​ន័រវេស៖ កងកម្លាំងប្រដាប់អាវុធ​ប្រទេស​ន័​រវេ​សបានប្រកាសថា រថក្រោះ​ប្រយុទ្ធ​​ Leopard ជំនា​ន់ទី​២ ផលិត​នៅ​ប្រទេស​អាល្លឺម៉ង់​ចំនួន​ ៨​គ្រឿងដែល​ប្រទេស​ន័​រ​វែ​សបាន​សន្យា​ជាមួយ​អ៊ុយ​ក្រែ​ន ពេលនេះ​ត្រូវ​បានទទួល​ដោយ​ទីក្រុង​គី​វ​រួចហើយ​។

វីដេអូ​ដែល​បានចេញ​ផ្សាយ​ដោយ​យោធា​ប្រទេស​ន័​រវេ​សកាលពី​ថ្ងៃ​ពុធ ទី​២២ ខែមីនា បានបង្ហាញ​រថក្រោះ Leopard 2A4 ដែល​ត្រូវបាន​ដឹកជញ្ជូន​តាមផ្លូវ​គោក​ទៅកាន់​ទីតាំង​ដែល​មិនបាន​បង្ហាញ​។ ​កងកម្លាំងប្រដាប់អាវុធ​ន័​រវេ​សបានប្រកាស​នៅលើ​គេហទំព័រ​របស់ខ្លួន​កាលពី​ថ្ងៃ​ចន្ទ ទី​២០ ខែ មីនាថា ​រថក្រោះ Leopard 2 ចំនួន ​៨​គ្រឿង​ត្រូវ​បានទទួល​រួចហើយ​។ ​ទីក្រុង Kyiv ធានាបាន​ពី​ការសន្យា​របស់​សម្ព័ន្ធមិត្ត​ប្រទេស​លោកខាងលិច​ជាច្រើន ដែលថា​នឹង​បញ្ជូន​រថក្រោះ​ប្រយុទ្ធ​ទំនើប​មកជួយ​ទប់ទល់​ការវាយលុក​របស់​រុស្ស៊ី ខណៈ​ទីក្រុង​មូ​ស្គូបង្កើន​កិច្ចប្រឹងប្រែង​របស់ខ្លួន​ ដើម្បី​វាយ​រុលទៅមុខនៅ​ភាគ​ខាងកើត​ប្រទេស​អ៊ុយ​ក្រែ​ន​។

​បណ្តា​ប្រទេស​សម្ព័ន្ធ​យោធា​ណា​តូ​ផ្សេងទៀតរួមមាន​អាល្លឺម៉ង់ ប៉ូឡូញ និង​​ព័រ​ទុយ​ហ្គា​ល់បាន​និយាយថា ពួកគេ​នឹង​ដឹកជញ្ជូន​រថក្រោះ Leopard 2 សរុប​ចំនួន ៤៨គ្រឿង​ទៅឱ្យ​អ៊ុយ​ក្រែ​ន​។​ ​ប្រទេស​ន័​រវេ​សដែលមាន​ព្រំដែន​ជាប់​ប្រទេស​រុស្ស៊ី​នៅ​តំបន់​អាក់​ទិ​កមាន​រថក្រោះ Leopard 2 សរុប​ចំនួន ​៣៦​គ្រឿង៕

អត្ថបទ៖ ប៊ុនថន