ភ្នំពេញ៖ នៅថ្ងៃនេះ ក្រសួងការបរទេស និងសហប្រតិបត្តិការអន្តរជាតិ រួមជាមួយក្រសួងការបរទេស កុំមិនវែលដូមីនីក បានអញ្ជើញចុះហហត្ថលេខាស្តីពី ការលើកលែងទិដ្ឋាការសម្រាប់អ្នកកាន់លិខិតឆ្លងដែនការទូត និងផ្លូវការ។
នៅថ្ងៃទី២៣ ខែមីនា ឆ្នាំ២០២៣នេះ ឯកឧត្តម អ៊ុច បូររិទ្ធ រដ្ឋមន្រ្តីស្តីទីនៃក្រសួងការបរទេស និងសហប្រតិបត្តិការអន្តរជាតិ បានទទួលស្វាគមន៍ការអញ្ជើញបំពេញទស្សនកិច្ចរបស់ ឯកឧត្តមបណ្ឌិត វីន ហេនដឺសាន់ (Vince Henderson) រដ្ឋមន្ត្រីការបរទេស ធុរកិច្ចអន្តរជាតិ ពាណិជ្ជកម្ម និងថាមពល នៃប្រទេសកុំមិនវែលដូមីនីក នៅកម្ពុជា រយៈពេល៣ថ្ងៃ ពីថ្ងៃទី២២ ដល់ថ្ងៃទី២៤ ខែមីនា ឆ្នាំ២០២៣។
មុនពិធីចុះហត្ថលេខាចាប់ផ្តើម ឯកឧត្តម អ៊ុច បូររិទ្ធ បានជួបពិភាក្សាការងារជាមួយរដ្ឋមន្រ្តីការបរទេស កុំមិនវែលដូមីនីក ដោយសម្តែងការស្វាគមន៍ និងរីករាយចំពោះដំណើរទស្សនកិច្ចនាពេលនេះ។
ឯកឧត្តម អ៊ុច បូររិទ្ធ ថ្លែងថា កម្ពុជា ជាប្រទេសតូចមួយ ដែលទទួលបានសុខសន្តិភាពពេញលេញក្នុងរយៈពេលជាង២ទស្សវត្សន៍ចុងក្រោយ ប៉ុន្តែកម្ពុជា បានឆ្លងកាត់របបប្រល័យពូជសាសន៍ ប៉ុល ពត និងដ៏លំបាកក្នុងដំណើរស្វែករកសន្តិភាពនៃសន្ធិសញ្ញាសន្តិភាពទីក្រុងប៉ារីស ក្រោមព្រះរាជវត្តមានរបស់ព្រះបាទ សម្តេច ព្រះបរមរតនកោដ្ឋ និងសម្តេចតេជោ ហ៊ុន សែន នាយករដ្ឋមន្រ្តី។
លើសពីនេះ ភាគីទាំងពីរ បានពិភាក្សាគ្នាលើវិស័យផ្សេងៗ ដើម្បីពង្រឹងកិច្ចសហប្រតិបត្តិការទ្វេភាគី តំបន់ និងអន្តរជាតិផងដែរ។
បន្ទាប់ពីជំនួបពិភាក្សា ភាគីទាំងពីរ បានអញ្ជើញចុះហត្ថលេខាលើកិច្ចសហប្រតិបត្តិការការទូតនោះស្តីពី ការលើកលែងទិដ្ឋាការសម្រាប់អ្នកកាន់លិខិតឆ្លងដែនការទូត និងផ្លូវការ។
ក្នុងអំឡុងពេលនៃដំណើរទស្សនកិច្ចនេះ ឯកឧត្ដម រដ្ឋមន្រ្តីការបរទេសកុំមិនវែលដូមីនីក នឹងបន្តអញ្ជើញចូលជួបសម្តែងការគួរសមជាមួយ សម្តេចតេជោ ហ៊ុន សែន នាយករដ្ឋមន្ត្រី៕អត្ថបទ៖ ឧត្តម