ភ្នំពេញ៖ នៅថ្ងៃទី២៣ ខែមីនានេះ ឯកឧត្តម សុង តុងហាប់ រដ្ឋលេខាធិការក្រសួងទេសចរណ៍ បានបើកសិក្ខាសាលាដាក់ដំណើរការ និងផ្សព្វផ្សាយយុទ្ធនាការ « អាជីវកម្មទេសចរណ៍ឆ្នើម ក្នុងយុទ្ធនាការឆ្នាំទស្សនាកម្ពុជា ២០២៣» ស្របតាមទស្សនាទាន IBEST គោលបំណងសំខាន់ប្រកាសឲ្យប្រតិបត្តិករអាជីវកម្មទេសចរណ៍ក្នុងប្រព័ន្ធ និងក្រៅប្រព័ន្ធរួមគ្នារៀបចំបញ្ជីកំណត់តម្លៃមុខទំនិញសេវាកម្មច្បាស់លាស់។
ឯកឧត្តម សុង តុងហាប់ ក្នុងនាមប្រធានក្រុមការងារគាំពារសហគ្រាស និងការងារក្នុងវិស័យទេសចរណ៍បានថ្លែងថា នៅក្នុងយុទ្ធនាការទស្សនាកម្ពុជា ២០២៣ និងការត្រៀមទទួលភ្ញៀវទេសចរអន្តរជាតិទស្សនាប្រកួតកីឡា SEA GAMES និងASEAN PARA GAMES២០២៣ ក្រសួងទេសចរណ៍ រួមសហការក្រសួងពាណិជ្ជកម្ម ជំរុញមូលដ្ឋានអាជីវកម្មទាំងអស់ ដោយរាប់គិតចាប់ពីអ្នកលក់ដូរតាមចិញ្ចើមផ្លូវ អ្នកលក់ដូរចល័តនានា រហូតដល់អ្នកប្រកបអាជីវកម្មខ្នាតធំនានា ជាពិសេសអ្នកផ្តល់សេវាម្ហូបអាហារ និងភេសជ្ជៈ ត្រូវរៀបចំបញ្ជីតារាងកំណត់តម្លៃមុខទំនិញ និងសេវាកម្មនានាច្បាស់លាស់ ដោយគោរពតាមអត្តសញ្ញាណជាតិ សាសនា វប្បធម៌ និងប្រពៃណីទំនៀមទម្លាប់ខ្មែរ។
នៅក្នុងដំណើរការអនុវត្តគោលការណ៍ណែនាំ ស្តីពីអាជីវកម្មទេសចរណ៍ឆ្នើមក្នុងយុទ្ធនាការឆ្នាំទស្សនាកម្ពុជា២០២៣នេះ លោក គឹម សេរីរដ្ឋ ប្រធាននាយកដ្ឋានគ្រប់គ្រងសេវាកម្មស្នាក់នៅទេសចរណ៍ និងម្ហូបអាហារ ថ្លែងថា អ្នកលក់ដូរ ឬមូលដ្ឋានអាជីវកម្មក្នុងវិស័យទេសចរណ៍ អាចនឹងរងការផាកពិន័យជាប្រាក់ប្រមាណពី ៣០ម៉ឺនរៀលទៅ៣៥ម៉ឺនរៀល ហើយអាចនឹងដកអាជ្ញាបណ្ណ បិទអាជីកម្មជាបណ្តោះអាសន្នជាដើម ករណីមានអតិថិជនប្តឹងតវ៉ាជាដើម។
សូមបញ្ជាក់ថា ក្នុងសិក្ខាសាលា«អាជីវកម្មទេសចរណ៍ឆ្នើម ក្នុងយុទ្ធនាការឆ្នាំទស្សនាកម្ពុជា ២០២៣» ក្រសួងទេសចរណ៍ក៏បានប្រកាសអនុវត្តជំរុញចលនាប្រឡងប្រណាំង អាជីវកម្មស្អាត និងបៃតង និងការដាក់ស្នើសុំចំណាត់ថ្នាក់សណ្ឋាគារ និងសេវាកម្មនៅទេសចរណ៍ និងការរៀបចំទីក្រុងវៃឆ្អាត ដែលមានការជំរុញរៀបចំអាជីវកម្មទេសចរណ៍ឲ្យមានភាពទាក់ទាញជាដើម៕
អត្ថបទ ស៊ុម សុខជា