កំពង់ចាម៖ គណៈកម្មាធិការជាតិរៀបចំការបោះឆ្នោត (គ.ជ.ប) ​បានបិទបញ្ចប់ដំណើរការកំណែ​ជ្រើសរើស​មន្រ្តីលេខាធិការដ្ឋាននៃគណៈកម្មការរៀបចំការបោះឆ្នោតនៅ​ទូទាំង​ប្រទេស ដែល​នឹងត្រូវចូលរួមបម្រើដល់ការបោះឆ្នោតជ្រើសតាំងតំណាងរាស្រ្ត ​នីតិកាលទី៧ខាងមុខ។

បន្ទាប់ពីដំណើរការប្រឡងជ្រើសរើសមន្រ្តីលេខាធិការដ្ឋាននៃគណៈកម្មការរៀបចំការបោះឆ្នោតតាមបណ្តារាជធានី-ខេត្ត ​បាន​បញ្ចប់កាលពីម្សិលមិញនេះ ​នៅថ្ងៃទី២១​ ខែមីនា ឆ្នាំ២០២៣ គណៈកម្មការរៀបចំ​ការបោះឆ្នោតនៅទូទាំងបានឈានមកដល់ដំណើរ​ការធ្វើកំណែ​លើវិញ្ញាសារបស់បេក្ខជន។ ជាក់ស្តែង គណៈកម្មការរៀបចំការបោះឆ្នោតខេត្តកំពង់ចាម បានចាប់​ដំណើរការពិនិត្យ និងកំណែរួចរាល់លើវិញ្ញាសារបស់បេក្ខជនគ្រប់រូប ​ដើម្បីបញ្ជូន និងផ្តល់ការ​សម្រេចដោយគណៈកម្មាធិការជាតិរៀបចំការបោះឆ្នោត។

លោក ឈីម ចាន់ធឿន ប្រធានគណៈកម្មការរៀបចំការបោះឆ្នោតខេត្តកំពង់ចាម ​បញ្ជាក់ថា ការធ្វើកំណែលើវិញ្ញាសារបស់បេក្ខជនត្រូវបានបិទបញ្ចប់ ​ហើយត្រួតពិនិត្យយ៉ាងម៉ត់ចត់ ដើម្បីធានា​អំពីសមត្ថភាព​ និងបទពិសោធន៍របស់បេក្ខជននីមួយៗ។

ប្រធានគណៈកម្មការរៀបចំការបោះឆ្នោតខេត្តកំពង់ចាម ​គូសបញ្ជាក់ទៀតថា ចំពោះមន្រ្តី​លេខាធិការ​ដ្ឋាននៃគណៈកម្មការរៀបចំការបោះឆ្នោតខេត្ត គ្រប់រូបត្រូវបានឆ្លងកាត់ការ​ពង្រឹងផ្នែកធនធាន និងសមត្ថភាពច្បាស់លាស់​ធ្វើយ៉ាង​ណា​ឲ្យការអនុវត្តរបស់​មន្រ្តីទាំងអស់​ឈរលើស្មារតី​មិន​លម្អៀង​ និងអព្យាក្រិតភាពក្នុងតួនាទីរបស់ខ្លួន។

ការបោះឆ្នោតជ្រើសរើសតំណាងរាស្រ្ត ​នីតិកាលទី៧នេះ គ.ជ.ប រៀបចំការជ្រើសរើសមន្រ្តីជិត ១៥ម៉ឺននាក់ ​ដើម្បីជួយដល់ដំណើរទាំងមូល​នៃការ​បោះឆ្នោតជ្រើសរើស​តាំងតំណាងរាស្រ្ត ក៏ដូចជា​ការិយាល័យបោះឆ្នោតនៅទូទាំងប្រទេសជាង​ ២ម៉ឺនការិយាល័យផងដែរ។

ការបោះឆ្នោតជ្រើសរើសតំណាងរាស្រ្ត នីតិកាលទី៧ ​នឹងប្រព្រឹត្តទៅនៅថ្ងៃទី២៣​ ខែកក្កដា ឆ្នាំ​២០២៣ ខណៈប្រជាពលរដ្ឋមានឈ្មោះក្នុងបញ្ជីចំនួនជាង ៩លាន៧សែននាក់៕