សៀមរាម៖ អង្គការ Caring for Cambodia (CFC) បានប្រកាសរៀបចំកម្មវិធីប្រណាំងប្រជែងកាយសម្បទាតាម Online ឬរត់តាម Online ទូទាំងពិភពលោករយៈពេល ២៨ថ្ងៃដើម្បីរៃអង្គាសថវិកាជួយដល់សិស្សានុសិស្ស ដែលកំពុងសិក្សានៅខេត្តសៀមរាប។ កម្មវិធីនេះទទួលបានការឧបត្ថម្ភធំពីក្រុមហ៊ុនសែលកាត ខណៈគ្រោងចាប់ផ្ដើមយុទ្ធនាការនេះចាប់ពីថ្ងៃទី១ រហូតដល់ថ្ងៃទី២៨ ខែឧសភា ឆ្នាំ២០២១។
លោក អ៊ុង សាវី អគ្គនាយកប្រចាំប្រទេសរបស់អង្គការ CFC បានឲ្យដឹងថា នេះគឺជាកម្មវិធីប្រចាំឆ្នាំលើកទី២ ប៉ុន្តែដោយសារស្ថានភាពជំងឺកូវីដ-១៩ មានការរាតត្បាតកាន់តែខ្លាំង ក្រុមការងាររៀបចំបានសម្រេចផ្លាស់ប្ដូរទៅជាការរត់តាម Online ដោយបើកចំហរយៈពេល ២៨ថ្ងៃ សម្រាប់អ្នកមានបំណងចង់ចូលរួមទាំងអស់ នៅទូទាំងពិភពលោក។ លោកបន្ដថា ដោយសារជំងឺកូវីដ-១៩ កំពុងជះឥទ្ធិពលយ៉ាងខ្លាំងដល់សហគមន៍ ពិសេសសិស្សដែលកំពុងស្នាក់នៅ និងរៀនសូត្រក្នុងខេត្តសៀមរាប ទើបអង្គការរៀបចំកម្មវិធីនេះដើម្បីស្វែងរកថវិកាជាចាំបាច់ ក្នុងការជួយសម្រួលដល់សិស្សានុសិស្សទាំងនោះ តាមរយៈយុទ្ធនាការរត់តាម Online ទូទាំងពិភពលោកនេះ ហើយលោកក៏រំពឹងថា នឹងទទួលបានការគាំទ្រច្រើនកុះករផងដែរ។
ទន្ទឹមជាមួយគ្នាលោក អៀន វ៉ាតសុន នាយកប្រតិបត្តិក្រុមហ៊ុនសែលកាត បានសម្ដែងនូវក្ដីរីករាយក្នុងការសហការរៀបចំព្រឹត្តិការណ៍នេះឡើង ដើម្បីចូលរួមដោះស្រាយបញ្ហាប្រឈម និងលើកកម្ពស់ការអប់រំរបស់សិស្សានុសិស្ស តាមរយៈសកម្មភាពកីឡាមួយនេះ ខណៈបច្ចុប្បន្នក៏មានបុគ្គលល្បីៗមួយចំនួន បានចូលរួមយុទ្ធនាការនេះដែរ ដូចជាកីឡាការិនីគុណចម្រុះ អែម សុវណ្ណារី, លោក ឡាយ ប៊ុនឡេង និងលោក កែវ សៀក ជាដើម។ គួរបញ្ជាក់ថា កន្លងមកកីឡាការិនីខ្មែរ-អាមេរិក អែម សុវណ្ណារី គឺបានប្រកាសចូលរួមកម្មវិធីសប្បុរសធម៌នេះរួចមកហើយ ដោយនាងបានដាក់គោលដៅស្វែងរកថវិកា ១៨០ដុល្លារ សម្រាប់ការសិក្សារបស់ក្មេងម្នាក់រយៈពេល ១ឆ្នាំ តែនាងបានសម្រេចលើសការរំពឹងទុកដោយទទួលបានរហូតដល់ ៣០៥ដុល្លារឯណោះ។ សុវណ្ណារី បានសម្ដែងក្ដីរំភើបរីករាយជាខ្លាំងចំពោះការបានចូលរួមកម្មវិធីនេះ ដើម្បីជួយគាំទ្រដល់អង្គការ CFC កំពុងត្រូវការចាំបាច់៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
