅក្រៅ​ច្បាប់​ក្រុម​ផ្តាច់ខ្លួន Khalistan ដែល​បច្ចុប្បន្ននេះ​មាន​អ្នកគាំទ្រ​ច្រើន​នៅ​ទូទាំង​រដ្ឋ Punjab ហើយ​បានទាមទារ​រដ្ឋ​ឯករាជ្យ​មួយ​អស់​ជាច្រើន​ទសវត្សរ៍​មកហើយ​។

សារព័ត៌មាន Asian Times បាន​រាយការណ៍​ថា យោធា និង​នគរបាលត្រូវបាន​ដាក់ពង្រាយ​ទៅកាន់​រដ្ឋ Punjab កាលពី​ថ្ងៃអាទិត្យ ហើយ​បាន​ចាប់ខ្លួន​មនុស្ស ១១២នាក់​សម្រាប់​ការតវ៉ា​ដោយមាន​ដាវ និង​ដំបង ស្ថិតនៅតាម​ដងផ្លូវ​ទាមទារ​សេរីភាព​សម្រាប់​លោក Singh។ ក្រុម​អ្នកគាំទ្រ​ដែល​កំពុងតែ​រីក​រាលដាល​នៅ​ទូទាំងប្រទេស​អង់គ្លេស និង​កាណាដាបាន​សម្រុកចូល​ស្ថានទូត​ឥណ្ឌា​នៅ​ទីក្រុង​ឡុង​ដ៍ ដោយ​បំបែក​បង្អួច និង​គ្រវីទង់ជាតិ​ក្រុម​ផ្តាច់ខ្លួន Khalistan​។ អង្គការ​សាសនា Sikh ពិភពលោក​របស់​ប្រទេស​កាណាដា (WSO) បានចេញ​សេចក្តីប្រកាស​ព័ត៌មាន​កាលពី​ថ្ងៃអាទិត្យដោយ​​និយាយថា ​ខ្លួន​ថ្កោលទោស​ប្រតិបត្តិការ​សន្តិសុខ​នៅក្នុង​រដ្ឋ Punjab និង​បំណង​បន្ត​ដើម្បី​ចាប់ ​និង​ឃាត់ខ្លួន​លោក Singh៕

អត្ថបទ៖ ប៊ុនថន