កណ្ដាល ៖ កម្ពុជា​ប្រារព្ធ​ទិវា​របេង​ពិភពលោក ២៤មីនា ២០២៣ ក្រោម​ប្រធានបទ«មែនហើយ! យើង​អាច​បញ្ចប់​ជំងឺ​របេង​បាន» រៀប​ចំ​ដោយ​មជ្ឈមណ្ឌល​ជាតិ​កម្ចាត់​រោគ​របេង និង​ហង់សិន រួម​សហការជាមួយ អង្គការសម្ព័ន្ធ​ខ្មែរ​ប្រយុទ្ធ​និងជំងឺអេដស៍ និងគម្រោងខំមីត, នៅវត្តសាលាអណ្តែត ខេត្តកណ្តាល នាព្រឹកថ្ងៃទី២២ ខែមីនា ឆ្នាំ២០២៣នេះ។

​ទិវារបេងពិភពលោក ឋិតក្រោមវត្តមានលោកជំទាវ វេជ្ជបណ្ឌិត យក់ សម្បតិ្ត រដ្ឋលេខាធិការ​ប្រចាំការ​ក្រសួង​សុខាភិបាល ​តំណាង​ដ៏​ខ្ពង់ខ្ពស់​ឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រី​ក្រសួង​សុខាភិបាល និង​មាន​ចូល​រួម​ពី​សំណាក់​លោកស្រីវេជ្ជបណ្ឌិត លី អាយឡែន តំណាងWHO ប្រចាំ​កម្ពុជា, បណ្ឌិត ចន អ៊ៀរ ប្រធានការិយាល័យ​សុខភាពសាធារណៈ និងអប់រំ នៃទីភ្នាក់ងារ USAID ប្រចាំកម្ពុជា, ឯកឧត្តម ជូស្ទីន វ៉ាយយ៉ាត ឯកអគ្គរដ្ឋទូតអូស្រ្តាលី​ប្រចាំកម្ពុជា។

លោកជំទាវ វេជ្ជបណ្ឌិត យក់ សម្បតិ្ត រដ្ឋលេខាធិការប្រចាំការ បានថ្លែង​សាររបស់​សម្តេច​អគ្គមហាសេនាបតីតេជោ ហ៊ុន សែន នាយករដ្ឋមន្រី្ត ក្នុងទិវារបេងពិភពលោក ២០២៣ ថាការ​រៀបចំ​ប្រារព្ធទិវានេះ គឺនៅក្នុងគោលបំណង​បន្តជំរុញ និងយកចិត្តទុកដាក់បន្ថែមទៀត ក្នុងការ​លើក​កម្ពស់​សុខភាព របស់ប្រជាជនឱ្យបានកាន់តែទូលំទូលាយ និងបំផុសការយល់ដឹង ការយក​ចិត្តទុក​ដាក់​ក្នុង​ការប្រយុទ្ធនឹងជំងឺរបេង ផ្សព្វផ្សាយជូនដល់​បងប្អូនប្រជាពលរដ្ឋ​ឱ្យបានយល់អំពីទំហំនៃបញ្ហា និង​ផលវិបាកនៃជំងឺរបេងសំដៅចូលរួមចំណែក លើកកម្ពស់សុខុមាលភាពសង្គម ព្រមទាំង​លើក​កម្ពស់​តម្លៃ និងសេចក្ដីថ្លៃថ្នូររបស់សង្គមជាតិទាំងមូល និងសូមសម្ដែងនូវសេចក្តីរីករាយយ៉ាងខ្លាំង ដោយ​ព្រះរាជាណាចក្រកម្ពុជាយើងបានសម្រេចសមិទ្ធផលគួរជាទីមោទនៈ ក្នុងការ​ប្រយុទ្ធនិង​ជំងឺ​របេង​ក្នុងរយៈពេល ប៉ុន្មានឆ្នាំកន្លងមកនេះ ខណៈដែលកាលពី២០ឆ្នាំមុន ប្រទេសកម្ពុជា​ស្ថិតក្នុង​ចំណោម​ប្រទេស​ដែល​មានអត្រា អ្នកកើតជំងឺរបេងខ្ពស់ជាងគេក្នុងពិភពលោក តែក្នុងរយៈពេល​យ៉ាងខ្លី​កម្ពុជា​បាន​ក្លាយ​ជាប្រទេសគំរូមួយសម្រាប់ ពិភពលោកចំពោះការងារកំចាត់ជំងឺរបេងយ៉ាងសកម្ម និង​ប្រកប​ដោយ​ប្រសិទ្ធភាព។ លទ្ធផលដ៏គាប់ប្រសើរនេះ បានកើតចេញ​ពីកិច្ចខិតខំប្រឹងប្រែង​រួមគ្នា​របស់​ប្រជាជាតិយើង ដែលក្នុងនោះរាជរដ្ឋាភិបាលបានពង្រីកសេវាពិនិត្យ និងព្យាបាលជំងឺរបេង តាមយុទ្ធសាស្ត្រដូតស៍នៅគ្រប់មន្ទីរពេទ្យបង្អែក មណ្ឌលសុខភាព និងប៉ុស្តិ៍សុខភាពទាំងអស់ រួមទាំងថ្នាក់សហគមន៍ផងដែរ នៅទូទាំងប្រទេស។

