​ជប៉ុន៖ អ្នកក្រុង​តូ​ក្យូ និង​ភ្ញៀវទេសចរ​បរទេស​បាន​ប្រមូលផ្ដុំ​គ្នា​នៅ​ឧទ្យាន Ueno កាលពី​ថ្ងៃ​ពុធ​ ទី​២២​មីនា ដើម្បី​រីករាយ​ការ​គយគន់​ផ្កា​សាគូ​រ៉ា​រីក​ក្នុង​រដូវ​ផ្កា​រីក ខណៈ​ទីក្រុង​នេះ​បាន​ដក​បម្រាម​របស់​ខ្លួន​លើ​ការ​ប្រមូលផ្ដុំ​ក្នុង​ឧទ្យាន​នេះ​នៅ​ឆ្នាំនេះ ជា​លើកដំបូង​ចាប់ពី​ការ​ឆ្លង​រាលដាល​វីរុស​រាតត្បាត​សកល ​COVID-19​។

​អ្នក​ទៅលេង​កម្សាន្ត​នៅ​ឧទ្យាន Ueno មួយ​ក្នុងចំណោម​គោលដៅ​គយគន់​ផ្កា​សាគូ​រ៉ា​រីក​ដ៏​ពេញ​និយម​បំផុត​របស់​ប្រទេស​ជប៉ុន ត្រូវ​គេ​មើល​ឃើញ​កំពុង​ទទួលទាន​អាហារ​ជុំ​គ្នា​លក្ខណៈ​គ្រួសារ និង​ថតរូប​លេង​កម្សាន្ត​យ៉ាង​សប្បាយរីករាយ​។ អ្នកខ្លះ​និយាយ​ថា ពួកគេ​ក៏​មក​ឧទ្យាន​នេះ​ដើម្បី​អបអរ​សាទរ​ភាព​ជោគជ័យ ក្រោយ​ក្រុម​បាល់បោះ​របស់​ប្រទេស​ជប៉ុនបាន​ផ្ដួល​ក្រុម​កីឡា​បាល់បោះ​របស់​សហ​រដ្ឋ​អាមេរិក ដណ្ដើម​បាន​ជ័យជម្នះ​ក្នុង​ព្រឹត្តិការណ៍ World Baseball Classic​។

​ភ្នាក់ងារ​អចលនទ្រព្យ​វ័យ ​៣៦​ឆ្នាំ​លោក Takahiro Okada បាន​និយាយ​ថា មាន​អារម្មណ៍​ថា ទីបំផុត​ជីវិត​ប្រចាំថ្ងៃ​របស់​យើង​កំពុង​ត្រឡប់​មក​រក​សភាព​ធម្មតា​វិញ​ហើយ ដូច្នេះ​ខ្ញុំ​មាន​អារម្មណ៍​រីក​រាយ​ខ្លាំង​ណាស់ ហើយ​ក៏​មាន​អារម្មណ៍ល្អ​ដែរ។ ទីភ្នាក់ងារសារព័ត៌មាន NHK ជប៉ុន​បាន​និយាយ​ដោយ​សំអាង​ប្រភព​ពី​ទីភ្នាក់ងារ​អាកាសធាតុ​ថា អាកាសធាតុ​ក្ដៅ​ល្មម​បែបនេះ​បាន​ធ្វើ​ឲ្យ​ផ្កា​រីក​ស្គុះស្គាយ​រយៈពេល​ ៩​ថ្ងៃលឿន​ជាង​ធម្មតា​នៅ​ក្នុង​រដ្ឋធានី​នេះ និង​មួយ​ក្នុងចំណោម​រដូវ​ផ្កា​រីក​ឆាប់រហ័ស​បំផុត​ដែល​ធ្លាប់បាន​កត់ត្រា​ក្នុង​ប្រវត្តិសាស្ត្រ​៕​

អត្ថបទ៖ សុខមាន