ភ្នំពេញ៖ អ្នកនាំពាក្យរបស់ក្រសួងការបរទេស និងសហប្រតិបត្តិការអន្តរជាតិកម្ពុជា បានចំអកឲ្យក្រសួងការបរទេសអាមេរិក ដែលបានចេញរបាយការណ៍ ស្តីពីសិទ្ធិមនុស្សដល់ប្រទេសដទៃ រួមទាំងកម្ពុជាផង ខណៈប្រទេស​អាម៉េរិកខ្លួនឯងមានការរើសអើងជាតិសាសន៍ ការបាញ់សម្លាប់ទ្រង់ទ្រាយធំ អំពើឃោរ ឃៅរបស់នគរបាល និងការរំលោភបំពានក្នុងពន្ធនាគារជាដើម តែបែរជាប្រទេសដែលអួតថា ជាបិតាប្រជាធិបតេយ្យនេះមិនបានបញ្ចេញរបាយការណ៍ទៅវិញ។​

សេចក្តីថ្លែងការណ៍ព័ត៌មានរបស់ក្រសួងការបទេស និងសហប្រតិបត្តិការអន្តរជាតិ ដែលបានចេញនៅថ្ងៃទី២២ ខែមីនា ឆ្នាំ២០២៣ បានលើកឡើងថា ក្រសួងការបទេសកម្ពុជា ពិតជាមានការខកចិត្តចំពោះ «របាយការណ៍ក្រសួងការបរទេសអាមេរិក ស្តីពីស្ថានភាពសិទ្ធិមនុស្សនៅកម្ពុជាឆ្នាំ២០២២» ដែលមានលក្ខណៈរើសអើង លម្អៀង និងពុំផ្អែកលើការពិត ក្រោមហេតុផលនយោបាយ។

សេចក្តីថ្លែងការណ៍ដដែល បានសង្កត់ធ្ងន់ថា «របាយការណ៍របស់ក្រសួងការបរទេសសហរដ្ឋអាមេរិក ស្តីពីស្ថានភាពសិទ្ធិមនុស្សនៅបណ្តាប្រទេសផ្សេងៗរួមទាំងកម្ពុជាផង លាតត្រដាងយ៉ាងជាក់ស្តែងអំពីស្តង់ដារពីរ នៅក្នុងការអនុវត្តរបស់ខ្លួន ជាពិសេសពុំបានចេញផ្សាយរបាយការណ៍ ស្តីពី​សិទ្ធិមនុស្សរបស់ សហរដ្ឋអាមេរិកខ្លួនឯងនោះឡើយ»។

ប្រភពដដែលបានលើកឡើងទៀតថា សហរដ្ឋអាមេរិកដែលប្រកាន់របបលទ្ធិប្រជាធិបតេយ្យតាមបែបរបស់ខ្លួនជាងពីររយឆ្នាំមកហើយ នៅតែជួបប្រទះបញ្ហារំលោភបំពានសិទ្ធិមនុស្សជាច្រើន ជារៀងរាល់ថ្ងៃ ដែលក្នុងចំណោមបញ្ហាប្រឈមធំៗរួមមានដូចជា «ការរើសអើងជាតិសាសន៍ ឧក្រិដ្ឋកម្មស្អប់ខ្ពើមពូជសាសន៍ ការបាញ់សម្លាប់ទ្រង់ទ្រាយធំ អំពើឃោរឃៅរបស់នគរបាល ការរំលោភបំពានក្នុងពន្ធនាគារ អត្រាមរណភាពរាប់លាននាក់ដោយសារជំងឺរាតត្បាត ការកាត់ទោសប្រហារជីវិត និងការរិតត្បិតសិទ្ធិរំ លូតកូនជាដើម»។

ក្រសួងការបរទេសកម្ពុជាក៏បានចំអកឲ្យសហរដ្ឋអាមេរិកដែរថា របាយការណ៍ដែលខ្លួនឯងបានចេញនេះគឺ ជាការចងក្រងជ្រើសរើសតែមួយជ្រុង នៃព្រឹត្តិការណ៍ដែលផ្អែកលើការបោះពុម្ពផ្សាយ ពុំមានការផ្ទៀងផ្ទាត់ព័ត៌មានត្រឹមត្រូវរបស់អង្គការក្រៅរដ្ឋាភិបាលដែលបានទទួលលុយពីប្រទេសខ្លួននោះឡើយ។ ការអះអាងថា មាន«ប្រភពអាចទុកចិត្តបាន»ដែលគុណវុឌ្ឍិរបស់ប្រភពទាំងនោះគួរឲ្យសង្ស័យ ពុំធ្វើឲ្យរបាយការណ៍ខាងលើ ជឿទុកចិត្តបាននោះទេ។

សេចក្តីថ្លែងការណ៍របស់ក្រសួងការបរទេសកម្ពុជាដដែលបានលើកឡើងទៀតថា របាយការណ៍ដែលអាមេរិកបានចេញនោះ គឺបានបិទភ្នែក ធ្វើមើលមិនឃើញនូវវោហារសាស្រ្តដ៏គ្រោះថ្នាក់ និងជ្រុលនិយ មរបស់ក្រុមប្រឆាំងមួយចំនួន ដែលផ្សព្វផ្សាយព័ត៌មានមិនពិត ជេរប្រមាថនិងបង្កាច់បង្ខូចកេរ្តិ៍ឈ្មោះ ដោយគ្មានការរើសអើង ញុះញង់ឲ្យមានអំពើហិង្សា និងការស្អប់ខ្ពើមជាតិសាសន៍ ព្រមទាំងអំពាវនាវឲ្យមានការបះបោរប្រឆាំងរដ្ឋាភិបាលស្របច្បាប់ ដែលទង្វើទាំងអស់នេះត្រូវបានថ្កោលទោសយ៉ាងធ្ងន់ធ្ងរនៅក្នុងបណ្តាប្រទេសលោកខាងលិច។ ឧទាហរណ៍មួយដែលបង្ហាញយ៉ាងច្បាស់អំពីស្តង់ដារពីរគឺ អាជ្ញាធរអាមេរិកបានចាត់វិធានការតាមផ្លូវច្បាប់ ចំពោះបុគ្គលជាង១០០០នាក់ ដែលត្រូវបានចោទប្រកាន់ថា បានជាប់ពាក់ព័ន្ធនឹងការបះបោរនៅវិមានសភាអាមេរិកនោះ៕​ អត្ថបទ៖ បាន ចក់