ភ្នំពេញ៖ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងជាប្រធាន​គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស (គ.ជ.ប.ជ) ​បន្ត​អំពាវនាវ​យ៉ាង​ទទូច​ដល់​គ្រប់ អាជ្ញាធររាជធានី-ខេត្តវិស័យឯកជន​ និងប្រទេសជាមិត្តទាំងអស់រួមគ្នាបង្ការ និង​ទប់ស្កាត់​ការជួញដូរ​មនុស្សឱ្យបានសកម្មបន្ថែមទៀត ខណៈករណីនេះនៅតែមានបញ្ហានៅឡើយ បើទោះបីជារាជ​រដ្ឋាភិបាល​កម្ពុជា មាន​ឆន្ទៈខ្ពស់ក្នុងការទប់ស្កាត់ ​និង​បង្រ្កាបយ៉ាងណា​ក៏ដោយនោះ។

ក្នុងឱកាសអញ្ជើញផ្សព្វផ្សាយរបាយការណ៍ ​ស្ដីពីការងារប្រយុទ្ធប្រឆាំងអំពើ​ជួញដូរមនុស្ស ឆ្នាំ២០២២ ​និងលើកទិសដៅការងារឆ្នាំ២០២៣ របស់ គ.ជ.ប.ជ ដែលពិធីនេះប្រារព្ធធ្វើឡើង​នៅវិទ្យា​ស្ថានជាតិអប់រំ នាព្រឹកថ្ងៃទី២៣ ខែមីនា ឆ្នាំ២០២៣នេះ ​សម្តេចក្រឡាហោម ​ស ខេង បាន​លើក​ឡើងថា​ នាពេលបច្ចុប្បន្ន នេះរាជរដ្ឋាភិបាលកម្ពុជាបានកំពុងយកចិត្តទុកដាក់ និង​សកម្មយ៉ាង​ខ្លាំង​ក្នុងការទប់ស្កាត់ បង្រ្កាបអំពើ ជួយដូរមនុស្ស​ ហើយយុទ្ធនាការនេះទទួលបាន​លទ្ធផល​ជាផ្លែផ្កា ក្នុង​រយៈពេលប៉ុន្មានខែចុងក្រោយនេះដោយធ្វើការឃាត់ខ្លួន​ជន​សង្ស័យ​បានជាច្រើននាក់ ប៉ុន្តែ​ឧក្រិដ្ឋជន​មួយចំនួនទៀតកំពុងគេចខ្លួន ដូច្នេះ ​ទាមទារឲ្យភាគីពាក់ព័ន្ធទាំងអស់ធ្វើការសហការគ្នា ដើម្បី​ស្វែងរក​ចាប់ខ្លួន​យកមក​ផ្តន្ទាទោស​ទៅតាមច្បាប់ ​ជាធរមាន។

សម្តេចក្រឡាហោម ​ស ខេង ​បានបញ្ជាក់ថា ការបង្រ្កាប ​និងទប់ស្កាត់​អំពើជួញដូរមនុស្សនេះ បើ​ពុំមានការជួយសហការគ្នាពីភាគីពាក់ព័ន្ធ ​បណ្តាក្រុមហ៊ុនឯកជនទេ​ គឺយើងនឹងមិនអាចទទួល​បាន​លទ្ធផលល្អ ប្រសើនោះទេ​ ដូច្នេះករណីនេះត្រូវតែខិតខំបន្ថែមទៀត ​ដើម្បីធ្វើយ៉ាងណាកុំឲ្យកម្ពុជា​មាន​ឈ្មោះជាប្រទេសត្រូវបានគេយក​ធ្វើ​ជា​ជម្រក​នៃការជួញដូរមនុស្ស។

បើតាមលោកជំទាវ ជូ ប៊ុនអេង ​រដ្ឋលេខាធិការក្រសួងមហាផ្ទៃ ​និងជាអនុប្រធានអចិន្ដ្រៃយ៍ គណៈកម្មាធិការ​ជាតិប្រយុទ្ធប្រឆាំងអំពើជួញដូរមនុស្ស (គ.ជ.ប.ជ) ​បានឲ្យដឹងថា​ ក្នុងឆ្នាំ២០២២ កន្លងទៅនេះ ​សមត្ថកិច្ច ធ្វើការបង្ក្រាបអំពើ​អាជីវកម្មផ្លូវភេទចំនួន ​១៣០ករណី ឃាត់ខ្លួន​ជនសង្ស័យចំនួន ១៤៩នាក់ និង​សង្គ្រោះជនរងគ្រោះចំនួន ​២២៥នាក់។

ដោយឡែក ​ការដាក់ចេញនូវ ផែនការប្រតិបត្តិការបង្កើនការបង្ក្រាប​អំពើ​ជួញដូរ​មនុស្ស​គ្រប់​ទម្រង់ របស់​គ.ជ.ប.ជ ចាប់ពីថ្ងៃទី១៨ ខែសីហា ឆ្នាំ២០២២ ជាលទ្ធផលដល់ត្រឹមថ្ងៃទី១០​ ខែ វិច្ឆិកា ឆ្នាំ ២០២២​ សមត្ថកិច្ច ​បានរកឃើញជនបរទេស ​៨៧១នាក់ មកពី ១២ប្រទេស ក្នុងនោះ ​មាន ១៦២នាក់ ត្រូវបានកំណត់អត្តសញ្ញាណរកឃើញថា ពាក់ព័ន្ធនឹងអំពើរត់ពន្ធ និងជួញដូរមនុស្ស ហើយ ៨០នាក់ទៀត ត្រូវបានកំណត់ថា ជាជនសង្ស័យប្រព្រឹត្តបទល្មើស ដែលត្រូវបានឃាត់ខ្លួន បញ្ចូនទៅតុលាការផងដែរ។ នេះបើតាមការ បញ្ជាក់ពីលោកជំទាវ ជូ ប៊ុនអេង៕អត្ថបទ៖ បាន ចក់