​ក្នុងនាមអង្គការសុខភាពពិភពលោក លោកស្រីវេជ្ជបណ្ឌិត លី អាយឡែន សូមរំលឹកឡើង​វិញនូវ​ការ​ប្តេជ្ញាចិត្ត​របស់​ខ្លួន ក្នុងការបន្តការគាំទ្ររបស់យើងចំពោះក្រសួងសុខាភិបាល និងសហការ​ជាមួយ​ដៃគូ ដើម្បីអនុម័ត និងប្រើប្រាស់​ការព្យាបាលជំងឺរបេង ដោយឱសថរយៈពេលខ្លី ឧបករណ៍វិនិច្ឆ័យ​រោគរបេង ដ៏មានប្រសិទ្ធភាព យុទ្ធសាស្រ្តដែល​ផ្អែកលើភស្តុតាងនានា និងពង្រីកការអន្តរាគមន៍​ប្រកប​ដោយភាពច្នៃប្រឌិត បន្ថែមទៀតដើម្បីរក​ឲ្យឃើញករណី​ជំងឺរបេងកាន់តែច្រើន និង​ខិតខំ​ប្រឹងប្រែងទ្វេដង ដើម្បីបញ្ចប់ជំងឺរបេង។

ជាចុងក្រោយប្រធានមជ្ឈមណ្ឌលជាតិកំចាត់រោគរបេង និងហង់សិន លោកវេជ្ជបណ្ឌិត ហួត ចាន់យុដា ​បានឲ្យដឹងថា ការធ្វើបច្ចុប្បន្នភាពនៃបន្ទុកជំងឺរបេងនៅកម្ពុជា គឺជាអាទិភាព​ដ៏​សំខាន់​សម្រាប់កម្មវិធីជាតិកំចាត់ រោគរបេង។ យើងសូមថ្លែងអំណរគុណសម្រាប់ការគាំទ្ររបស់ប្រទេសអូស្ត្រាលី សហរដ្ឋអាមេរិក និងដៃគូ​បច្ចេកទេស​ផ្សេងទៀត​រួមមាន វិទ្យាស្ថានស្រាវជ្រាវជំងឺរបេងរបស់ប្រទេសជប៉ុន អង្គការ​សុខភាព​ពិភពលោក និងវិទ្យាស្ថានប៉ាស្ទ័រកម្ពុជា សម្រាបការរួមចំណែក​ដឹកនាំការធ្វើអង្កេតអត្រា​ប្រេវ៉ាឡង់​ជំងឺរបេងនេះ៕ អត្ថបទ ៖ រដ្ឋា