ស៊ីរី៖ លោក Hussein Mankawi មានក្តីសង្ឃឹមតិចតួចបំផុតដែលថា លោកនឹងទទួលបានការសាងសង់ឡើងវិញនូវលំនៅឋាន និងអាជីវកម្មចែកចាយម្ហូបអាហាររបស់លោកនៅទីក្រុង Jandaris ភាគពាយព្យប្រទេសស៊ីរី បន្ទាប់ពីត្រូវបានបំផ្លាញទៅជាគំនរបាក់បែកដោយការរញ្ជួយដីដ៏មហន្តរាយកាលពីខែមុន ដោយបានធ្វើឲ្យលោកបាត់បង់ការងារ។
ការរញ្ជួយដីកាលពីថ្ងៃទី៦ ខែកុម្ភៈគឺជាគ្រោះមហន្តរាយធម្មជាតិដ៏អាក្រក់បំផុត ដែលបានកើតឡើងនៅក្នុងប្រទេសស៊ីរី និងទួរគី ដែលបានបណ្តាលឲ្យមនុស្សជាង ៥៦.០០០នាក់ស្លាប់នៅទូទាំងប្រទេសទាំងពីរ។ ប្រទេសទួរគីបានសន្យាថានឹងមានកិច្ចខិតខំប្រឹងប្រែងដឹកនាំដោយរដ្ឋ ដើម្បីសាងសង់ឡើងវិញលំនៅឋានជាង ៣សែនខ្នងក្នុងឆ្នាំដំបូង ហើយរដ្ឋាភិបាលស៊ីរីដែលខ្វះខាតសាច់ប្រាក់ បានបង្កើតមូលនិធិសំណងសម្រាប់ជនរងគ្រោះ និងបានផ្តល់នូវលំនៅឋានបណ្តោះអាសន្នដល់ប្រជាជនភៀសខ្លួន។ យោងតាមអង្គការសហប្រជាជាតិបានឲ្យដឹងថា ប៉ុន្តែជំនួយនេះទំនងជាមិនទៅដល់ភាគពាយព្យរបស់ប្រទេសស៊ីរីនោះទេ ជាតំបន់ដែលគ្រប់គ្រងដោយក្រុមឧទ្ទាមប្រឆាំងរដ្ឋាភិបាល និងជាតំបន់មានប្រជាជនចំនួន ២,៥លាននាក់ ដែល ២លាននាក់ក្នុងចំណោមនេះបានរស់នៅក្នុងជំរំតង់ ទោះបីមុនពេលការរញ្ជួយដីបានកើតឡើងក៏ដោយ។
លោក Mahmome Haffar ប្រធានក្រុមប្រឹក្សាតំបន់បានឱ្យដឹងថា នៅតំបន់ Jandaris ដែលរងការវាយប្រហារខ្លាំងបំផុត ពាក់កណ្តាលនៃសាលារៀនចំនួន ៤៨កន្លែងត្រូវការសាងសង់ ឬជួសជុលឡើងវិញ ខណៈត្រូវជួសជុលបណ្តាញទឹក និងអនាម័យជាង ២០គីឡូម៉ែត្រ និងផ្លូវភាគច្រើននៅទីក្រុងផងដែរ។ ប៉ុន្តែលោកបាននិយាយថា អាជ្ញាធរតំបន់ពុំមានធនធានដើម្បីកសាងឡើងវិញនោះទេ។ ម្ចាស់ជំនួយក្នុងសន្និសីទដឹកនាំដោយសហភាពអឺរ៉ុបកាលពីថ្ងៃចន្ទបានសន្យាផ្តល់ជំនួយ ៧ពាន់លានអឺរ៉ូ ឬ ៧.៥ពាន់លានដុល្លារដើម្បីជួយកសាងប្រទេសទួរគីឡើងវិញ។ ប៉ុន្តែប្លុកអឺរ៉ុបបានដាក់ទណ្ឌកម្មលើក្រុងដាម៉ាស និងបាននិយាយថា ខ្លួននឹងផ្តល់ហិរញ្ញប្បទាន តែជំនួយមនុស្សធម៌ និងការស្តារឡើងវិញ ប៉ុន្តែពុំមែនជាការសាងសាងសង់ឡើងវិញទាំងស្រុងនោះទេ ដរាបណាមិនមានកិច្ចពិភាក្សានយោបាយរវាងលោក អាសាដ និងគូប្រឆាំងរបស់លោក៕
អត្ថបទ៖ ប៊ុនថន