ភ្នំពេញ៖ លោកឧត្តមសេនីយ៍ ហ៊ុន ម៉ាណែត អគ្គមេបញ្ជាការរង កងយោធពលខេមរភូមិន្ទ និងជា​មេបញ្ជាការ​កងទ័ព​ជើង​គោក នៅរសៀលថ្ងៃទី២៤ ខែមីនា ឆ្នាំ២០២៣ បានទទួលជួបសំណេះសំណាល និងពិភាក្សា​ការងារតាម​ទូរស័ព្ទជាមួយនាយឧត្តមសេនីយ៍ យុស៊ីដា យុស៊ីហ៊ីដេ មេបញ្ជាការកងស្វ័យការពារជើងគោកជប៉ុន។

កិច្ចសន្ទនានោះ មេបញ្ជាការកងទ័ពជើងគោកជប៉ុន បានសម្តែងការអបអរសាទរចំពោះលោកឧត្តមសេនីយ៍ ហ៊ុន ម៉ាណែត ដែលត្រូវបានព្រះមហាក្សត្រ ត្រាស់បង្កាប់ជា« នាយឧត្តមសេនីយ៍»។

លោកឧត្តមសេនីយ៍ ហ៊ុន ម៉ាណែត បានថ្លែងអំណរគុណចំពោះមេបញ្ជាការកងស្វ័យការពារជើងគោកជប៉ុន ដែលតែង​បានផ្តល់តម្លៃ និងសារៈសំខាន់ប្រកបដោយមនោសញ្ចេតនាស្និទ្ធស្នាល ចំពោះចំណងមិត្តភាព សាមគ្គីភាព និង​ទំនាក់ទំនងរវាងកងទ័ពជើងគោកនៃប្រទេសទាំងពីរ ជាពិសេសការប្តេជ្ញាចិត្តរបស់ភាគីមិត្តជប៉ុនក្នុងការពង្រឹង និងពង្រីកកិច្ចសហប្រតិបត្តិការក្នុងវិស័យបោសម្អាតមីន, ប្រតិបត្តិការជួយសង្គ្រោះគ្រោះមហន្តរាយ និងការ​បណ្តុះបណ្តាលធនធានមនុស្សជាដើមនោះ។

លោកឧត្តមសេនីយ៍ ហ៊ុន ម៉ាណែត បានឲ្យដឹងថា នៅក្នុងកិច្ច សន្ទនានោះសមភាគីទាំងពីរ​បានរំឭកឡើង​វិញប្រកប​ដោយការពេញចិត្តចំពោះវឌ្ឍនភាពរីកចម្រើន គួរជាទីមោទនៈនៃទំនាក់ទំនង​ក្នុងកម្រិតកងទ័ពជើង​គោក​ក្នុង​រយៈកាល​កន្លងមកនេះ ជាពិសេសការសម្រេចបាននូវការចុះហត្ថលេខាលើឯកសារលក្ខខណ្ឌ ស្តីពីកិច្ចសហប្រតិបត្តិការ (TOR) រវាងកងទ័ពជើងគោកនៃកងយោធពលខេមរភូមិន្ទ និងកងស្វ័យការពារជើងគោកជប៉ុន កាលពីថ្ងៃទី១៥ ខែកុម្ភៈ​ឆ្នាំ២០២៣ ដែលនេះគឺជាសមិទ្ធផលកេរដំណែលរវាងមេបញ្ជាការកងទ័ពជើងគោកទាំងពីរ។

សមភាគីទាំងពីរ ក៏បានឯកភាពគ្នាបន្តគាំទ្រ និងជំរុញកិច្ចសហប្រតិបត្តិការក្នុងកម្រិតកងទ័ពជើងគោក ឱ្យកាន់តែសកម្ម និងរឹងមាំបន្ថែមទៀត តាមរយៈការប្រឹងប្រែងយកចិត្តទុកដាក់អនុវត្តខ្លឹមសារនៃ TOR ដែលត្រូវបានចុះ​ហត្ថលេខា​រួចឱ្យមានប្រសិទ្ធភាព និងប្រសិទ្ធផលខ្ពស់ រួមនឹងការបន្តគាំទ្រគ្នាទៅវិញ​ទៅមកក្នុងក្របខ័ណ្ឌតំបន់ ដើម្បីលើ​កកម្ពស់សន្តិភាព ស្ថិរភាព និងការអភិវឌ្ឍប្រកបដោយបរិយាបន្ន៕ អត្ថបទ៖ បាន ចក់​