ភ្នំពេញ៖ សមាគមថ្នាលយុវជនកម្ពុជា (សយក) បានបេ្តជ្ញាយ៉ាងមុតមាំ ក្នុងការចូលរួមការងារ ឱ្យកាន់តែ សកម្មបន្ថែម ទៀត ដើម្បីគាំទ្រដល់ការអនុវត្តន៍នូវគោលនយោបាយរបស់រាជរដ្ឋាភិបាល ក្រោមការដឹកនាំប្រកបដោយភាព វៃឆ្លាត បំផុតរបស់សម្តេចតេជោនាយករដ្ឋមន្ត្រីនៃកម្ពុជា។

 លោក ម៉ៅ ផល្លា ប្រធានសមាគមថ្នាលយុវជនកម្ពុជា ក្នុងឱកាសដឹកនាំគណៈប្រតិភូរបស់សមាគមគ្រប់ថ្នាក់ ទាំង​ថ្នាក់កណ្តាល និងថ្នាក់រាជធានី ខេត្ត ចូលជួបសម្តែងការគួរសម និងពិភាក្សាការងារ ជាមួយឯកឧត្តមបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវ: កាលពីព្រឹកថ្ងៃទី២៣ មីនា ឆ្នាំ២០២៣ បានឲ្យដឹង សមាគមរបស់លោក បង្កើតឡើងក្នុងឆ្នាំ២០២១ មានបេសកកម្មចូលរួមចំណែកគាំទ្រដល់រដ្ឋាភិបាល តាមរយៈ​ការធ្វើសកម្មភាពការងារមនុស្សធម៌នៅទូទាំងប្រទេស និងកៀរគរប្រមូលសមាជិកគ្រប់ស្រទាប់​វណ្ណៈឲ្យចូល​ជាសមាជិក។ ​

លោកបន្តថា គិតមកដល់សព្វថ្ងៃនេះ សមាគមមានសមាជិកជាក្បាលម៉ាស៊ីន ដឹកនាំតាម រាជាធានី ខេត្ត ក្រុង សរុបចំនួនជាង ៣ពាន់នាក់។

 លោកប្រធាន បានរាយការណ៍ជូនឯកឧត្តមរដ្ឋមន្រ្តីបន្ថែមថា សមាគមថ្នាលយុវជនកម្ពុជា បានចុះធ្វើ​សកម្មភាព​ការងារមាន​ចំនួន ១៦ខេត្ត ក្រុង និងបានចុះធ្វើសកម្មភាពការងារមនុស្សធម៌ចំនួន ៤៨លើក ដែលក្នុងនោះ មានដូច​ជាការឧបត្ថម្ភជាថវិកាទៅលើគ្រួសារជនក្រីក្រ ជនពិការ និងការចូលរួមឧបត្ថម្ភកសារផ្លូវក្នុងភូមិ ស្រុក ដើម្បីសម្រួល​ដល់ការធ្វើដំណើររបស់ប្រជាពលរដ្ឋក្នុងមូលដ្ឋានផងដែរ។ ថ្មីៗនេះ សមាគមក៏បានធ្វើការខិតខំ​ក្នុងការពង្រីក​សមាជិក​មកពីគ្រប់មជ្ឈដ្ឋាន និងនិន្នាកាបានជាង ២០០នាក់ថែមទៀត។

 នៅក្នុងជំនួបនាឱកាសនោះ ឯកឧត្តមរដ្ឋមន្រ្តី អ៊ិត សំហេង បានធ្វើការកោតសរសើរ និងវាយតម្លៃខ្ពស់ចំពោះ​សកម្មភាព​ការងាររបស់សមាគមកន្លងមក បានចូលរួមចំណែកយ៉ាងប្រសើរ ក្នុងការជួយគាំទ្រ​ដល់ការអនុវត្ត​គោលនយោបាយរបស់រាជរដ្ឋាភិបាល ក៏ដូចជាគាំទ្រទៅដល់ការអនុវត្តនូវផែនការយុទ្ធសាស្រ្តអភិវឌ្ឍន៍វិស័យការងារ និងបណ្តុះបណ្តាលវិជ្ជាជីវ: ជាពិសេសសកម្មភាពជួយដល់យុវជន និងជនងាយរងគ្រោះ ដើម្បីទទួលបានកិច្ចគាំពារ និងបង្កើតបាននូវឱកាសនានា។ ឯកឧត្តម បានឯកភាពឱ្យសមាគមរៀបចំជា​អនុស្សរណ:​យោគយល់​គ្នាជាមួយ​ក្រសួង ដើម្បីបង្កើតភាពជាដៃគូ ឱ្យកាន់តែជិតស្និតថែមទៀត ក្នុងការចូលរួមចំណែកជួយដល់ប្រជាពលរដ្ឋ យុវជន កម្មករនិយោជិតទាំងក្នុងនិងក្រៅប្រព័ន្ធ និងពលករនៅក្រៅប្រទេស ដើម្បីរួមគ្នាអភិវឌ្ឍន៍​ប្រទេសជាតិ​យើងឱ្យកាន់​តែរីកចំរើនជឿនលឿន តាមគោលនយោបាយដ៏ត្រឹមត្រូវរបស់រាជរដ្ឋាភិបាលកម្ពុជា ដែលបានកំណត់យក សន្តិភាព​ជាមូលដ្ឋានគ្រឹះ នៃការអភិវឌ្ឍប្រទេសជាតិ៕ ដោយ ៖ បូរ៉ាវី