សិង្ហបុរី ៖ នាយករដ្ឋមន្ត្រីប្រទេសសិង្ហបុរី លោក Lee Hsien Loong បាននិយាយលើកឡើងកាលពីថ្ងៃសុក្រ ទី២៤ខែ មីនា ថា ពិភពលោកទាំងមូលចាំបាច់ត្រូវទទួលស្គាល់ថា ប្រទេសចិននាពេលបច្ចុប្បន្ននេះ ពុំមែនជាអ្វីដូច​ប្រទេសចិន​ពីមុននោះទេ ហើយទទួលយកថាបច្ចុប្បន្នប្រទេសនេះ មានតួនាទីកាន់តែធំនៅលើឆាកពិភពលោក។ លោកបាននិយាយបន្ថែមថា កិច្ចសហប្រតិបត្តិការ និងការសម្របសម្រួលពីភាគីទាំងពីរ គឺចាំបាច់ ព្រោះថា​ពិភពលោក​មិនអាចទប់ទល់បញ្ហាជម្លោះ ជាពិសេសរវាងប្រទេសចិន និងសហរដ្ឋអាមេ  រិក។ លោកនាយករដ្ឋមន្ត្រី បាននិយាយ​អំពីទំនាក់ទំនងរវាងទីក្រុងប៉េកាំង និងប្រទេសផ្សេងទៀត រួមមានទាំងប្រទេសសិង្ហបុរី នៅក្នុងបទសម្ភាសន៍​មួយជាមួយទូរទស្សន៍កណ្តាលរដ្ឋចិន (CCTV) សម្រាប់កម្មវិធី Leaders Talk ដែលចាក់ផ្សាយនៅម៉ោង ៩.៣០នាទី យប់ថ្ងៃសុក្រ ម៉ោងក្នុងតំបន់។ នៅក្នុងការថ្លែងក្នុងបទសម្ភាសន៍ពេញលេញ ដែលចេញដោយ​ការិយាល័យ​នាយករដ្ឋមន្ត្រី លោក Lee បាននិយាយថា ប្រទេសចិន ក៏ត្រូវតែពិចារណាឡើងវិញផងដែរនូវការរៀបចំ នានាដែលខ្លួនបានធ្វើ នៅពេលដែលខ្លួនជាប្រទេសមានសេដ្ឋកិច្ចតូចជាងនេះ ហើយកំណត់​ឡើងវិញនូវ​ជំហរផ្ទាល់​របស់ខ្លួន។ អ្នករាយការណ៍ព័ត៌មានរបស់ទូរទស្សន៍ CCTV បានសួរអំពី ថាតើការកើនឡើងរបស់ប្រទេសចិន អាចជួយឲ្យមានភាពប្រសើរជាងមុននៅទូទាំងពិភពលោកដែរឬទេ ដែលបានធ្វើឲ្យ​ប្រទេសមួយ​ចំនួនមាន​ប្រតិកម្មខុសៗគ្នា ដោយខ្លះយល់ថាជាការគំរាមកំហែង។ ដោយលើកឡើងពីការកើនឡើងរបស់ប្រទេសចិនដែលមានពី ២ ទៅ ៣ ភាគរយនៃពាណិជ្ជកម្មពិភពលោករហូតដល់ ១៥ ទៅ ២០ ភាគរយនាពេលបច្ចុប្បន្ន លោក Lee និយាយថា តាមទស្សនៈដែលមិនលំអៀង វាជាការល្អប្រសើរដែលប្រជាជន ១.៤ ពាន់លាននាក់មានជីវិត​កាន់តែប្រសើរនា​ពេលបច្ចុប្បន្ននេះ។ លោកនិយាយថា ប្រទេសចិនមានភាពរីកចម្រើនកាន់តែខ្លាំង ដោយមានការចូលរួម​ចំណែកកាន់តែច្រើនដល់សេដ្ឋកិច្ចពិភពលោក និងសំឡេងកាន់តែច្រើនជាងមុននៅក្នុងកិច្ចការអន្តរជាតិ។